LUKASI 19

₁Yesu a dzhena Jerikho a fhira nga vhukati hawo. ₂Henefho ho vha hu na muhulwane wa vhathelisi, o pfumaho, ane a pfi Zakia. ₃Onoyo o vha a tshi tama u vhona uri Yesu ndi ufhio, a ro kundwa nge vhathu vha vha vho ḓalesa, na ene a dovha a vha mupfufhi. ₄Ndi hone a tshi gidimela phanḓa a gonya muhuyulukuse uri a kone u vhona Yesu ngauri o vha a tshi khou ḓa u fhira nga henefho. ₅Yesu a tshi swika henefho a lavhelesa nṱha a amba na Zakia a ri, “Zakia, ṱavhanyani ni tse; ṋamusi ndi mueni waṋu.” ₆Zakia a ṱavhanya a tsa, a mu ṱanganedza nga dakalo ḽihulu. ₇Vhathu vhoṱhe vhe vha zwi vhona vha gungula vha ri, “Vhonani o yo dalela mutshinyi!” ₈Zakia a takuwa a amba na Muṋe washu a ri, “Muṋe wanga, ndi ḓo kovhela vhashai hafu ya thundu yanga; huno arali hu na muṅwe we nda dzhia tshithu tshawe nga vhufhura, ndi ḓo mu lifhela tsho andiswa luṋa.” ₉Ndi hone Yesu a tshi mu vhudza a ari, “Ṋamusi hoyu muṱa wo tshidzwa, vhunga iṱali na uyu e ṅwana wa Abrahamu. ₁₀Nahone Mubebwa-nga-muthu o ḓa u ṱoḓa vho xelaho uri a vha tshidze.”

₁₁Vhathu vha tshi kha ḓi thetshelesa zwenezwo, Yesu a isa phanḓa nga u vha vhudza tshifanyiso; ngauri o vha o no vha tsini ha Jerusalema, vhathu vha tshi humbula uri muvhuso wa Mudzimu ndi hone u tsini-tsini na u swika. ₁₂A ri, “Muṅwe mukololo o vhuya a ya shangoni ḽa kule uri a vhumbwe khosi a konou vhuya hayani. ₁₃Hone a sa athu ṱuwa a vhidza vhaṅwe vhashumi vhawe vha fumi, muṅwe na muṅwe a mu ṋea ḽingwende ḽa musuku, a vha vhudza a ri, ‘Ni sale ni tshi ḽi bindulisa u swika ndi tshi vhuya!’ ₁₄Zwino vhathu vha shangoni ḽa hawe vho vha vha tshi mu vhenga; o no ṱuwa vha ruma vhaḓinḓa uri vha swike vha ri, ‘Hoyo munna a ri vhuyi ra funa a tshi ri vhusa.’

₁₅“Musi a tshi vhuya hayani o no vhumbwa khosi, a vhidzisa vhaḽa vhashumi vhawe vhe a vha fha tshelede uri a pfe zwe vha bindula. ₁₆Wa u thoma a ḓa a ri, ‘Muṋe wanga, ḽiḽa ḽingwende ḽavho ḽo vhuisa maṅwe a fumi.’ ₁₇Muṋe wawe a ri, ‘A u vhoni-ha mushumi wanga wavhuḓi! Vhunga wo fulufhedzea kha izwi zwiṱukuṱuku ndi ḓo u ita gota ḽa miḓi ya fumi.’ ₁₈Wa vhuvhili a ḓa a ri, ‘Muṋe wanga, ḽiḽa ḽingwende ḽavho ḽo vhuisa maṅwe maṱanu.’ ₁₉Na onoyo muṋe wawe a amba nae a ri, ‘Iwe ndi ḓo u ita gota ḽa miḓi miṱanu.’ ₂₀Ndi hone hu tshi ḓa muṅwe a ri, ‘Muṋe wanga, tshelede yavho khei; ndo vha ndo i puta nga dugu nda i dzumba ₂₁nge nda vha ofha, vhunga vhe muthu wa tshiṱuhu; vha vhila mavhoḓa a tshelede ye vha si i vhee, vha kaṋa he vha si lime.’ ₂₂Muṋe wawe a ri, ‘Mushumi a sa ḓivhalei ndiwe! Eneo maipfi au ndi ḓo u haṱula ngao! Hufha u tshi ri u nnḓivha ndi muthu wa tshiṱuhu; ndi vhila mavhoḓa a tshelede ye nda si vhee, ndi kaṋa he nda si lime! ₂₃Zwino khezwi u songo tou vhea tshelede yanga banngani uri ndi tshi vhuya ndi i dzhie yo no dzwala?’ ₂₄A konou vhudza vhe vha vha vho ima henefho a ri, ‘Mu dzhieleni heyo tshelede ni fhe uḽa a re na fumi ḽa bonndo!’ ₂₅Vha mu fhindula vha ri, ‘Muṋe washu, hufha o no ḓi vha na fumi ḽoṱhe!’ ₂₆Muṋe wavho a tshi fhindula a ri, ‘Nṋe ndi ri ane a vha na zwawe u ḓo engedzwa; hone a si na tshawe u ḓo dzhielwa na zwiṱukuṱuku zwine a vha nazwo. ₂₇A vha aḽa maswina anga e a vha a sa funi ndi tshi vha khosi yao, a ḓiseni fhano ni a vhulahe ndi tshi zwi vhona!’ ”

