MIRERO 17

₁Ndi khwiṋe u tshi ḓiḽela zwau makoko wó rudza mbilu,

u fhira u ḽa mapfura u tshi dzula nga u ḽa mbilu.

₂Phuli i shumaho nga maano i ḓo sala i tshi vhusa ṅwana wa muṋe wayo a no ita zwi shonisaho,

ya kovhekana ifa na vhana vha musadzi.

₃Siliva i bviswa manyelo nga khali ya tsimbi,

tsha musuku ndi ṋanḓo,

hone mbilu i lingwa nga Muṋe washu.

₄Muitazwivhi u takalela milomo mivhi;

mudzia-u-zwifha u thetshelesa lulimi lwa vhunwa.

₅A seaho vhashai u nyadza Muvhumbi wavho;

nyadzawelavhaṅwe-wa-sea,

matshelo dzi ḓo u wela-vho.

₆Tshiala tsha vho no vhaho vha maḓuvha

ndi vhana vha vhana vhavho;

vhugala ha vhana ndi vhokhotsi avho.

₇A zwo ngo tea tsilu ḽi tshi ḓihudza nga nyambo yaḽo,

hone zwa vho tou ṋaṋa muvhusi a tshi zwifha.

₈A no ita tshanḓanguvhoni u vhona zwi tshi nga ndalama;

hoṱhe hune a ya zwi a mu nakela.

₉A no kanda mupfa a tshi u vhona u lwela pfano;

a no vusulusa mafhungo u luṱanya dzikhonani.

₁₀Wa vhusedzi a kaidzwa zwi mu dzhena mbiluni

u fhira tsilu ḽi tshi rwiwa ṱhamu dza ḓana.

₁₁Muvhi tshawe ndi u sokou vhanga;

u ḓo ṱangana na muḓinḓa wa tshiṱuhu.

₁₂Tsilu ḽí kha zwa vhutsilu haḽo

ḽi ofhisa u fhira ndau yo dzhielwaho ndawana.

₁₃A no lifhedza zwivhuya nga zwivhi,

khombo a i nga humeli nnḓu yawe.

₁₄U vusa khakhathi zwi nga mulambo u tshi kumba tshipata;

kaṱudza tsemano i sa athu hulela.

₁₅U vhofholola a re na mulandu tsengoni,

na u vhofha a si na mulandu,

zwoṱhe vhuvhili hazwo zwi nengisa Muṋe washu.

₁₆Tsilu ḽi nga bviselani mutengo wa u renga vhuṱali,

ngeno ṱhalukanyo ḽi si na.

₁₇Khonani i dzula i na lufuno misi yoṱhe;

ṅwana wa mme anga o bebelwa

u kovhekana khombo na nṋe.

₁₈Muthu a si na ṱhalukanyo ú ḓivhofha u lifhela muṅwe mulandu une a nga u ita.

₁₉Ane a funa u khakha u funa khakhathi;

mulanda ane a ḓifhaṱela khoro u ḓiṱoḓela ndozwo.

₂₀Muthu wa vhukwila a zwi mu nakeli;

wa lulimi lwo bvaho nḓilani u ḓo welwa nga khombo.

₂₁Ṅwana wa tsilu u ḽisa khotsi awe mbilu;

khotsi a danana a vha na dakalo.

₂₂Mbilu yo takalaho ndi mushonga wavhuḓi;

yo ṱungufhalaho i kula nungo.

₂₃A no ṱanganedza tshanḓanguvhoni ndi muvhi;

u piringanya khaṱhulo.

₂₄Muthu wa ṱhalukanyo u dzula o sedza vhuṱali;

maṱo a tsilu a dzula o sedza mugumoni wa shango.

₂₅Ṅwana wa tsilu u ḽisa khotsi awe mbilu,

muṱodzi wa mme awe u dzula u shamani.

₂₆U lifhisa a si na mulandu a si zwavhuḓi;

zwi ḓi nga u rwa muhulwane u tshi mu rwela

u fulufhedzea hawe.

₂₇Ane a midza maipfi awe u na nḓivho;

a re na muya wo dzikaho u na ṱhalukanyo.

₂₈Na tsilu ḽi vhonala ḽo ṱalifha arali ḽo fhumula;

a sa ambi u pfi u na vhusedzi.