JOHANISI 7

₁Ngavhuya Yesu a thoma u tshimbila na ḽa Galelia. O vha a sa funi u tshimbila Judia, ngauri vhahulwane vha Majuda vho vha vha tshi khou ṱoḓa nḓila ya u mu vhulaha. ₂Musi vhuṱambo ha Majuda ha Mishasha ho no vha tsini, ₃vharathu vha Yesu vha mu vhudza vha ri, “Khefha ni sa ṱuwi fhano na ya Judia uri vhafunziwa vhaṋu vha kone u vhona-vho mishumo ine na ita? ₄Arali muthu a tshi funa u ḓivhea ha dzumbi mishumo yawe. Vhunga ni tshi khou ita zwithu zwingafhangafha, itani uri shango ḽoṱhe ḽi ni ḓivhe!” ₅(Hafhu na vhone vharathu vhawe vho vha vha sa mu tendi.)

₆Yesu a ri, “Nṋe tshifhinga tshanga a tshi athu swika; kha inwi a hu tou vha na tshifhinga. ₇Inwi shango a ḽi koni u ni vhenga; Nṋe ḽi a mmbenga ngauri ndi dzula ndi tshi vha kaidza uri mishumo yavho ndi mivhi. ₈Inwi iyani zwaṋu vhuṱamboni. Nṋe vhuṱamboni vhuno a thi yi; tshifhinga tshanga a tshi athu swika.” ₉A ri u fhindula nga u ralo a mbo ḓi sala Galelia.

₁₀Musi vharathu vhawe vho no ya vhuṱamboni na Yesu a ya, e eṱhe a sa vhonwi nga muthu. ₁₁Vhahulwane vha Majuda vho vha vha tshi khou ḓi mu ṱoḓa henengei vhuṱamboni vha tshi vhudzisa vha tshi ri, “Nṋa uḽa munna u ngafhi?”

₁₂Vhathu vho vha vha tshi khou mu sola nga tshavho, vhaṅwe vha tshi ri, “Ndi muvhuya,” vhaṅwe vha tshi ri, “A si muvhuya, u xedza vhathu.” ₁₃Hone a ho ngo vha na we a tou mu amba khagala, ngauri vho vha vha tshi ofha vhahulwane vha Majuda.

₁₄Musi vhuṱambo ho ṱangana Yesu a ya thembeleni a thoma u funza. ₁₅Vhahulwane vha Majuda vha kanuka nga maanḓa vha ri, “Nṋa uyu munna khezwi a tshi tou ḓivha Maṅwalo nga u rali ngeno na u funzwa a songo ngo vhuya a funzwa?”

₁₆Yesu a tshi fhindula a ri, “Nṋe pfunzo ine nda funza a si yanga ndi ya o nthumaho. ₁₇Ane a ḓiimisela u ita zwine Mudzimu a funa u ḓo zwi ḓivha uri zwine nda funza a si zwanga, ndi zwa Mudzimu. ₁₈Ane a amba zwawe u ṱoḓa uri hu huliswe ene; ane a ṱoḓa uri hu huliswe o mu rumaho ndi ene ane a fulufhedzea, ha na vhufhura. ₁₉Nṋa a thi ri Mushe o ni ṋea Mulayo? Zwino khezwi hu si na na muthihi waṋu ane a u tevhedza? Ndi amba ngauri ni vho funa u mmbulaha!”

₂₀Vhathu vha fhindula vha ri, “Ndi nnyi ane a khou funa u ni vhulaha? No tou dzhenwa nga thuṅwa ya Saṱhane.”

₂₁Yesu a tshi fhindula a ri, “Ndo ri u ita maḓembe luthihi na vhilaela noṱhe. ₂₂A thi ri Mushe o ni ṋea mulayo wa u fumbisa vhana (naho zwi songo thomiwa nga Mushe, zwo thomiwa nga vhomakhulukuku). Asizwi, na nga Sabatha inwi ni a ḓi fumbisa muthu. ₂₃Zwino arali muthu a tshi kona u fumbiswa nga Sabatha uri hu si pfukiwe Mulayo wa Mushe, Nṋe khezwi ni tshi ntsinyutshela nge nda fhodza muthu tshoṱhe nga Sabatha? ₂₄Litshani u ṱavhanyedza u haṱula muthu, ni haṱule ni tshi tevhedza zwi re zwone.”

₂₅Vhaṅwe vhathu vha Jerusalema vha ri, “Nṋa uyu munna a si uḽa ane vha khou ṱoḓa u mu vhulaha? ₂₆Zwino khezwi a tshi khou ḓi amba vhukati ha vhathu hu si na ane a mu hanedza! Kani-ha na zwino vhahulwane vha a ḓivha uri vhukuma ndi Ene Mesia? ₂₇Tshi dinaho ndi uri uyu ri a ḓivha hune a bva hone, hu uri Mesia a tshi ḓa, a hu na ane a ḓo ḓivha uri u bva ngafhi.”