₂₈Yesu o no ralo a fhirela phanḓa a gonya Jerusalema. ₂₉A tshi sendela tsini na Bethefage na Bethania, Thavhani ya Miolivi, a ruma vhafunziwa vhavhili ₃₀a ri, “Iyani muḓini hoyo u re afho phanḓa. Ni ḓo ri ni tshi tou dzhena na wana donngana yo vhoxwaho i sa athu vhuya ya namelwa nga muthu; ni i vhofholole ni i ḓise. ₃₁Arali na vhudziswa uri, ‘Ndi mini ni tshi i vhofholola?’ ni fhindule ni ri, ‘Muṋe washu u a i ṱoda!’ ”

₃₂Avho vhaḓinḓa vha ṱuwa, nangoho vha wana zwoṱhe zwo tou ralo. ₃₃Musi vha tshi kha ḓi vhofholola donngana yeneyo, vhaṋe vhayo vha vha vhudzisa vha ri, “Ndi mini ni tshi vhofholola iyo donngana?”

₃₄Vhone vha fhindula vha ri, “Muṋe washu u a i ṱoḓa.” ₃₅Vha tshi ralo vha i isa ha Yesu, vha konou kapea nguvho dzavho khayo, vha mu namedza. ₃₆A tshi khou tshimbila vhathu vha adza nguvho dzavho gondoni.

₃₇Musi a tshi vho sendela Jerusalema, fhaḽa hune gondo ḽa tsa na Thavha ya Miolivi, gogo ḽoṱhe ḽa vhafunziwa vhawe vha thoma u pembela na u ṱavha mikosi vha tshi renda Mudzimu vha tshi takalela maḓembe oṱhe e vha a vhona. ₃₈Vha ri,

₃₉Ndi hone vhaṅwe vha Vhafarisei vhe vha vha vhe vhukati ha gogo vha tshi amba na Yesu vha ri, “Vhafunzi, kha vha kaidze vhafunziwa vhavho!”

₄₀Yesu a fhindula a ri, “Ndi a ni vhudza ndi ri: Arali avha vha fhumula, matombo a ḓo vha one a no fhululedza.”

₄₁Musi a tshi vho sendela tsini ha muḓi, a tshi u vhona, a u lilela a ri, ₄₂“Ngavhe vhukuma ṋamusi wo vha u tshi ḓivha zwine zwa ḓisa mulalo; zwino zwo ro u dzumbama. ₄₃Hu ḓo ḓa tshifhinga tshine maswina au a ḓo u govhela, o tou u tangela ngomu, a u zhakeledza a tshi bva thungo dzoṱhe. ₄₄Vha ḓo u thutha ha sala hu si tshee na na tombo na ḽithihi ḽi re nṱha ha ḽiṅwe, vhana vhau vha ḓo devhekanywa, ngauri a wo ngo ṱalukanya tshifhinga tshe Mudzimu a ḓa u u lamulela ngatsho!”

₄₅Yesu a dzhena muṱani wa thembele a pandela vhathu vhe vha vha vha tshi khou rengisa henefho, ₄₆a tshi ri, “Ho ṅwalwa upfi: ‘Nnḓu yanga i ḓo vha nnḓu ya thabelo,’ zwino inwi no no i shandula ‘bako ḽa mavemu.’ ”

₄₇Yesu a ḓi funza thembeleni ḓuvha ḽiṅwe na ḽiṅwe. Vhotshifhe vhahulwane na vhaḓivhi vha Mulayo na vhahulwane vha lushaka vho vha vha tshi ḓi ṱoda u mu vhulaha, ₄₈hone vha si wane tshine vha nga ita, ngauri vhathu vhoṱhe vho vha vha tshi mu thetshelesa, vha sa funi u fhirwa nga ipfi na ḽithihi.