MIRERO 21

₁Mbilu ya khosi

i tshanḓani tsha Muṋe washu,

u i livhisa hune a funa unga mulonga wa maḓi.

₂Muthu u vhona nḓila dzawe dzoṱhe dzi dzone;

Muṋe washu Ene u sedza mbilu.

₃U ita zwi re zwone u si na vhufhura,

zwi takadza Muṋe washu u fhira zwiṱhavhelo.

₄Maṱo a u ṱonga, mbilu ya u ḓihudza –

u linga u khakhulula muvhi a zwi farisi tshithu.

₅Zwine mushumi wa biko a humbula zwi a mu pfumisa;

ṱhavhanyedza i ḓisa vhushai.

₆U pfuma nga lulimi lwa vhufhura ndi khuli i fhufhaho;

a no ralo u ḓiṱoḓela lufu.

₇Vhuvemu ha vhavhi vhu ḓo vha kumba

nga u hana u ita zwi re zwone.

₈Nḓila ya vha re na mulandu ndi ya magombikwa;

maitele a vha si na mulandu o tou tswititi.

₉Ndi khwiṋe u dzula ṱhangani ya nnḓu,

u fhira u dzula nḓuni na musadzi wa luambo.

₁₀Mbilu ya muvhi i swela u ita vhuvhi,

ha khathutsheli muthu.

₁₁Hu tshi lifhiswa munyefuli a si na nzhele u wana vhuṱali;

muṱali a tshi laiwa u kuvhanganya nḓivho.

₁₂Mudzimu Ene a sa khakhi u ḓivha zwi re nḓuni ya muvhi;

vhavhi u ḓo vha lozwa.

₁₃Wa ḓidzingisa nḓevhe mushai a tshi lila,

na tshau tshililo tshi nga si pfiwe.

₁₄Tshifhiwa tsha tshiphirini tshi dzikisa mbiti;

tshanḓanguvhoni tshi gomadza vhuhali.

₁₅Ha vha na khaṱhulo mbuya vha no thetshelesa Mudzimu vha a takala;

vhaitazwivhi vhone vha a ofha.

₁₆A no pambuwa nḓilani ya ṱhalukanyo

u ḓo yo awela na vhafu.

₁₇A no funesa miḓifho u ḓo shaya;

ane a funesa waini na mapfura a nga si pfume.

₁₈Muvhi u a fa, a vha tshipfumelo tsha a thetshelesaho Mudzimu;

a sa fulufhedzei a vha tshipfumelo tsha a si na vhufhura.

₁₉Ndi khwiṋe u ḓidzulela phangani u fhira u dzula na musadzi

wa luambo, wa mbiti.

₂₀Nḓuni ya muṱali ho khokhwa zwiḽiwa zwavhuḓi na mapfura;

tsilu ḽi holela mulomoni.

₂₁Wa vha na vhuthu na lufuno,

u ḓo lalama, wa itelwa vhuthu, wa huliswa.

₂₂Muṱali u kona u dia muḓi wa vhahali,

a thutha vhushavhelo he vha vhu fulufhela.

₂₃A no linda mulomo wawe na lulimi ha weli khomboni.

₂₄Mudzia-u-ḓihudza wa luswetho ndi munyefuli;

ha ḓiḓivhi zwone.

₂₅Zwine mubva a zwi lilela zwi ḓo mu lozwa,

hufha zwanḓa zwawe zwi tshi hana u shuma.

₂₆Ḓuvha ḽoṱhe u ṱwa a tshi elekanya zwine a fanela u zwi wana,

ngeno a no thetshelesa Mudzimu e mapakulile.

₂₇Tshiṱhavhelo tsha muvhi tshi a nengisa,

zwihulu arali tshi tshi ṋekedzwa nga muhoyo.

₂₈Ṱhanzhi ya mazwifhi i ḓo dzhenwa haṋwani;

i no fulufhedzea i ḓo amba ya fhedza.

₂₉A si na vhufhura u na tshileme;

muvhi u tou ḓiita wa tshileme.

₃₀Naho wo ṱalifha hani,

u na ṱhalukanyo ngafhani,

na maano áu, Muṋe washu u nga si mu kone.

₃₁Bere i nga ḓi lugiselwa musi wa mmbi,

hone gundo ḽi bva ha Muṋe washu.