Vhe vha fulufhela Mudzimu
1Zwino lwone lutendo ndi mini? Lutendo ndi u vha na ngoho na zwe ra zwi lavhelela, nangwe zwi sa vhonali ra ḓi zwi fulufhela ri sa timatimi. 2Vha kale vho khoḓwa nga Mudzimu nge vha vha na lutendo.
3Ndi nga lwone lutendo ri tshi kona u ṱalukanya uri tsiko yoṱhe yo vhumbwa nga ipfi ḽa Mudzimu, zwine ra zwi vhona zwa bva kha zwi sa vhonali.
4Ndi nga lutendo Abele o kona u ṋekedza Mudzimu nduvho dzi fhiraho dza Kaini; ndi nga lwonolwo lutendo Mudzimu o ṱanganedza nduvho dza Abele a ri ndi muvhuya; ndi nga lutendo Abele a tshi kha ḓi amba na ṋamusi naho o no ḓi fa.
5Ndi nga lutendo Enokho a songo vhuya a thetshela lufu; o sokou tshenuwa a si tsheeho fhano fhasi, Mudzimu ó ṱuwa nae. Nahone Maṅwalo a ri, a sa athu ṱuwiswa o vha a tshi tshila vhutshilo vhu takadzaho Mudzimu. 6Hafhu a u koni u takadza Mudzimu arali u si na lutendo; ane a ḓa ha Mudzimu tshawe ndi u fulufhela uri Mudzimu u hone, u pfufha vhane vha mu ṱoḓa nga mbilu yoṱhe.
7Ndi nga lutendo Nua a songo nyadza zwiḽa Mudzimu a tshi mu sevha zwi no ḓo bvelela, a mu pfa a fhaṱa tshiḽa tshikepe, ha vha u tshidza muṱa wawe. Ene a tshi fulufhela Mudzimu ha vha u haṱula shango uri ḽi laṱwe, ene muṋe a pfi muvhuya nge a vha na lutendo.
8Ndi nga lutendo Abrahamu o thetshelesa a tshi vhidzwa nga Mudzimu uri a pfulutshele shangoni ḽe a mu fulufhedzisa ḽone, ḽe ḽa pfi ḽi ḓo vha ḽawe, a sokou pfuluwa a sa ḓivhi hune a ya.
9Nga lutendo lwonolwo a vha ṱhunḓu shangoni ḽe a fulufhedziswa; a dzula dzidenndeni, na Isaka na Jakopo vhe vha vha vho fulufhedziswa ifa ḽeneḽo vha ḓi dzula-vho dzidenndeni sa ene. 10O vha o lavhelela muḓi u re na muteo wo khwaṱhaho we Mudzimu a vha Ene muhumbuli na mufhaṱi wawo.
11Onoyo Abrahamu, naho o vha o no kalaha, tshifhinga tshawe tsha u beba tsho no fhira, na Sara musadzi wawe e muumba, nge Abrahamu a fulufhela Mudzimu a wana maanḓa a u mu bebisa ṅwana, ngauri o ri, “We a mpfulufhedzisa u a fulufhedzea.” 12Zwenezwo kha munna muthihi we a vha a tshi nga o fa ha bva lushaka lwo andaho sa ṋaledzi kana muṱavha wa khunzikhunzini ya lwanzhe u sa vhalei.
13Vhathu havho vhoṱhe vho fa vhe na lutendo. Vho fa vha sa athu wana zwe vha fulufhedziswa. Vho tou zwi vhona zwi tshee kule vha zwi pembelela, vha tenda uri vha tou vha vhatsinda na vhafhiri fhano shangoni. 14Vhane vha ralo vha sumbedza uri a vha athu wana ha havho, vha kha ḓi hu ṱoḓa. 15Arali mbilu dzavho dzo vha dzi tshee shangoni ḽiḽa ḽe vha pfuluwa khaḽo, ndi musi vho wana nḓila ya u humela murahu. 16Matsina vho vha vho lavhelela shango ḽa khwiṋe, ndi amba ḽa makoleni. Ndi zwe na Mudzimu a si shone u pfi Mudzimu wavho; u na muḓi we a vha fhaṱela.
17-18Ndi nga lutendo Abrahamu o ṋekedza Isaka a mu ita tshiṱhavhelo, zwiḽa Mudzimu a tshi ṱoḓa u vhona u fulufhedzea hawe. Hafhu Isaka o vha e ene ṅwana wawe muthihi fhedzi, nahone o vha o no fulufhedziswa ha pfi, “Vhaḓuhulu vhau vha ḓo bva kha lutsinga lwa onoyu Isaka.” Naho zwo ralo o vha o no ḓiimisela u mu ṋekedza. 19Ndi uri o vha a tshi ḓivha uri Mudzimu u na maanḓa na a u vusa muthu vhafuni. Nazwino o mu ṱanganedza a tshi nga o bva vhafuni, zwine zwa sumba u vuwa ha vhafu.
