MATIOSI 28

₁Musi Sabatha yo fhela, ḽi tshi tou tsha nga Swondaha, ha ḓa Maria Magadalina na uḽa muṅwe Maria u ṱolela tshalo. ₂Ha tsa muruṅwa wa Muṋe washu a bva ṱaḓulu, ha mbo vha na mudzinginyo muhulu wa shango, uyo muruṅwa a ḓa a kungulusa ḽiḽa tombo a dzula khaḽo. ₃O vha a tshi penya sa lupenyo, zwiambaro zwawe zwo tshena sa mahaḓa. ₄Vhalindi vha tshalo vha farwa nga nyofho vha tetemela vha tou nga vha sa fa.

₅Muruṅwa a amba na vhasadzi a ri, “Inwi ni songo ofha tshithu; ndi ḓivha uri ni khou ṱoḓa Yesu we a vhambiwa. ₆Ha tsheeho fhano; o vuwa sa zwe a amba. Iḓani ni vhone afho he a vha o ladzwa hone. ₇Gidimani-ha ni yo ḓivhadza vhafunziwa vhawe uri o vuwa vhafuni. Ni ri, ‘Yesu o ni ranga phanḓa, o ya Galelia, ni ḓo ṱangana nae henengei.’ Khezwo no zwi pfa.”

₈Vhasadzi avho vha mbo ḓi ṱuwa tshaloni nga u gidima vhe na nyofho na dakalo fulu; vha gidima vha yo ḓivhadza vhafunziwa vhawe.

₉Vhe nḓilani, vha vhona Yesu o no ima henefho phanḓa havho a vha resha a ri, “Mulalo!” Vha mbo ḓi ya khae vha farelela milenzhe yawe vha mu gwadamela. ₁₀Yesu a vha vhudza a ri, “Ni songo ofha; iyani ni yo ḓivhadza vharathu vhanga uri vha ye Galelia; ri ḓo ṱangana henengei.”

₁₁Avho vhasadzi vha tshee nḓilani vhaṅwe vha vhaḽa vhalindi vha dzhena muḓini vha ḓivhadza vhotshifhe vhahulwane zwoṱhe zwo iteaho. ₁₂Vhotshifhe vha mbo kuvhangana na vhahulwane vha lushaka vha luka vhukwila, vha ṋea maswole tshelede nnzhi ₁₃vha ri, “Ni vhudze vhathu uri vhafunziwa vhawe vho ḓa vhusiku no eḓela vha mu tswa. ₁₄Arali zwa swika kha muvhusi riṋe ri ḓo ni ambela. Inwi ni songo ḽa mbilu.” ₁₅Maswole vha ṱanganedza iḽa tshelede vha amba zwenezwo zwe vha funzedzwa. Majuda na ṋamusi vha kha ḓi vhudzana mafhungo eneo.

₁₆Vhafunziwa vha 11 vha ya Galelia vha swika thavhani iḽa ye Yesu a vha laedza. ₁₇Vha mu wana henefho, vha luvha; hone vhaṅwe vhavho vho vha vha tshi kha ḓi timatima.

₁₈Ndi hone Yesu a tshi sendela a amba navho a ri, “Ndo ṋewa maanḓa oṱhe ngei ṱaḓulu na fhano fhasi. ₁₉Iyani-ha ni ite tshakha dzoṱhe vhafunziwa vhanga. Ni vha lovhedze vha vhe vha Khotsi na Murwa na Muya Mukhethwa. ₂₀Ni vha gudise u tevhedza zwoṱhe zwe nda ni laya. Nṋe muṋe ndi ḓo vha na inwi misi yoṱhe u swika zwi tshi guma.”