YESAYA 65

“Ndo tenda vha sa nṱoḓiho

vha tshi mmbudzisa;

ndo wanwa nga vhe vha si nṱoḓe;

ndo vhudza lushaka lwe lwa si nthabele

nda ri, ‘Ndi fhano! Ndi fhano!’

₂Ndo ṱwa ndi tshi khou vhidza vhathu vha tshikhuna,

vha no tshimbila nḓilani dzi si dzavhuḓi,

vha tshi tevhedza mihumbulo yavho.

₃Ndi vhathu vhane vha ḓi endela u nṱunga;

vha tou zwi ita maṱoni anga,

vha tshi ṋekedza zwiṱhavhelo dzingadeni,

vha fhisa zwioro

aḽiṱarini dza midzimu;

₄vha dzula zwaloni,

vha lala mapakoni,

vha tshi vhudzisa mimuya ya vho faho;

vha ḽa ṋama ya nguluvhe,

khali dzavho dza fara muthotho wa ṋama ya dzitshikha;

₅vha ri, ‘Ima kule!

U songo sendela tsini hanga!

Zwi a ila!’

“Vhathu vho raloho vha a ntsinyusa;

ndi tshi vha vhona mbiti dzanga dzi nga mulilo

une wa endela u duga ḓuvha ḽoṱhe.

₆Vhonani, a thi nga zwi hangwi, zwo ṅwalwa henefha

phanḓa hanga:

A thi nga fhumuli ndi vhuye ndi lifhedze zwoṱhe;

zwi ḓo humela khavho –

₇ndi ḓo lifhedza milandu yaṋu na ya vhokhotsi aṋu.

Vho fhisa zwiṱhavhelo dzithavhani,

vha nnyefula muvhunduni;

ndi zwine nda ḓo vha lifhedza zwoṱhe zwe vha ita kale.”

“Hu pfi,

‘Tshiṱokola tsha nḓirivhe a tshi laṱwi

tshi tshi kha ḓi vha na maḓi;

tshi kha ḓi vha na mashudu.’

Na Nṋe ndi ḓo ralo

ndi tshi itela vhalanda vhanga –

ndi nga si vha lozwe vhoṱhe.

₉Ndi ḓo bveledza vhaḓuhulu kha Jakopo,

kha Juda nda bveledza vhane thavha dzanga dza ḓo vha dzavho;

u ḓo vha mukovhe wa vhathu vhanga

vhe nda vha nanga;

henefho hu ḓo dzula vhalanda vhanga.

₁₀Sharoni hu ḓo fula maṱambi a dzinngu,

govha ḽa Akhoro ḽa vha vhuawelo ha maṱambi a kholomo

dza vhathu vhanga vhane vha nṱoḓa.

₁₁“Hone inwi vhane na nṱamba,

na hangwa thavha yanga khethwa,

Gadi ‘mudzimu wa mashudu’ na mu lugisela ḓafula,

Meni ‘mudzimu wa malivhanywa’ na mu itele thevhula

nga waini yo dzangelwaho,

₁₂ndi ḓo ni livhanya na pfumo;

noṱhe ni ḓo kotama na shidzhiwa,

nge nda ni vhidza na si fhindule,

nda amba na si thetshelese,

na ita zwe nda vhona zwo vhifha,

na nanga zwine zwa si ntakadze.

₁₃“Zwenezwo ipfani zwine Nṋe Yahavee Muṋe wa zwoṱhe nda ni vhudza!

Ndi ri: vhalanda vhanga vha ḓo ḽa,

inwi na ṱwa na nḓala;

vhalanda vhanga vha ḓo nwa,

inwi na ṱwa na ḓora;

vhalanda vhanga vha ḓo pembela,

inwi na tou shona;

₁₄vhalanda vhanga vha ḓo fhululedza nga dakalo,

inwi na tou honḓa mbilu dzi tshi pfa vhuṱungu,

na ongolela no kulea nungo.

₁₅Nṋe Yahavee Muṋe wa zwoṱhe

ndi ḓo ni vhulaha;

vhanangiwa vhanga vha ḓo teketela maswina

nga dzina ḽaṋu;

hone vhalanda vhanga ndi ḓo vha ṋea dzina ḽiswa.

₁₆Vha tshi reshana shangoni vha ḓo reshana

nga dzina ḽa Mudzimu wa ngoho;

ane a ana u ḓo ana nga Mudzimu wa ngoho.

Ndi uri khombo dza kale dzi ḓo hangwiwa,

dzó dzumbiwa hune nda si dzi vhone.”

₁₇“Vhonani,

ndi ḓo sika ḽiṱaḓulu ḽiswa na ḽifhasi ḽiswa;

zwa kale zwi ḓo hangwiwa,

na mbiluni zwi ḓo bva.

₁₈Zwine nda ḓo zwi sika ni zwi takalele,

ni zwi pembelele lini na lini –

ndi ḓo sika Jerusalema wa tou vha muḓi wa dakalo,

vhathu vhawo vha ḓala dakalo.

₁₉Ndi ḓo pembelela Jerusalema,

vhathu vhanga nda vha takalela.

Ngomu hawo a hu tsha ḓo pfala u tswimila na tshililo.

₂₀Ngomu hawo a hu tsha ḓo vha na lutshetshe

lu no ḓo tshila maḓuvha a si gathi fhedzi;

a hu tsha ḓo vha na mukalaha ane a sa ḓo lalama

a khunyeledza maḓuvha awe;

ane a ḓo fa e na ḓana ḽa miṅwaha u ḓo pfi o fa a tshee muṱuku;

a sa swiki ḓana ḽa miṅwaha u ḓo pfi o teketelwa.

₂₁Vha ḓo fhaṱa nnḓu vha dzula khadzo,

vha lima masimu a minḓirivhe vha ḽa mitshelo yayo.

₂₂A vha tsha ḓo fhaṱa nnḓu dza dzulwa nga vhaṅwe,

kana vha lima zwa ḽiwa nga vhaṅwe.

Vhathu vhanga vha ḓo lalama unga muri;

vhanangiwa vhanga vha ḓo ḓiphiṋa

nga mushumo wa zwanḓa zwavho.

₂₃A vha nga sokou ḓinetisela mahandana,

kana vha beba vhana vha no ḓo welwa nga khombo;

vha ḓo vha vhe vhathu vho shudufhadzwaho nga Nṋe,

vhone khathihi na vhaḓuhulu vhavho.

₂₄Vha sa athu na u ṱavha mukosi ndi ḓo vha ndo no fhindula;

vha tshi kha ḓi amba ndi ḓo vha ndo no zwi pfa.

₂₅Phele na ngwana dzi ḓo fula dzoṱhe;

ndau i vho ḓo fula muhwane unga phulu;

tshiḽiwa tsha ṋowa ḽi ḓo vha buse;

a hu tsha ḓo vha na tshi huvhadzaho kana tshivhi

thavhani yanga khethwa.”

Ho amba Muṋe washu.