MATIOSI 22

₁Yesu a dovha a amba na vhathu nga zwifanyiso, a vha hanelela a ri, ₂“Muvhuso wa Mudzimu u fana na muthu wa khosi o itelaho ṅwana wawe wa mutuka munyanya wa mbingano. ₃A ruma vhaḓinḓa vhawe u yo vhidza vho vhidzwaho, vhone vha landula. ₄A dovha a ruma vhaṅwe vhaḓinḓa a ri, ‘Vhudzani vho vhidzwaho ni ri: Ndo no lugisa munyanya wanga, na dziphulu na mbohwana dzo nonaho ndo no ṱhavha; zwoṱhe zwo dzula zwo luga. Iḓani-ha munyanyani!’ ₅Hone vho vhidzwaho vha si ḓe, muṅwe a ya tsimuni yawe, muṅwe a ya mushumoni wawe. ₆Vhaṅwe vha levhela vhaḓinḓa vhawe vha vha fara vha vha vhulaha. ₇Khosi ya sinyuwa nga maanḓa, ya ruma mmbi dzayo u yo vhulaha dziḽa phondi na u fhisa muḓi wadzo.

₈“Ndi hone khosi i tshi vhudza vhaḓinḓa vhayo ya ri, ‘Munyanya ndo lugisa, vho vhidzwaho vha ro vha vha songo fanelwa. ₉Iyani-ha magondoni ni sokou vhidza muṅwe na muṅwe ane na tshenuwa no ṱangana nae.’ ₁₀Nangoho vhaḽa vhaḓinḓa vha ya dzinḓilani vha vhidza vhoṱhe vhe vha ṱangana navho, vhavhi na vhavhuya, vhoṱhe. Nnḓu ya ḓala vho vhidzwaho munyanyani.

₁₁“Musi khosi i tshi ḓa u sedza vho dzulaho zwiḽiwani a vhona muṅwe munna henefho a songo ambaraho zwiambaro zwa munyanya. ₁₂A mu vhudzisa a ri, ‘Hee, khonani, nṋa zwo ḓa hani ni tshi sokou ḓa fhano munyanyani ni songo ambara zwiambaro zwa munyanya?’ Uḽa a kundwa ḽa u fhindula. ₁₃Ndi hone khosi i tshi vhudza vhashumi vhayo ya ri, ‘Mu vhofheni milenzhe na zwanḓa ni mu pose ngei nnḓa swiswini. Henefho vha ḓo lila, vha ita na u shenganya maṋo nga vhuṱungu.’

₁₄“Ho vhidzwa vhanzhi; ho ro nangiwa vha si gathi.”

₁₅Ndi hone Vhafarisei vha tshi yo ita vhukwila ha u mu fasha arali a tshi nga amba ipfi ḽi songo ḓaho. ₁₆Vha ruma vhaṅwe vha vhafunziwa vhavho khathihi na vhaṅwe vha ḽihoro ḽa Herude. Vhenevho vha mu vhudzisa vha ri, “Vhafunzi, ri a zwi ḓivha uri vhone vha munna a fulufhedzeaho, tshavho ndi u funza nḓila yone-yone ine Mudzimu a funa vhathu vha tshi tshila ngayo; vha tshi amba a vha thomi u sedza uri ndi nnyi, ngauri a vha ṱaluli muthu. ₁₇Zwino vhone vha zwi vhona hani? Nga vha dzou ri vhudza: Nṋa Mulayo washu u a ri tendela ri tshi thela muthelo wa Khisara kana a u ri tendeli?”

₁₈Hone Yesu nga u ḓivha vhukwila havho a amba navho a ri, “Vhadziamuhoyo ndinwi, ni nndingelani? ₁₉Ntsumbedzeni tshelede ine na thela ngayo ndi i vhone.” Ndi hone vha tshi mu sumbedza sheleni. ₂₀A vha vhudzisa a ri, “Nṋa iyi ṱhoho na dzina iḽi ndi zwa nnyi?” ₂₁Vha fhindula vha ri, “Ndi zwa Khisara.” Yesu a ri, “Ahaa, izwo Khisara mu fheni zwi re zwawe; Mudzimu ni mu fhe-vho zwi re zwawe.”

