DZIPHISALEMA 144

₁Nga hu rendwe Muṋe washu,

Ene bako ḽanga!

Ndi Ene a gudisaho zwanḓa zwanga u lwa,

a funza minwe yanga u fara mafumo.

₂Muṋe washu,

ndi Iwe Mutsireledzi wanga a fulufhedzeaho,

vhudzumbamo hanga, Mutshidzi wanga,

tshiṱangu tshanga, vhukhudo hanga;

ndi Iwe u no ita uri vhathu vhanga vha nnduvhe.

₃Muṋe washu,

nṋa muthu u tou vha mini

u tshi vhuya wa mu sedza-vho?

Mubebwa-nga-muthu u tou vha mini

u tshi vhuya wa mu humbula-vho?

₄Muthu u nga mufemo,

maḓuvha awe a fhira unga murunzi.

₅Muṋe washu,

tsisa makole au u tsele fhasi,

kwama dzithavha dzi dube vhutsi.

₆Balanganya maswina nga phenyo dzau,

posa misevhe yau u vha shakulise.

₇Onyolosa tshanḓa tshau u ngeo ṱaḓulu,

u ntshidze ndi si kumbiwe nga muḓalo wa maḓi,

u nndamukise zwanḓani zwa vhatsinda;

₈milomo yavho i amba mazwifhi,

naho vha tshi ana vha anela mazwifhi.

₉Mudzimu,

ndi ḓo u imbela luimbo luswa,

ndi ḓo u lidzela haripa ya thale dza fumi.

₁₀Ndi Iwe u no ita uri mahosi a kunde;

u lamukisa nṋe Dafita mukoma wau.

₁₁Nndamukise kha pfumo ḽa vhuhali,

u ntshidze zwanḓani zwa vhatsinda;

milomo yavho i amba mazwifhi,

naho vha tshi ana vha anela mazwifhi.

₁₂Ngavhe vhatuka vhashu u bva hanani havho

vha tshi nga zwimela zwi no aluwa zwo khwaṱha;

vhasidzana vhashu vha nga phuphu dza guḓani

dzo vhaḓelwaho u ṱama pfamo.

₁₃Ngavhe zwiṱaṱari zwashu zwi tshi ḓala,

zwa wa muwa nga mbeu ya tshakha-tshakha;

nngu dzashu mafuloni ashu

dza dzwala zwigidi na mahumi a zwigidi,

₁₄kholomo dzashu dza vha na maḓamu,

hu si vhe na swina ḽi no ri tshoṱhela kana ḽa ri thuba,

magondoni ashu hu si pfale zwililo.

₁₅Vha na mashudu vha no nga vhenevho.

Lu na mashudu lushaka

lune Mudzimu walwo a vha Muṋe washu.