MARKOSI 10

₁Ndi hone Yesu a tshi ṱuwa afho fhethu a ya shangoni ḽa Judia, a wela mulambo wa Jorodani; ha dovha ha ḓa magogo khae, Ene a ḓi vha funza sa misi.

₂Vhaṅwe Vhafarisei vha mu ḓela vha tshi ri vha a mu fasha vha ri, “Kha vha dzou ri vhudza: Mulayo wa hashu u a tenda munna a tshi ṱala musadzi wawe naa?” ₃Yesu a vha fhindula a ri, “Mulayo wa Mushe u ri mini?” ₄Vhone vha fhindula vha ri, “Mushe o ri tendela uri munna a nga ṅwala luṅwalo lwa u ṱala musadzi wawe a konou litshana nae a ṱuwa.” ₅Yesu a amba navho a ri, “Mushe a tshi vhuya a ni vhetshela hoyu mulayo, ndi nge a vhona no oma ṱhoho, ₆hone u rangani ha zwithu, misi iḽa Mudzimu a tshi sika zwoṱhe, ho pfi, ‘Mudzimu o vha ita vhe munna na musadzi.’ ₇Ndi zwine munna a ḓo ṱutshela khotsi na mme a vhofhekana na musadzi wawe, ₈vhuvhili havho vha vha ṋama nthihi. Ngauralo a vha tshee vhavhili, vho no vha ṋama nthihi. ₉Zwino zwo vhofhekanywaho nga Mudzimu, muthu a songo zwi fhandekanya.”

₁₀Musi vha tshi humela nḓuni vhafunziwa vha vhudzisa Yesu nga ayo mafhungo a u ṱalana. ₁₁A vha fhindula a ri, “Munna ane a ṱala musadzi a dzea muṅwe, u khakhela musadzi wawe nga vhupombwe; ₁₂na kha musadzi zwo ralo; arali a ṱala munna wawe a dzewa nga muṅwe o ita vhupombwe.”

₁₃Vhaṅwe vhathu vha ḓisa vhana ha Yesu uri a vha vhee zwanḓa, hone vhafunziwa vha vha kaidza. ₁₄Yesu a tshi zwi vhona a dinalea, a vhudza vhafunziwa vhawe a ri, “Litshani vhana vha ḓe kha Nṋe. Ni songo vha dzivhisa, ngauri vhane vha ḓo dzhena muvhusoni wa Mudzimu ndi vha no nga vhenevha. ₁₅Zwino ipfani-ha: Ane a si tende u vhusiwa nga Mudzimu sa ṅwana, ha nga dzheni muvhusoni wawe na kathihi.” ₁₆A mbo ḓi kuvhatedza avho vhana, a vha vhea zwanḓa a vha shudufhadza.

₁₇Yesu a kha ḓi ri u a dovha u dzhena nḓilani ha mbo bvelela muṅwe munna a tshi khou gidima, a ḓa a wa nga magona phanḓa hawe a humbela a ri, “Nandi mufunzi muvhuya, uri ndi wane vhutshilo vhu sa gumi ndi fanela u ita mini?” ₁₈Yesu a mu fhindula a ri, “Khezwi ni tshi nnyita muvhuya? A hu na muthu a re muvhuya; muvhuya ndi Mudzimu e eṱhe.” ₁₉A konou ri, “Zwino milayo ya u ri, ‘U songo vhulaha muthu; u songo ita vhupombwe; u songo tswa; u songo zwifhelela muṅwe; u songo fhura; u fanela u hulisa khotsi au na mme au’ hufha ni tshi i ḓivha!” ₂₀Uyo munna a ri, “Vhafunzi, milayo iyo yoṱhe ndo i tevhedza, u bva hanani hanga.” ₂₁Yesu a mu takalela, a mu lavhelesa a ri, “Ho tou sala tshithu tshithihi fhedzi tshine na fanela u tshi ita: tshimbilani ni yo rengisa zwoṱhe zwine na vha nazwo, tshelede ni kovhele vhashai; lwaṋu lupfumo ni ḓo lu wana ṱaḓulu. Nó no ita zwenezwo ni ḓe ni vhe mufunziwa wanga.” ₂₂Uyo munna a tshi pfa izwo a kunamisa tshifhaṱuwo a ṱuwa o ṱungufhala, ngauri o vha o pfuma nga maanḓa.

₂₃Yesu a lavhelesa vhafunziwa vhawe, a konou amba navho a ri, “Zwi konḓa hani uri mupfumi a dzhene muvhusoni wa Mudzimu!” ₂₄Vhafunziwa haya maipfi a vha kanukisa, hone Yesu a dovha a ri, “Vhananga, zwi konḓa hani u dzhena muvhusoni wa Mudzimu! ₂₅Muthu o pfumaho, u dzhena muvhusoni wa Mudzimu zwi mu konḓela u fhira musi gamela i tshi edzisa u fhira nga buli ḽa ṋeleṱe.” ₂₆A tshi ralo vhafunziwa vhawe vha tou ṋaṋa u akhamala, vha vho vhudzisana nga tshavho vha ri, “Zwino hu nga kha ḓi tshidzwa nnyi?” ₂₇Yesu a vha lavhelesa a vha fhindula a ri, “Hezwi vhathu zwi a vha kunda, fhedzi kha Mudzimu ndi zwiṱuku, Ene u kona zwoṱhe.”

₂₈Ndi hone Pitrosi a tshi amba a ri, “Kha vha dzou vhona riṋe: ro ṱutshela zwoṱhe ra vha vhafunziwa vhavho.”

