MIRERO 24

₁U songo tama vhutshilo ha vhavhi,

u songo konana navho.

₂Mbilu dzavho dzi luka vhunwa,

vha amba zwa u levha fhedzi.

₃Vhuṱali vhu fhaṱa nnḓu,

ṱhalukanyo ya i khwaṱhisa,

₄nḓivho yone ya i ḓadza,

ya ḓala zwo nakaho zwi sa sokou wanala.

₅Muṱali u na maanḓa mahulu;

nḓivho yawe i engedza nungo dzawe.

₆Zwenezwo u tshi bva pfumo,

ranga u ṱoḓa nyeletshedzo;

u tshi ḓo kunda,

u ṱoḓa vhaeletshedzi vhanzhi.

₇Vhuṱali tsilu ḽi nga si vhu hovhelele,

khoroni ha na tshine a amba.

₈Ane a ṱolou luka vhunwa u ḓo fhedza nga u pfi mulukavhunwa.

₉Zwine vhutsilu ha tanda ndi vhutshinyi fhedzi;

munyefuli u vhengwa nga vhathu vhoṱhe.

₁₀Wa timatima musi wa khombo,

nungo dzau dzi a fhungudzea.

₁₁Lamukisa

vha no khou khwikhwidzelwa lufuni;

humisa vha no khou pepeleka vha tshi yo vhulawa nandi!

₁₂Arali wa ri, “Huno izwo ro vha ri sa zwi ḓivhi,”

kani ane a sedza mbilu ha zwi vhoni?

A no londola vhutshilo hau ha zwi ḓivhi kani?

Ha nga pfufhi muṅwe na muṅwe a tshi tevhedza zwe a ita naa?

₁₃Ṅwananga, iḽa ṋotshi,

ndi dzavhuḓi,

mutoli u a ḓifha.

₁₄Ḓivha uri na vhuṱali vhu a u ḓifhela;

wa vhu wana,

zwa matshelo zwi ḓo u nakela,

zwe wa zwi lavhelela a u nga kundwi u zwi wana.

₁₅U songo nga muvhi wa lalela nnḓu ya a thetshelesaho Mudzimu;

u songo ṱangula muḓi wawe;

₁₆nangwe a wa kaṱanu-na-kavhili,

u ḓo dovha a vuwa;

vhavhi vhone vha ḓo wa vha si tsha vuwa.

₁₇Swina ḽau ḽa wa,

u songo ri, “Koṱo!”

A khukhulwa u songo fhululedza,

₁₈Muṋe washu a sa ḓo ri u zwi vhona a u sola,

a vho ḓo litsha u mu sinyutshela.

₁₉U songo dinalea nga ṅwambo wa vhaitazwivhi,

u songo tama vhutshilo ha vhavhi;

₂₀muvhi zwa matshelo ha nga zwi vhoni;

a no nyadza Mudzimu, luvhone lwawe lu ḓo dziṅwa.

₂₁Ṅwananga,

ofha Muṋe washu na khosi,

u songo konana na mavhanga;

₂₂vhone vha ḓo lovha kathihi fhedzi:

ndi nnyi a no ḓivha

uri Mudzimu na khosi vha ḓo vha lozwa hani?

₂₃Vhaṱali vho dovha vha ri:

U haṱula nga tshiṱalula a si zwavhuḓi;

₂₄ane a vhuya a vhudza a re na mulandu, a ri,

“A u na mulandu” –

u ḓo teketelwa nga vhathu vhoṱhe,

a vhengwa nga dzitshakha;

₂₅hone vhane muthu o khakha vha mu vhona mulandu,

zwi ḓo vha nakela,

vha ḓo vha na mashudu manzhi.

₂₆A no fhindula zwa ngoho ndi khonani yone-yone.

₂₇Ranga u fhedza mishumo yau,

u lime masimu au,

u konou fhaṱa nnḓu.

₂₈U songo ṋea vhuṱanzi vhune ha laṱa a si na mulandu,

kana ha u piringanya mafhungo.

₂₉U songo ri,

“Ndi ḓo mu ita zwe a nnyita,

ndi ḓo mu lifhedza zwe a ita.”

₃₀Ndo vhuya nda tshimbila,

nda fhira nga tsimuni ya mubva,

tsimuni ya minḓirivhe ya munna a si na ṱhalukanyo,

₃₁nda wana yo mela mipfa hoṱhe-hoṱhe,

mavu a sa vhonali nga tsheṋe,

mutsheṱo wo wa,

₃₂nda ri u zwi sedza nda elekanya,

nda wana pfunzo kha zwe nda vhona:

₃₃Khofhenyana nandi!

Ndi tou zhambu kathihi!

Ndi ḓikuvhatedze ndi awelenyana!

₃₄Ndi hone vhushai vhu tshi ḓo u zhongondedza

unga ḽivemu ḽi na thonga,

u shaya ha u ḓela unga muhali o kungela zwihali.