MIRERO 28

₁Muvhi u ofha swiswi ḽi si na phele;

a no thetshelesa Mudzimu u nga ndau, ha ofhi tshithu.

₂Ha vha na muvhango vhavhusi a vha fheli;

munna wa ṱhalukanyo na nḓivho ene u ḓi vhusa.

₃Mushai a no kandeledza vhashai,

u nga mvula ya mikumbela i no kumba mavhele ha wa nḓala.

₄Vhane vha nyadza mulayo vha khoḓa muvhi;

vha no u vhulunga vhone vha lwa nae.

₅Muvhi ha ṱalukanyi khaṱhulo mbuya;

a no ṱoḓa Muṋe washu ene u i ṱalukanya nga vhuḓalo.

₆Ndi khwiṋe u vha mushai u sa solisei,

u fhira u vha mupfumi wa nḓila dza magombikwa.

₇Muṱhannga a no vhulunga mulayo u na maano;

a no konana na vha sa ḓivhalei u shonisa khotsi awe.

₈A no andisa lupfumo nga u ḽa vhathu,

u lu khokhela muṅwe a no ḓo tonda vhashai ngalwo.

₉Ane a konyolela matanda nḓevheni a si pfe mulayo,

na thabelo dzawe dzi a nengisa.

₁₀Ane a xedza vha si na vhufhura u ḓo fashwa nga khunḓa yawe ene muṋe;

vha sa solisei vhone vha ḓo wana ifa ḽavhuḓi.

₁₁Mupfumi a nga vhona unga o ṱalifha;

mushai a re na ṱhalukanyo ene u a mu vhonolola.

₁₂Ha kunda muvhuya, vhathu vhoṱhe vha a pembela;

hu tshi thoma u vhusa muvhi, vha a dzumbama.

₁₃Ane a dzumba vhutshinyi hawe a zwi mu nakeli;

ane a vhu bula a vhu furalela, u khathutshelwa nga Mudzimu.

₁₄U na mashudu a no dzula a tshi ofha Muṋe washu;

ane a ita tshipimbi ene u wela khomboni.

₁₅Muvhusi muvhi a tshi vhusa vha sa koni u ḓilwela,

u nga ndau i vhombaho, u nga biara i na nḓala.

₁₆Muvhusi wa tshiṱuhu ha na ṱhalukanyo;

ane a vhenga zwa u ḽa vhathu u ḓo lalama.

₁₇O hwalaho mulandu wa vhupondi

u ḓo vha tshavhi a vhuya a fa;

hu songo vha na a mu tikedzaho.

₁₈Wa nḓila dzi sa solisei u ḓo tsireledzwa;

wa nḓila dza magombikwa ene ha lengi u wa.

₁₉Ane a lima tsimu yawe, u ḓo ḽa a fura;

a no tevhela mahandana u ḓo fura vhushai.

₂₀Ane a fulufhedzea u ḓo shudufhadzwa vhukuma;

ane a lilela u pfuma nga tshihaḓu ha nga litshi u rwiwa.

₂₁Tshiṱalula a si tshavhuḓi;

u hone muhaṱuli a no khakhiswa na nga u ṋewa kugaku kwa vhuswa.

₂₂Mudzia-u-dzimana u lilela u pfuma;

ha ḓivhi uri vhushai ho mu lindela.

₂₃Ane a kaidza muthu u ḓo takalelwa ngavhuya

u fhira wa lulimi lwa muhoyo.

₂₄Ane a tswela vhabebi a ri, “A zwo ngo khakhea!”

ndi ṱhama ya phondi.

₂₅A no lilela lupfumo u vusa nndwa;

a no fulufhela Muṋe washu ene zwi ḓo mu nakela.

₂₆Ane a ḓifulufhela ndi tsilu;

a no endedzwa nga vhuṱali ha ofhi tshithu.

₂₇A no tonda vhashai ha nga shayi tshithu;

a no bonya maṱo a nga ha vha vhoni, vha a mu teketela.

₂₈Hu tshi thoma u vhusa muvhi, vhathu vha a dzumbama;

vhavhi vha tshi lovha, vhavhuya zwi a vha nakela.