₂₉Yesu a ri, “Izwo ndi zwone, zwino ipfani-ha: Ane a ṱutshela nnḓu yawe kana vhakomana vhawe kana khaladzi dzawe kana mme awe kana khotsi awe kana vhana vhawe kana masimu awe a tshi itela Nṋe na mafhungo maḓifha, ₃₀u ḓo wana zwinzhi tshifhinga tshi tshee tshenetshi: u ḓo fhiwa nnḓu na vhakomana na khaladzi na vhomme na vhana na masimu kaḓana, naho a tshi ḓo vha a tshi khou tovholwa, huno nga tshifhinga tshi ḓaho u ḓo wana vhutshilo vhu sa gumi. ₃₁Hone vhanzhi vhane ṋamusi vha vha vhahulwane vha vho ḓo vha vhone vhaṱuku; vhane vha vha vhaṱuku vha ḓo vha vhone vhahulwane.”

₃₂Vho vha vhe nḓilani vho livha Jerusalema, Yesu e phanḓa, vhafunziwa vhó tshenuwa, na vho salaho murahu vhó farwa nga nyofho. Ndi hone Yesu a tshi dovha a vhidzela vha 12 thungo, a vha vhudza zwine zwa ḓo mu wela. ₃₃A ri, “Vhonani, ri khou gonya Jerusalema. Henengei Mubebwa-nga-muthu u ḓo kumedzwa vhotshifhe vhahulwane na vhaḓivhi vha Mulayo. Vha ḓo mu haṱulela lufu vha konou mu kumedza vhatsinda. ₃₄Vhenevho vha ḓo tamba ngae vha mu pfela mare vha mu rwa nga mboma vha fhedza nga u mu vhulaha. Hone nga ḓuvha ḽa vhuraru u ḓo vuwa vhafuni.”

₃₅Ndi hone Jakopo na Johanisi vhana vha Zebedia vha tshi ḓa ha Yesu vha ri, “Vhafunzi, ri khou humbela.” ₃₆Yesu a vha vhudzisa a ri, “Ni ṱoḓa mini?” ₃₇Vhone vha tshi fhindula vha ri, “Musi vha tshi ḓo dzula kha khuluṋoni yavho ya vhugala, ri tama uri vha ri tendele u dzula navho, muṅwe a dzule thungo ya tshauḽa muṅwe thungo ya tshamonde.” ₃₈Yesu a ri, “A ni tsha ḓivha na tshine na humbela. Tshinwelo tsha maṱhupho tshine Nṋe nda ḓo nwa inwi ni nga kona u tshi nwa naa? Ndovhedzo ya dambudzo ine nda ḓo lovhedzwa ngayo inwi ni nga kona u lovhedzwa-vho ngayo naa?” ₃₉Vhone vha fhindula vha ri, “Hezwo ri nga kona u zwi ita.” Yesu a konou ri, “Nangoho tshinwelo tshine Nṋe nda ḓo nwa na inwi ni ḓo tshi nwa-vho, nahone ni ḓo lovhedzwa-vho nga ndovhedzo ine Nṋe nda ḓo lovhedzwa ngayo. ₄₀Hone uri hu ḓo dzula nnyi thungo ya tshauḽa kana tshamonde tshanga, a zwi langiwi nga Nṋe, hu ḓo dzula avho vhe Mudzimu a vha lugisela.”

₄₁Vhaḽa vhaṅwe vhafunziwa vha fumi vha tshi zwi pfa vha sinyutshela Jakopo na Johanisi. ₄₂Ndi hone Yesu a tshi vha kuvhanganya a ri, “Ni zwi ḓivha zwavhuḓi uri kha dzitshakha vhane vha pfi vhavhusi vha dzi langa nga tshiṱuhu, vhahulwane vhadzo vha ṱongisa maanḓa avho. ₄₃Hone kha inwi a zwo ngo ralo. Ane a funa vhuhulwane, nga a vhe ene a shumelaho vhaṅwe; ₄₄ane a funa u vha wa phanḓa, nga a ḓiite phuli yaṋu noṱhe. ₄₅Na Mubebwa-nga-muthu ho ngo ḓa u shumelwa; o ḓa u shumela vhaṅwe na u fa uri a vhe tshipfumelo tsha u vhofholola vhanzhi.”

₄₆Yesu a swika Jerikho na vhafunziwa vhawe. Musi vha tshi vho ṱuwa vhe na gogo ḽihulu, vha wana bofu ḽi no pfi Bartimiosi ṅwana wa Timiosi, o dzula tsini ha nḓila a tshi khou humbela zwifhiwa. ₄₇A tshi tou pfa uri a no khou fhira ndi Yesu wa Nazaretha, a thoma u ṱavha mukosi a ri, “Yesu Murwa wa Dafita, a thi khathutshelwi-vho naa?” ₄₈Vhanzhi vha mu kaidza vha ri a fhumule, ha tou vha uri a ṋaṋe u ṱavha mukosi a ri, “Murwa wa Dafita, a thi khathutshelwi-vho naa?” ₄₉Yesu a ima a ri, “Mu vhidzeni.” Ndi hone vha tshi vho vhidza uyo munna wa bofu vha ri, “Kha vha rudze mbilu vha takuwe, vha khou vha vhidza.” ₅₀Uyo munna a posa dzhasi ḽawe kule, a thamuwa a ya ha Yesu. ₅₁Yesu a mu vhudzisa a ri, “Ni lila ngani?” Uyo munna wa bofu a fhindula a ri, “Vhafunzi, ndi lila uri ndi vhone.” ₅₂Yesu a mu vhudza a ri, “Tshimbilani zwaṋu, fulufhelo ḽaṋu ḽo ni fhodza.” A mbo ḓi vhona na zwenezwo; a ṱuwa na Yesu.