MATIOSI 13

₁Nga ḽeneḽo ḓuvha Yesu a bva nḓuni, a dzula khunzikhunzini ya dzivha. ₂Ha kuvhangana vhathu vhanzhi-vhanzhi vha tshi ṱoḓa u mu pfa, vha ḓala lwe a dzhena tshikepeni a dzula, a sia vhathu vhoṱhe vho ima khunzikhunzini. ₃A vha vhudza zwithu zwinzhi nga zwifanyiso, a ri, “Ho vhuya ha vha na muṅwe munna we a bva a tshi yo zwala mbeu. ₄A ri a tshi khou zwala iṅwe ya wela nḓilani, zwiṋoni zwa ḓa zwa i ḽa. ₅Iṅwe ya wela kha lutombo he ha vha hu na mavu maṱukuṱuku. Yeneyo ya mela nga u ṱavhanya, ngauri mavu a hone o vha e si manzhi. ₆Hone musi ḓuvha ḽi tshi ṱavha ḽa fhisa uyo mutomba wa mbo ḓi ṋoka, nge midzi ya vha i songo tsisa. ₇Iṅwe ya wela mipfani, iyo mipfa i tshi mela ya i pwanyeledza. ₈Hone iṅwe ya wela mavuni avhuḓi ya mela ya vhuya ya shela thoro; iṅwe ṱhotshe ya vha na thoro dza ḓana, iṅwe 60, iṅwe 30. ₉A na nḓevhe nga a ḓipfele!”

₁₀Vhafunziwa vhawe vha ḓa khae vha mu vhudzisa vha ri, “Ndi mini vha tshi amba navho nga zwifanyiso?” ₁₁A vha fhindula a ri, “Inwi no dzumbululelwa zwiphiri zwa muvhuso wa Mudzimu, hone vhaḽa a vho ngo dzumbululelwa. ₁₂A re nazwo u ḓo dovha a engedzwa zwa ita na u fhalala, a si na u ḓo dovha a dzhielwa na zwiṱukuṱuku zwine a vha nazwo. ₁₃Ndi zwone nda amba navho nga zwifanyiso, uri

₁₆“Hone inwi maṱo aṋu a na mashudu ngauri a a vhona, na nḓevhe dzaṋu dzi na mashudu ngauri dzi a pfa. ₁₇Zwino ipfani-ha: ndi vhaporofita vhanzhi na vhavhuya vho tamaho u vhona zwine inwi na zwi vhona, fhedzi vha kundwa; na zwine na zwi pfa vho tama u zwi pfa, fhedzi vha kundwa.

₁₈“Zwino ipfani zwine tshifanyiso tsha muzwali tsha amba: ₁₉Ane a pfa mafhungo a muvhuso wa Mudzimu a si a ṱalukanye, ha ḓa Muvhi a tswa mbeu yo zwaliwaho mbiluni yawe – ndi ene ane a fanyisedzwa nga mbeu ye ya wela nḓilani. ₂₀Ye ya ri i tshi zwalwa ya wela lukwarani zwi amba muthu ane a ri u pfa ipfi a mbo ḓi ḽi ṱanganedza nga mbilu tshena, ₂₁hone vhunga hu si na hune ḽa nga ṱoka midzi khae, ha lengi u wa. A tshi vho ṱhuphelwa ipfi ḽa Mudzimu na u tovholelwa ḽone u mbo ḓi gunea na zwenezwo. ₂₂He i tshi zwalwa ya wela vhukati ha mipfa, zwi amba uyo ane a ri o pfa ipfi ḽa Mudzimu ḽa pwanyeledzwa nga u vhilaela nga zwa vhutshilo na u xedzwa nga u funesa lupfumo, a si vhe na mitshelo. ₂₃He i tshi zwalwa ya wela mavuni avhuḓi zwi amba uyo ane a ri u pfa ipfi ḽa Mudzimu a ḽi ṱalukanya, a ita na u aṋwa mitshelo. Muṅwe a aṋwa ḓana, muṅwe 60, muṅwe 30.”

₂₄A dovha a vha fanyisedzela nga tshiṅwe tshifanyiso a ri, “Muvhuso wa Mudzimu u fana na muthu we a zwala mbeu yavhuḓi tsimuni yawe; ₂₅hone musi vhathu vho eḓela ha ḓa swina ḽawe ḽa zwala mufhunga vhukati ha goroi ḽa dovha ḽa ṋenga. ₂₆Goroi i tshi vho mela ya vhuya ya shela thoro ha konou vhonala na mufhunga. ₂₇Ndi hone vhashumi vha muṋe wa tsimu vha tshi ḓa khae vha ri, ‘Thovhela, nṋa a vho ngo zwala mbeu yavhuḓi tsimuni yavho? Mufhunga uyu u nga vha u tshi bva ngafhi?’ ₂₈Ene a vha fhindula a ri, ‘Hezwo zwi fanela u vha zwo itwa nga swina.’ Vhashumi vha ri, ‘Nṋa vha funa ri tshi ya ra u tupula?’ ₂₉Ene a hana a ri, ‘Ni songo u tupula; ni nga ḓo ri ni tshi ṱahula mufhunga na tshenuwa no tupula na goroi. ₃₀Zwi litsheni zwi aluwe zwoṱhe hu vhuye hu swike tshifhinga tsha khaṋo. Musi hu tshi swika khaṋo ndi ḓo vhudza vhakaṋi uri vha thome u kuvhanganya mufhunga vha u vhofhe madzanda uri u fhiswe, ndi hone vha tshi ḓo konou kuvhanganya goroi vha i vhea ḓuluni ḽanga.’ ”

₃₁A dovha a vha fanyisedzela nga tshiṅwe tshifanyiso a ri, “Muvhuso wa Mudzimu u fana na mbeu ya muhuyu ine muthu a dzhia a zwala tsimuni yawe. ₃₂Huno naho i yone mbeu ṱhukhu kha dzoṱhe, i tshi vho mela i hula u fhira zwiṱaka zwoṱhe, wa ita muri muhulu lune na zwiṋoni zwa ḓa zwa fhaṱa zwiṱaha matavhini awo.”