₂₂Vha tshi pfa phindulo yawe vha kanuka, vha mu litsha vha ṱuwa.

₂₃Ḽeneḽo ḓuvha vhaṅwe Vhasadukei vha ḓa ha Yesu (ndi vhaḽa vha no ri u vuwa ha vhafu a huho), vha mu vhudzisa ₂₄vha ri, “Vhafunzi, Mushe o ri arali muthu a tshi fa a si na ṅwana, murathu wawe u fanela a dzhia musadzi wawe uri a bebele mukomana vhana. ₂₅Zwino, hafhano ha hashu ho vha hu na vhaṱhannga vhaṱanu na vhavhili, vhana vha munna. Wa tanzhe a dzea, a vhuya a fa a sa athu vha na ṅwana, a siela murathu musadzi wawe. ₂₆Na onoyo a fa nga u ralo a si na ṅwana, na wa vhuraru zwa ḓi ralo, na a tevhelaho, zwa vhuya zwa ṱanganya vhoṱhe vhuṱanu na vhuvhili havho. ₂₇Ha fhedza nga u fa na uḽa musadzi. ₂₈Zwino musi vhafu vha tshi vuswa, musadzi uyo u ḓo vha wa nnyi kha havha vhaṱanu na vhavhili? Hufha vhoṱhe o vha musadzi wavho?”

₂₉Yesu a vha fhindula a ri, “Nṋa no tou xela tshingafhani, ngauri hu Maṅwalo, hu maanḓa a Mudzimu, a ni a ḓivhi. ₃₀Musi vhafu vha tshi vuswa vha ḓo nga vharuṅwa vha ngei ṱaḓulu; zwa u dzea na u dzewa a zwi nga vhi hone.

₃₁“Kha a u vuswa ha vhafu ndi ri: Nṋa a ni athu vhala fhaḽa hune Mudzimu a ri, ₃₂‘Ndi Nṋe Mudzimu wa Abrahamu, na wa Isaka, na wa Jakopo’? Zwino hufha Mudzimu e si Mudzimu wa vho faho, e Mudzimu wa vha tshilaho.”

₃₃Magogo a tshi pfa pfunzo yawe a akhamala.

₃₄Vhafarisei vha tshi pfa uri Yesu o kunda Vhasadukei, na vhone vha kuvhangana vha mu langana; ₃₅muṅwe wavho we a vha e muḓivhi wa Mulayo a mu vhudzisa mbudziso ya u mu fasha a ri, ₃₆“Yone ndaela khulwane ya Mulayo woṱhe ndi ifhio?”

₃₇Yesu a mu fhindula a ri, “ ‘Funa Muṋe wau Mudzimu nga mbilu yoṱhe, nga zwoṱhe zwine wa vha zwone, nga ṱhalukanyo yau yoṱhe.’ ₃₈Ndi yone ndaela khulwane ya u ranga. ₃₉I tevhelaho ine ya fana nayo khei: ‘Funa muṅwe unga iwe muṋe.’ ₄₀Ndaela idzi mbili dzi katela Mulayo woṱhe na Maṅwalo a vhaporofita.”

₄₁Musi Vhafarisei vho no kuvhangana Yesu a vha vhudzisa mbudziso ₄₂a ri, “Zwa Mesia inwi ni ri mini ngazwo? Ni vhona unga ndi Murwa wa nnyi?” Vha mu fhindula vha ri, “Ndi wa Dafita.” ₄₃Yesu a konou ri, “Hufha Dafita o amba ó ḓala Muya Mukhethwa a ri Mesia ndi Muṋe wawe, zwiḽa a tshi ri,

₄₅“Asizwo-ha: arali Dafita ene muṋe a tshi mu ita Muṋe wawe zwi nga ḓa hani uri Mesia a vhe murwa wawe?”

₄₆A hu na na muthihi we a kona u fhindula Yesu na ipfi na ḽithihi, nahone u bva heḽo ḓuvha a hu tshee na we a edzisa u mu vhudzisa mbudziso.