MIRERO 23

₁Arali u tshi ḽa na muvhusi, ḓivha uri u na nnyi.

₂Arali u khusha, ḓidzime;

₃u songo tamesa madzanga awe,

a nga vha e mureo.

₄U songo ḓinetisa u tshi ṱoḓa u pfuma;

ivha na vhuṱali, zwi litshe;

₅u tshi tou maṱo hasha kha lupfumo,

lu ḓo vha lwo fhalala;

a lu lengi u fhufha, lu nga goni ḽi tshi fhufhela makoleni.

₆U songo yo ḽa zwiḽiwa zwa muthu wa vhutshivha,

u songo tama madzanga awe;

₇ene u dzula a tshi khou elekanya

mutengo wazwo.

U ri, “Iḽa u nwe!”

ngeno mbilu yawe i sa u takaleli.

₈U ḓo ṱanza zwigaku zwe wa zwi ḽa,

wa vha wo tshinya maipfi au avhuḓi.

₉U songo amba u tshi pfiwa nga tsilu,

ḽi sa ḓo nyadza vhuṱali ha maipfi au.

₁₀U songo sudzulusa mikano ya kale,

kana wa dzhena tsimuni ya tsiwana;

₁₁Mulamuleli wavho u na maanḓa,

u ḓo vha sengela mulandu ha kundwa iwe.

₁₂U tshi laiwa u kolongonye nḓevhe,

u thetshelese maipfi a nḓivho.

₁₃U songo litsha u laya ṅwana wau;

u mu rwa nga ṱhamu a si u mu vhulaha.

₁₄Mu laṱise nga ṱhamu,

ndi hone wo mu tshidza lufuni.

₁₅Ṅwananga, arali wa ṱalifha,

na nṋe mbilu yanga i ḓo takala.

₁₆Ndi ḓo takala hani

u tshi vho kona u amba zwi re zwone!

₁₇Mbilu yau i songo emula zwa vhatshinyi,

tshau nga hu vhe u ofha Muṋe washu,

₁₈ndi hone zwa matshelo zwi tshi ḓo u nakela,

zwe wa zwi lavhelela u nga si kundwe u zwi wana.

₁₉Ṅwananga, thetshelesa u ṱalifhe,

mbilu yau i si pambuwe nḓilani ya ngoho.

₂₀U songo ḓowelana na vha no nwesa waini,

na phangwa dzi ḽesaho ṋama.

₂₁Zwidakwa na phangwa vha ḓo vha vhashai,

vhudakwa vhu ambadza muthu madzanganda.

₂₂Thetshelesa khotsi au, vho u beba,

mme au vhó no kegula u songo vha nyadza.

₂₃Renga ngoho,

u songo tsha i rengisa;

renga vhuṱali, na ndayo, na ṱhalukanyo.

₂₄Khotsi a a no thetshelesa Mudzimu u a pembela;

o bebaho ṅwana wa vhuṱali u a takala.

₂₅Iwe takadza khotsi au na mme au,

mme au vho u bebaho vha pembele.

₂₆Ṅwananga, mphe mbilu yau,

takalela u kanda vhuṱalani hanga.

₂₇Musadzi wa phombwe ndi khunḓa,

musadzi a si wau ndi mulindi musekene.

₂₈U u lalela unga ḽivemu,

a andisa vhanna vha sa fulufhedzei.

₂₉A no ṱolou ṱavha mukosi ndi nnyi?

A re na tshigomelo ndi nnyi?

A na muvhango ndi nnyi?

A no ḽa mbilu ndi nnyi?

A na philipise ndi nnyi?

A na maṱo o tswukaho ndi nnyi?

₃₀Ndi vhane vha lala vha tshi nwa;

ndi vhane vha enda vha tshi thetshela waini yo vangiwaho.

₃₁U songo ṱalela waini yo tswuka,

i tshi khou fhufhuma tshinweloni,

i tshi tsa zwavhuḓi!

₃₂I fhedza nga u luma unga ṋowa,

i na vhuṱungu vhu no nga ha vuluvulu.

₃₃Maṱo au a ḓo vhona zwi siho,

wa elekanya zwi sa ḓivhalei.

₃₄U ḓo nga muthu o lalaho vhukati ha lwanzhe,

wa nga wo lala nṱha ha seila ya tshikepe,

₃₅wa ri, “Vho nthwa ndi si huvhale,

vho nndikita nda si zwi pfe!

Ndi ḓo vuwa lini nda dovha nda nwa?”