MATIOSI 18

₁Zwenezwo vhafunziwa vha Yesu vha ḓa khae vha vhudzisa vha ri, “A re muhulwane muvhusoni wa Mudzimu a nga vha e nnyi?” ₂Yesu a vhidza ṅwana muṱuku a mu imisa vhukati havho ₃a ri, “Zwino ipfani-ha: na sa ḓiṱukufhadza na fana na vhana, ni nga si vhuye na dzhena muvhusoni wa Mudzimu. ₄Ndi zwone, ane a ḓiṱukufhadza a fana na uyu ṅwana, ndi ene ane a ḓo vha muhulwane muvhusoni wa Mudzimu. ₅Ane a ṱanganedza ṅwana muthihi a tshi itela Nṋe, u ṱanganedza Nṋe. ₆Ane a khakhisa muṅwe wa havha vhaṱoma vha mpfulufhelaho, ṱhamu yawe i ḓo fhira zwa musi o tou vhofhelelwa zwawe guyo mukuloni a poswa lwanzheni he lwa ita dzivha.

₇“Shango ḽi tambula hani nga zwikhakhisi! Zwikhakhisi zwone zwi fanela u vha hone, fhedzi ane zwa ḓa ngae u ḓo zwi pfa.

₈“Ndi zwine nda ri: arali tshanḓa tshau kana mulenzhe wau u tshi ita uri u furalele Mudzimu, u tumule u u laṱe kule. Ndi khwiṋe u dzhena vhutshiloni u tshihole kana u tshi ṱudza, u fhira u poswa muliloni u sa dzimiwi u na zwanḓa zwivhili na milenzhe mivhili. ₉Arali iṱo ḽau ḽi tshi ita uri u furalele Mudzimu, ḽi nongole u ḽi pose kule. Ndi khwiṋe u dzhena vhutshiloni u na iṱo ḽithihi, u fhira u poswa muliloni wa hele u na maṱo mavhili.

₁₀“Ni vhone ni sa ḓo nyadza muṅwe wa havha vhaṱuku. Ḓivhani uri vharuṅwa vhavho ngei ṱaḓulu vhane vha vha tsireledza vha dzula vhe tsini-tsini na Khotsi anga wa ṱaḓulu.

₁₂“Ni zwi vhona hani? Arali muthu e na nngu dza ḓana, ha xela iṅwe yadzo, ha sii dziḽa dza 99 henefho zwikwarani a yo ṱoḓa iḽa yo xelaho? ₁₃Thetshelesani ndi ni vhudze: a i wana u takalela yone u fhira dziḽa dza 99 dzi songo xelaho. ₁₄Sa zwenezwo Khotsi aṋu wa ṱaḓulu ha funi na muthihi wa havha vhaṱuku a tshi lovha.

₁₅“Arali wa hau a tshi khakha, iya u mu sumbedze vhukhakhi hawe ni vhavhili fhedzi. Arali a tshi u pfa, aiwaa, wo mu tshidza nga u mu vhuedzedza nḓilani. ₁₆Arali a sa pfi, hone-ha u vhuelele u na muṅwe kana vhavhili uri hu vhe na ṱhanzi mbili kana tharu, ipfi ḽiṅwe na ḽiṅwe ḽi vhe na vhuṱanzi ho khwaṱhaho. ₁₇Arali na vhenevho a sa vha pfa u vhudze tshivhidzo. Arali na tshivhidzo a sa tshi pfi, izwo-vho u mu ite sa wannḓa kana muthelisi mudzia-u-ṱangula vhathu. ₁₈Zwino ipfani-ha: zwine na zwi iledza fhano shangoni zwi ḓo vha zwo iledzwa na ngei ṱaḓulu; zwine na zwi tendela fhano shangoni zwi ḓo vha zwo tendelwa na ngei ṱaḓulu.

₁₉“Dovhani ni thetshelese ndi ni vhudze: arali vhavhili vhaṋu vha tshi langana u humbela tshithu kha Mudzimu, vha ḓo fhiwa nga Khotsi anga wa ṱaḓulu; ₂₀ngauri he ha kuvhangana vhavhili kana vhararu nga dzina ḽanga, na Nṋe ndi ḓo vha navho.”

₂₁Ndi hone Pitrosi a tshi ḓa khae a mu vhudzisa a ri, “Muṋe wanga, wa hashu a tshi dzula a tshi nkhakhela ndi nga mu hangwela kangana? Ndi nga mu hangwela nda ita kaṱanu-na-kavhili?” ₂₂Yesu a fhindula a ri, “Nṋe ndi ri u songo mu hangwela kaṱanu-na-kavhili fhedzi, u mu hangwela kaṱanu-na-kavhili fhedzi, u mu hangwele kaṱanu-na-kavhili zwi tshi vhaliwa lwa 70.

₂₃“Ndi zwine nda fanyisedza muvhuso wa Mudzimu nga muthu wa khosi we a ṱoḓa u vhalelana milandu na vhashumi vhawe. ₂₄A tshi thoma u vhala vha mu ḓisela muṅwe we a vha o ḽa mulandu wawe wa dzimilioni nnzhi dza dzirannda. ₂₅A tshi wanala a si na tsha u lifha, muṋe wawe a ri a rengiswe khathihi na musadzi wawe na vhana na thundu dzawe dzoṱhe, a lifhe. ₂₆Mushumi uyo a mbo ḓi gwadama fhasi a luvha a ri, ‘Vha songo mphelela mbilu, ndi ḓo lifha zwoṱhe.’ ₂₇Ndi hone muṋe wawe a tshi mu khathutshela mbilu, a mu hangwela mulandu wawe a mu litsha a ṱuwa.

₂₈“Hone uyo mushumi a tshi bva henefho a mbo ḓi ṱangana na muṅwe mushumi ngae we a mu pamba dziranndanyana; a mbo ḓi mu fara nga mukulo a mu tshipa a ri, ‘Lifha mulandu wanga!’ ₂₉Mushumi uyo a mbo ḓi gwadama fhasi a mu rabeledza a ri, ‘Vha songo mphelela mbilu, ndi ḓo lifha!’ ₃₀Uyo muṅwe a hana, a mbo ṱuwa a mu posa dzhele a vhuye a lifhe mulandu.

₃₁“Vhashumi ngae vha tshi vhona zwo iteaho zwa vha dina zwihulu vha ya ha muṋe wavho vha mu toololela zwoṱhe. ₃₂Khosi ya mbo ḓi vhidzisa uyo mushumi ya mu vhudza ya ri, ‘Mushumi muvhi ndiwe! Hufha nṋe ndo u hangwela mulandu uḽa woṱhe nge wa nthabeledza! ₃₃Nṋa yo vha i si pfanelo naa, iwe u tshi khathutshela-vho mushumi nga iwe unga nṋe ndo u khathutshela?’ ₃₄Ya sinyuwa nga maanḓa ya mu kumedza vhatambudzi uri vha mu tambudze a vhuye a lifhe mulandu woṱhe. ₃₅Na Khotsi anga wa ṱaḓulu u ḓo ni ita nga u ralo arali na sa hangwelana nga mbilu yoṱhe.”