₂₈Huno Yesu a tshi khou funza thembeleni a vhidzelela a ri, “Ndi zwone zwauri ni a nnḓivha na uri ni ḓivha na hune nda bva hone. Naho zwo ralo, a tho ngo sokou ḓa nga ndoṱhe. We a nthuma u a fulufhedzea. Onoyo inwi a ni mu ḓivhi, ₂₉a no mu ḓivha ndi Nṋe, ngauri ndi bva khae nahone ndi Ene o nthumaho.”

₃₀Zwenezwo vha vho ṱoḓa u mu fara, hone hu si vhe na we a vhuya a mu kwama, ngauri tshifhinga tshawe tsho vha tshi sa athu swika. ₃₁Hone vhanzhi kha gogo ḽeneḽo vha mu fulufhela vha ri, “Kani Mesia a tshi ḓa u kha ḓi ḓo ita maṅwe maḓembe a fhiraho e uyu a ita?”

₃₂Vhafarisei vha tshi pfa gogo ḽi tshi khou hevhedzana enea mafhungo, vhone na vhotshifhe vhahulwane vha mbo ruma vhalindathembele uri vha yo fara Yesu. ₃₃Yesu Ene a ri, “Ndi kha ḓi ḓo vha na inwi tshifhinganyana, ndi hone ndi tshi ḓo humela ha o nthumaho. ₃₄Ni ḓo nṱoḓa ni si nngwane, ngauri hune nda vha hone inwi ni nga si kone u swika.”

₃₅Vhahulwane vha Majuda vha amba nga tshavho vha ri, “Nṋa a nga vha a tshi khou ṱoḓa u yafhi hune riṋe ra si tsha ḓo mu wana? Kani u ṱoḓa u ya kha Majuda o balanganaho na shango a funza Magiriki? ₃₆Ri amba ngauri u ri, ‘Ni ḓo nṱoḓa ni si nngwane,’ a dovha a ri, ‘Hune nda vha hone inwi ni nga si kone u swika.’ A tshi ralo u amba mini?”

₃₇Ḓuvha ḽa u fhedza vhuṱambo ḽo vha ḽi ḽone ḽihulwane. Nga ḽeneḽo ḓuvha Yesu a ima a vhidzelela a ri, “A na ḓora kha a ḓe kha Nṋe a nwe. ₃₈Hafhu Maṅwalo a ri, ‘A fulufhelaho Nṋe hu ḓo ela milambwana ya maḓi a tshidzaho a tshi bva khae’!” ₃₉A tshi ralo ho vha hu u amba Muya we vha mu fulufhelaho vha vha vha tshi ḓo mu ṱanganedza hu si kale. Misi iyo Muya o vha a sa athu ḓa, ngauri Yesu o vha a sa athu ya vhugalani hawe.

₄₀Vhaṅwe vhathu henefho kha gogo ḽeneḽo vha tshi pfa a tshi ralo vha ri, “Nangoho hoyu munna ndi onouḽa Muporofita we a pfi u ḓo ḓa.” ₄₁Vhaṅwe vha ri, “U tou vha Ene Mesia.”

Hone ha ḓi vha na vhaṅwe vha no ri, “Mesia a nga bva Galelia naa? ₄₂Hufha Maṅwalo a tshi ri Mesia u ḓo vha muḓuhulu wa Dafita, nahone u ḓo bebwa Betlehema, henefho he Dafita a vha a tshi dzula hone!” ₄₃Ha mbo ḓi vha u fhambana ha gogo tshilwelwa e Ene Yesu.

₄₄Vhaṅwe vhavho vha vho funa u mu fara, hone hu si vhe na we a vhuya a mu kwama.

₄₅Vhaḽa vhalindathembele vha tshi vhuelela khoroni ya vhotshifhe vhahulwane na Vhafarisei, vhone vha vha vhudzisa vha ri, “Nṋa ndi mini ni songo vhuya nae?”

₄₆Vhalindathembele vha fhindula vha ri, “Riṋe a ri athu vhuya ra pfa muthu ane a amba sa hoyo munna!”

₄₇Vhafarisei vha ri, “Khezwi hu tshi vho nga na inwi o no ni fhura? ₄₈Ni khou vhona kha vhahulwane vha lushaka na kha Vhafarisei hu na nnyi a no mu tenda? ₄₉Gogo heḽi ḽi itwa nga u sa ḓivha Mulayo wa Mushe; ḽo teketelwa nga Mudzimu!”

₅₀Na Ṋegodima, uḽa we a vhuya a dalela Yesu o vha e muṅwe wavho. Ene a amba navho a ri, ₅₁“Nṋa Mulayo washu u a tenda ri tshi sokou haṱula muthu a songo thoma a sengiswa ha wanala uri o tshinyani?”

₅₂Vhone vha fhindula vha ri, “Mathina na vhone vho no vha Mugalelia? Kha vha fhenḓe Maṅwalo, vha ḓo wana uri a hu na muporofita a no bva Galelia.”