JEREMIA 39

₁Jerusalema wo thubiwa nga u rali:

Nga ṅwaha wa vhuṱanu na vhuṋa wa Tsedekia khosi ya Juda, nga ṅwedzi wa fumi, Nebukhadnetsara khosi ya Babele o ḓa na mmbi yawe yoṱhe a dia Jerusalema, a u govhela. ₂Nga ḓuvha ḽa vhuṱanu na vhuṋa ḽa ṅwedzi wa vhuṋa wa ṅwaha wa 11 wa muvhuso wa Tsedekia mutsheṱo wa muḓi wa pwashiwa wa phuletshedzwa. ₃Magota oṱhe a khosi ya Babele vha ḓa vha dzula Khoroni ya Vhukati. Ndi Neregala Saresere wa Sinimagiri, muhulwane wa dzigariki, ndi Nebo Sarisekhimu gota ḽihulwane, ndi muṅwe Neregala Saresere gota ḽa muḓivhalea, na magota maṅwe oṱhe a khosi ya Babele. ₄Musi Tsedekia khosi ya Juda na vhahali vhoṱhe vha tshi vhona mutsheṱo wo phuletshedzwa, vha shavha, vha ṱutshela muḓi vhusiku vha bva nga nḓila ya ngadeni ya khosi, vha fhira nga khoro i re vhukati ha mitsheṱo mivhili, vhó livha Govhani ḽa Jorodani.

₅Hone mmbi ya Vhababele ya vha pandamedza ya fara Tsedekia midavhini ya Jeriko. Vha mu fara vha mu isa ha Nebukhadnetsara khosi ya Babele e Ribila shangoni ḽa Hamathi, a mu haṱula hone. ₆Henefho Ribila khosi ya Babele ya vhulahisa vhana vha Tsedekia a tshi zwi vhona, a ita na u vhulaha vhahulwane vha Juda. ₇Ndi hone a tshi nongola maṱo a Tsedekia, a mu vhofha nga tsimbi dza tshiṱhomola a mu isa Babele.

₈Vhababele vha fhisa pfamo ya musanda na nnḓu dza vhathu, vha thutha mitsheṱo ya Jerusalema. ₉Nebusaradani, ene mulangammbi, a hwala vhathu vho salaho muḓini a vha isa vhuthubwani Babele, vha ṱuwa na vhaḽa vhe vha shavhela khae, na vhaṅwe vhathu vhoṱhe. ₁₀Hone Nebusaradani mulangammbi a sia vhaṅwe vhashai shangoni ḽa Juda, vhe vha vha vha si na tshavho; nga tshifhinga tshenetsho a vha ṋea masimu a minḓirivhe na maṅwe masimu.

₁₁Zwino Nebukhadnetsara khosi ya Babele o vha o vhudza Nebusaradani mulangammbi a tshi amba Jeremia a ri, ₁₂“Mu dzhie u mu londole; u songo mu huvhadza, u mu itele zwoṱhe zwine a humbela.” ₁₃Zwenezwo Nebusaradani mulangammbi na Nebushasabani gota ḽihulwane na Neregala Saresere a re muḓivhalea na maṅwe magota oṱhe a khosi ya Babele ₁₄vha ruma vhaḓinḓa vha yo dzhia Jeremia muṱani wa vhalindi. Vha mu isa ha Gedalia ṅwana wa Ahikamu, ṅwana wa Shafani, uri a mu vhuedzedze hayani ha hawe. Zwenezwo a dzula na vhathu vha hawe.

₁₅Zwiḽa Jeremia a tshee o vhewa muṱani wa vhalindi, ipfi ḽa Muṋe washu ḽo ḓa khae ḽa ri, ₁₆“Iyo vhudza Ebede Melekhe munna wa Mukushu u ri, ‘Yahavee Mulangazwoṱhe Mudzimu wa Israele u ri: Ndi ḓo ṱuwa ndi tshi khunyeledza maipfi anga e nda amba nga muḓi houno; u ḓo welwa nga khombo, zwi nga si u nakele. Musi wonoyo zwi ḓo khunyelela u tshi zwi vhona. ₁₇Huno musi wonoyo ndi ḓo u lamulela, u ralo Yahavee, a u nga kumedzwi vhane wa vha ofha. ₁₈Ndi ḓo u tshidza; a u nga ḽiwi nga pfumo, u ḓo ponyoka wa tshila, ngauri u a mpfulufhela, u ralo Yahavee.’ ”