MIRERO 26

₁Tsilu a ḽo ngo tewa nga khuliso,

ḽa huliswa zwi nga mahaḓa a tshi wa tshilimo,

zwi nga mvula ya muḓaphondo.

₂Ṱhatshile a i ḽi muthu a si na mulandu;

i fhira unga ṱhongola i tshi fhufha,

i nga ṱhambamaḓi i sa kavhi.

₃Tsha bere ndi tshimebi,

tsha donngi ndi dziḓomo,

tsha muṱana wa tsilu ndi mbuno.

₄U songo fhindula tsilu u tshi tevhedza vhutsilu haḽo,

u sa ḓo nga ḽone.

₅Fhindula tsilu nga ḽo fanelaho vhutsilu haḽo,

ḽi sa ḓo vhona unga ḽo ṱalifha.

₆U laedza danana mafhungo

ndi u ḓitumula milenzhe,

ndi u ḓiṱoḓela mafhanza.

₇Veveru ḽi tshi bula murero,

zwi nga mulenzhe wa tshihole u nembelelaho.

₈U hulisa tsilu

zwi nga u vhofhelela tombo kha gatho, ḽa nambatela.

₉Vavhi ḽi tshi bula murero,

zwi nga tshidakwa tsho vaiwa tshanḓa nga mupfa tshi sa pfi tshithu.

₁₀Ane a thola tsilu kana mufhiri wa nḓila,

u nga mupfuli a no sokou pfula a sa sedzi.

₁₁Tsilu ḽi ṱolou dzeula vhutsilu haḽo,

unga mmbwa i tshi ri u ṱanza maṱanza ya dovha ya ḽa.

₁₂Ane a ḓiita muṱali

u ḓo fhirwa na nga tsilu.

₁₃Mubva u ri,

“Afho nḓilani hu na ndau;

mikotoni hu na ḽivhanda ḽi pondaho!”

₁₄Mubva u vhumbuluwa mmbeteni unga vothi ḽi tshi vula

ḽi tshi valela.

₁₅Mubva a longa tshanḓa tshidongoni,

u bvafha na u tshi humisela mulomoni.

₁₆Mubva u vhona unga o ṱalifha

u fhira vhanna vhaṱanu na vhavhili vhane vha fhindula zwavhuḓi.

₁₇A no sokou dzhenelela nndwani i si yawe,

u nga muthu a no ri u vhona mmbwa

i tshi khou ḓifhirela nga nḓila, a i fara nga nḓevhe.

_18-19Muthu a no ri u fhura muṅwe a ri,

“Ndo vha ndi tshi khou swaswa!” u nga mpengo

a no sokou posa misevhe i dugaho, i vhulahaho.

₂₀Ha sa vha na khuni,

mulilo u a dzima;

ha sa vha na zwitshele,

phambano dzi a fhela.

₂₁Muthu wa luambo u vusa nndwa,

u nga muthu a tshi shela malasha masimbeni,

zwi nga u khuṱhedza mulilo.

₂₂Maipfi a zwitshele a nga kugaku kwa u ḓifha;

a tsela ngomu-ngomu thumbuni.

₂₃Muthu wa nyambo yavhuḓi a re na mbilu mmbi,

u nga khali ya gamba yo fhomiwaho nga phomo i penyaho unga ngilasi.

₂₄Muthu wa vengo

u a ḓikhakhisa nga nyambo yawe;

mbiluni yawe hone o dzumba vhufhura.

₂₅Nangwe haṋwani hawe hu tshi ḓifha

u songo mu tenda;

mbilu yawe yo ḓala zwi nengisaho.

₂₆Vhuvhi hawe vhu nga ḓi vha ho dzumbama nga vhuhwavho;

vhu ḓo vhuya ha dzumbululwa ha vhonwa nga vhoṱhe.

₂₇Khunḓa i ḓo fasha muvei;

tombo ḽi ḓo zhaka mukungulusi.

₂₈Lulimi lwa mazwifhi lu vhenga mubaiwa;

muhoi ndi mulozwi.