₃₃A dovha a vha vhudza tshiṅwe tshifanyiso a ri, “Muvhuso wa Mudzimu u fana na mbilisa ine musadzi a i suka na vhukhopfu ludongo lwo ḓala, yone ya kukumusa uho vhukhopfu hoṱhe.”

₃₄Zwenezwo zwoṱhe Yesu o vhudza vhathu nga zwifanyiso; a hu na ḽe a vha vhudza a sa ambi nga tshifanyiso, ₃₅hu u itela uri hu khunyelele ḽa muporofita a tshi ri,

₃₆Ndi hone Yesu a tshi ri vhathu vha ṱuwe zwavho, Ene a dzhena nḓuni. Vhafunziwa vha konou ḓa khae vha mu humbela vha ri, “Kha vha ri ṱalutshedze tshifanyiso tsha mufhunga wo zwalwaho tsimuni.” ₃₇A vha fhindula a ri, “Ane a zwala mbeu yavhuḓi ndi Mubebwa-nga-muthu. ₃₈Tsimu ndi shango. Mbeu yavhuḓi ndi vhalanda vha muvhuso wa Mudzimu. Mufhunga ndi vhalanda vha Muvhi. ₃₉Swina ḽo u zwalaho ndi diabolo. Khaṋo ndi vhufhelo ha shango. Vhakaṋi ndi vharuṅwa. ₄₀Unga mufhunga u tshi kuvhanganywa wa fhiswa nga mulilo, zwi ḓo ralo na nga ḓuvha ḽa vhufhelo ha shango: ₄₁Mubebwa-nga-muthu u ḓo ruma vharuṅwa vhawe, vha kuvhanganya vhakhakhisi vhoṱhe na vhaitazwivhi, vha vha bvisa muvhusoni wawe, ₄₂vha vha posa ṋanḓoni ya mulilo. Henefho vhathu vha ḓo lila vha ita na u shenganya maṋo nga vhuṱungu. ₄₃Nga heḽo ḓuvha vhavhuya vha ḓo penya sa ḓuvha muvhusoni wa Khotsi avho. A na nḓevhe nga a ḓipfele!

₄₄“Muvhuso wa Mudzimu u fana na lupfumo lwo dzumbiwaho tsimuni lune muṅwe muthu a tshenuwa o lu wana, a dovha a lu dzumba henefho tsimuni, a takala lune a ya a rengisa thundu dzawe dzoṱhe a renga tsimu iyo.

₄₅“Muvhuso wa Mudzimu wa dovha wa fana na muvhambadzi ane a enda a tshi ṱoḓa daimani dzavhuḓi, ₄₆a ri a tshi wana iṅwe daimani ya thengo khulu a ṱuwa a yo rengisa thundu dzawe dzoṱhe a renga iyo daimani.

₄₇“Muvhuso wa Mudzimu wa dovha wa fana na mambule ane a poswa lwanzheni ha fashwa khovhe dza tshakha-tshakha. ₄₈Musi o ḓala, vharei vha a kokodzela khunzikhunzini vha dzula fhasi vha khethekanya dzavhuḓi vha dzi posa zwirunduni, dzi si dzavhuḓi vha dzi laṱa. ₄₉Zwi ḓo tou ralo nga ḓuvha ḽa vhufhelo: Vharuṅwa vha ḓo ḓa vha khethekanya vhavhi na vhavhuya, ₅₀vhavhi vha vha posa ṋanḓoni ya mulilo. Henefho vhathu vha ḓo lila vha ita na u shenganya maṋo nga vhuṱungu.”

₅₁Ndi hone Yesu a tshi vha vhudzisa a ri, “Nṋa aya no a pfa oṱhe?” Vha fhindula vha ri, “Ro a pfa.” ₅₂A amba navho a ri, “Ndi zwine nda ri, ho no vha na vhaḓivhi vha Maṅwalo vhaṅwe vhane vha guda zwa u vhuswa nga Mudzimu; vhenevho vha fana na muṋe wa nnḓu ane a bvisa lupfumo luswa na lwa kale tshisikuni tshawe.”

₅₃Musi Yesu o fhedza zwifanyiso hezwo, a fhirela phanḓa. ₅₄A swika muḓini wa hawe a vha funza sinagogoni yavho. Vhe vha pfa pfunzo yawe vha akhamala vha ri, “Nṋa vhuṱali uvhu na maḓembe aya o zwi wanafhi? ₅₅A si ene ṅwana wa uḽa muvhaḓi? Mme awe a si vhaḽa vha no pfi Vho-Maria? Vharathu vhawe a si Jakopo na Josefa na Simoni na Judasi? ₅₆Khaladzi dzawe a ri nadzo henefhano dzoṱhe? Nṋa izwi zwithu zwoṱhe o zwi wanafhi?” ₅₇Vha amba nga u ralo vha tshi tou mu nyefula. Hone Yesu a vha fhindula a ri, “Muporofita a nga huliswa hoṱhe-hoṱhe, fhedzi muḓini wa hawe na hayani hawe ha huliswi.” ₅₈A si tsha ita maḓembe manzhi henefho nge vha shaya lutendo.