20Ndi nga lutendo Isaka a tshi shudufhadza Jakopo na Esau, a amba zwe zwa vha zwi tshi kha ḓi ḓo itea.
21Ndi nga lutendo Jakopo o ri a tshi khou fa a shudufhadza vhana vha Josefa vhuvhili havho, a luvha Mudzimu o gogoḓela lubaḓa lwawe.
22Ndi nga lutendo Josefa o ri a tshi ṱoḓa u fa a amba nga zwa u pfuluwa ha Vhaisraele Egipita, a vha laya zwine vha fanela u ita nga marambo awe.
23Ndi nga lutendo zwiḽa Mushe a tshi ri o bebwa, vhabebi vhawe vha mu dzumba miṅwedzi miraru nge vha vhona lunako lwawe, vha si ofhe mulevho wa khosi.
24Ndi nga lutendo Mushe a tshi ri o no aluwa a lamba u pfi ṅwana wa ṅwananyana wa Farao, 25a nanga u tambudzwa na lushaka lwa Mudzimu, a landula u ḓiphiṋa nga miḓifho ya vhutshinyi i fhelaho; 26a vhona u nyadzelwa Mesia lu lupfumo luhulu lu fhiraho na madzanga a Egipita; o vha o vhea mbilu kha pfufho i kha ḓi ḓaho. 27A tshi ṱuwa Egipita ho vha hu si nga u ofha mbiti dza khosi, o itwa nga lutendo; a hana u humela murahu, zwa nga u khou vhona Mudzimu a sa vhonwi nga maṱo. 28Ndi nga lutendo o tea vhuṱambo ha Paseka, a handulula mihangammbwa nga malofha, uri muruṅwa wa bulayo a si kwame matanzhe a Israele. 29Nga lutendo vho wela Lwanzhe Lutswuku zwa nga vha tshimbilaho shangoni ḽo omaho, Vhaegipita vha tshi ri ri a wela-vho vha nwela khothe ha mbo ḓi vha u lovha.
30Zwo itwa nga lutendo Vhaisraele vho ri u mona na mitsheṱo ya Jerikho maḓuvha maṱanu na ḽithihi ya mbo ḓi ri huru fhasi. 31Ndi nga lutendo Rahaba uḽa wa phombwe o ponyoka lufu lwa vha nyadzaho Mudzimu, nge a swielela dziḽa ṱholi nga mbilu tshena.
32Ndi ṱwe ndi tshi elela? Tshifhinga a tshi tsha ntendela ndi tshi toolola mafhungo a Gidioni na Baraka na Simisoni na Jefutha na Dafita na Samuele na vhaporofita, 33vhe nga lutendo vha kunda mivhuso, vha vhea milayo kwayo, vha wana zwe Mudzimu a vha fulufhedzisa, ndau dzi pondaho vha dzi thivha milomo, 34vha dzima mulilo u dugaho, vha ponyoka pfumo, u shaya havho nungo ha shanduka nungo, vha vha vhahali nndwani, vha vilinganya mmbi dza maswina. 35Vhasadzi vho felwaho nga vha havho vha dovha vha vha ṱanganedza vho no vuswa vhafuni. Vhaṅwe vho ri u tambudzwa, naho nḓila ya u vhofholowa i hone vha landula, vha vhuya vha tou vhulawa, u ralo u landula hu u itela uri vha sale vha tshi vuwa vhafuni, vha wane vhutshilo ha khwiṋe. 36Vhaṅwe hafhu vha kolelwa vha rwiwa, vhaṅwe vha vhoxwa nga dzigeḓane vha yo hoṋelwa dzhele, 37vha kanḓwa nga matombo, vha sahiwa nga vhukati, vhaṅwe vha shidzhwa nga banga, vhaṅwe vha sokou tendeleka naḽo vho ambara mikumba ya nngu kana mbudzi, vha tshi shaya, vha tshi tambudzwa vha tshi ṱungufhadzwa. 38Shango ḽino ḽivhi ḽo vha ḽi songo fanela vhavhuya vho raloho. Vho shavhela phangani na thavhani vha dzumbama mapakoni na milindini.
39Havho vhoṱhe vho khoḓelwa lutendo lwavho; nangwe zwo ralo vho vha vha songo wana zwe vha fulufhedziswa. 40Ngani? Ndi uri Mudzimu o ri vhetshela zwa khwiṋe; o vha a sa funi vha tshi wana zwo khunyelelaho vhe vhoṱhe, o funa vha tshi zwi wana khathihi na riṋe.
