HOSIA 10

₁Vhaisraele vho vha vha tshi nga munḓirivhe u navhaho u tshi ḓiaṋwela mitshelo yawo. Musi mitshelo yawo i tshi anda, vha fhaṱa aḽiṱari nnzhi, musi zwi tshi vha nakela shangoni vha ṱama phuphu dza matombo dzine vha dzi luvha. ₂Vha na mbilu dza vhufhura, zwino vha ḓo hwala mulandu wavho. Muṋe washu u ḓo kula ṋanga dza aḽiṱari dzavho, a phusukanya phuphu dzavho dza matombo. ₃Ndi hone vha tshi ḓo ri, “A ri tshee na khosi! Ndi zwone, zwo ḓa nge ra si ofhe Muṋe washu. Huno naho ri vhe na khosi o vha a tshi ḓo ri itelani?” ₄Vha fulufhedzisa zwithu zwinzhi, vha ana miano i si ya ngoho, vha vhofha mulanga, zwenezwo tsimuni yo limiwaho hu mela vhuri fhedzi – vhuri ha u sengisa milandu.

₅Vhathu vha no dzula Samaria vha tetemela nga nyofho vha tshi humbula zwine zwa ḓo wela ṋamana ya tshifanyiso ya Bethavene. Vhathu vhayo vha ḓo i lilela, na vhotshifhe vhayo, havho vhe vha vha vha tshi takalela vhugala hayo, ngauri vho dzhielwa yone, yo iswa vhuthubwani. ₆I ḓo hwalwa ya iswa Ashuru ya vha nduvho ya khosi khulu, Muhali. Vha Efraimi vha ḓo shona, Vhaisraele vha ḓo shona nga vhukwila havho. ₇Vha Samaria zwo vha fhelela. Khosi yavho i nga ṱanga ḽi no khou kumbiwa nga maḓi ḽo papamala nṱha hao. ₈Mivhundu ya midzimu mivhi i ḓo lozwiwa – hone vhutshinyi ha Vhaisraele. Hu ḓo mela mipfa na mitshutshungu zwa tiba aḽiṱari dzayo. Ndi hone vha tshi ḓo amba na dzithavha vha ri, “Ri tibeni!” vha amba na mivhundu vha ri, “Ri weleni!”

₉Inwi Vhaisraele no ḓi tshinya u bva misi ya Gibia. Zwi kha ḓi vha zwo ralo na ṋamusi. Nndwa a i nga ḓo kumba vhaitazwivhi vha Gibia naa? ₁₀Ndi ḓo ḓa nda vha lifhedza ndi tshi tou zwi funa, nda vha rambela dzitshakha dza vha vhofha dza nwa zwisima zwavho.

₁₁Vhathu vha Efraimi vha nga tholehadzi yo gudiswaho ine ya takalela u fhula, zwenezwo ndi ḓo i vhea dzhogo mutsingani wayo wavhuḓi. Vhathu vha Efraimi ndi ḓo vha pana, vha Juda vha lima, vha Jakopo vha pwasha maḓinga. ₁₂Ḓizwaleleni u fulufhedzea, ni kaṋe mutshelo wa lufuno lu sa shanduki, khathani mukhatho; tshino ndi tshone tshifhinga tsha u ṱoḓa Muṋe washu a vhuya a ḓa a ni nisela zwivhuya. ₁₃Hone inwi no zwala vhuvhi, no kaṋa vhutshinyi, no ḽa mutshelo wa vhufhura. Zwino nge na ḓitika nga nungo dzaṋu na vhahali vhaṋu vhanzhi, ₁₄vhathu vhaṋu vha ḓo ḓelwa nga nndwa, mitsheṱo yaṋu yoṱhe i ḓo phusukanywa, unga zwiḽa Shalamani a tshi phusukanya Betharabele musi wa nndwa, a tshi vhulaha vhomme na vhana vhavho. ₁₅Na iwe Bethele u welwa nga zwenezwo nge vhuvhi hau ha anda. Mapfuvhi a musi wonoyo a ḓo ri a tshi tswuka, khosi ya Israele ya vha yo no lozwiwa tshoṱhe.