MATIOSI 8

₁Yesu a tshi tsa thavha a tevhelwa nga vhathu vhanzhi-vhanzhi. ₂Ha ḓa munna a lwalaho vhulwadze ha lukanda vhu no kumadza muthu, a gwadamela Yesu a ri, “Muṋe wanga, hufha vhe na maanḓa a u mphodza; a thi fhodzwi-vho?” ₃Yesu a isa tshanḓa tshawe a mu kwama a ri, “Nazwino fholani zwaṋu.” A mbo ḓi fhola na zwenezwo. ₄Yesu a amba nae a ri, “Ni songo vhuya na zwi vhudza muthu; ni mbo ḓi ya ha tshifhe uri a ni vhone, ni konou ṋekedza nduvho yo laedzwaho nga Mushe, uri vhu vhe vhuṱanzi ha u vha rovhedza.”

₅Musi Yesu a tshi swika Kapernaumi ha ḓa mulangagomane, onoyo a mu kwengweledza ₆a ri, “Muṋe wanga, ndi na mushumi hayani a no khou lwala o no koḓea na miraḓo; u khou tou shengela.” ₇Yesu a ri, “Ndi zwone, ndi ḓo ṱuwa na inwi nda mu fhodza.” ₈Mulangagomane a fhindula a ri, “Muṋe wanga, a tho ngo vhuya nda fanela na u vha swielela nḓuni yanga; kha vha tou amba ipfi ḽithihi fhedzi mushumi wanga a konou fhola. ₉Ndi amba ngauri na nṋe ndi fhano ndi muthu a langwaho, hone ndi ḓi vha-vho na maswole a re fhasi hanga ane nda a langa. Nda vhudza uno nda ri, ‘Ṱuwa!’ u a ṱuwa; nda vhudza uḽa nda ri, ‘Iḓa!’ u a ḓa; phuli yanga nda i vhudza nda ri, ‘Ita hetshi!’ i a tshi ita.” ₁₀Yesu a tshi pfa zwenezwo a kanuka a amba na vhathu vha khou mu tevhelaho a ri, “Zwino ipfani-ha: na Muisraele a thi athu ṱangana nae a re na fulufhelo ḽingafha. ₁₁Ndi zwine nda ri hu ḓo ḓa vhanzhi vha tshi bva thungo dza vhubvaḓuvha na vhukovhela, vha dzula munyanyani muvhusoni wa Mudzimu na Abrahamu na Isaka na Jakopo, ₁₂vhaḽa vhe muvhuso wa thoma u ḓela vhone, vha laṱwa nnḓa swiswini hune vha ḓo tshema vha ita na u shenganya maṋo nga u pfa vhuṱungu.”

₁₃Ndi hone Yesu a tshi amba na uyo mulangagomane a ri, “Kha vha ṱuwe zwavho; nga zwi itee nga he vha fulufhela.” Mushumi a mbo ḓi fhola nga tshifhinga tshenetsho.

₁₄Musi Yesu a tshi swika hayani ha Pitrosi a wana makhulutshisadzi wawe vhe thovhoni, muvhili u tshi tou duga woṱhe. ₁₅A vha fara nga tshanḓa vha mbo ḓi fhola, vha konou vuwa vha mu bikela.

₁₆Ḓuvha ḽi tshi vho kovhela vha mu ḓisela vhathu vhanzhi vhe vha vha vhe na thuṅwa dza Saṱhane, a dzi pandela nga u tou amba ipfi fhedzi, a fhodza na vhoṱhe vhe vha vha vha khou lwala. ₁₇O zwi ita uri hu khunyelele ḽo ambiwaho nga muporofita Yesaya a tshi ri,

₁₈Yesu a tshi vhona mavhuthu o mu tangaho a vhudza vhafunziwa vhawe uri vha wetshele seli na luḽa lwa dzivha. ₁₉Ndi hone muṅwe muḓivhi wa Mulayo a tshi ḓa khae a ri, “Vhafunzi, nṋe ndi ḓo vha tevhela hoṱhe hune vha ya.” ₂₀Yesu a mu fhindula a ri, “Phunguhwe dzi na milindi, na zwiṋoni zwi na zwiṱaha; a nga vha Mubebwa-nga-muthu ha na ha u siamedza ṱhoho a lala.”

₂₁Muṅwe-vho we a vha e mufunziwa wawe a amba nae a ri, “Kha vha litshe ndi range u swiṱa khotsi anga.” ₂₂Hone Yesu a mu fhindula a ri, “Inwi ni mbo ḓi ḓa zwino ni vhe mufunziwa wanga, ni litshe vhafu vha swiṱane nga tshavho.”

₂₃Yesu a dzhena tshikepeni, vhafunziwa vhawe vha mu tevhela. ₂₄Ha mbo vuwa ḓumbu ḽihulu dzivhani, lwe tshikepe tsha ṱoḓou tibedzwa nga magabelo. Huno Yesu o vha o eḓela. ₂₅Vhafunziwa vha ḓa khae vha mu vusa vha ri, “Muṋe washu, ndi hone ro lovha! Kha vha ri tshidze!” ₂₆Ene a vha fhindula a ri, “Ni khou ofhani, inwi ni re na fulufhelo ḽiṱuku?” Ndi hone a tshi vuwa, a kaidza maḓumbu na lwanzhe, zwa mbo ḓi dzika, ha tou dzokoto. ₂₇Vhathu vha tshi zwi vhona vha kanuka vha ri, “Nṋa ndi muthu-ḓe uyu ane a ri u kaidza maḓumbu na magabelo zwa mu thetshelesa?”

₂₈Vha tshi dovha u wetshela seli, shangoni ḽa Vhagadara, Yesu a ṱangana na vhanna vhavhili vha na thuṅwa dza Saṱhane vha tshi khou bva zwaloni, vha tshi ofhisa lwe ha sa vhe na muthu ane a nga kona u fhira nga heyo nḓila. ₂₉Vhenevho vha ṱavha mukosi vha ri, “Iwe Murwa wa Mudzimu, u ṱoḓani kha riṋe? Kani-ha wo ḓa fhano u ri shengedza tshifhinga tshi sa athu swika?” ₃₀Zwino nga ngei thungo ho vha hu na sambi ḽihulu ḽa nguluvhe dzi tshi khou fundudza-fundudza. ₃₁Thuṅwa dza humbela Yesu dza ri, “Arali u tshi ri thatha kha ri ruṅwe zwashu henefho sambini ḽa nguluvhe.” ₃₂A dzi tendela a ri, “Iyani.” Dza mbo ḓi bva kha vhaḽa vhanna dza dzhena nguluvheni; zwi tshi ralo sambi ḽoṱhe ḽa mbo ḓi gidimela luwani dza wela dzivhani ha vha u nwela khothe. ₃₃Vhalisa vhadzo vha shavhela muḓini, vha anḓadza zwoṱhe zwe zwa itea na zwa vhaḽa vhe vha vha vhe na thuṅwa. ₃₄Ndi hone muḓi woṱhe u tshi bva vha ya ha Yesu, vha tshi ṱangana nae vha mu rabeledza uri a ṱuwe shangoni ḽavho.