GENESI 3

₁Ṋowa yone yo vha yo thanya u fhira phukha dzoṱhe dza ḓaka dze Muṋe washu Mudzimu a dzi vhumba. Ya vhudzisa musadzi ya ri, “Nṋa vhukumakuma Mudzimu o amba a ri ni songo vhuya na ḽa na muri na muthihi u re tsimuni?”

₂Musadzi a fhindula ṋowa a ri, “Miri i re tsimuni ri a i ḽa, ₃hone Mudzimu o ri muri u re vhukati ha tsimu ri songo vhuya ra u ḽa, ri songo vhuya ra u kwama, ri sa ḓo fa.”

₄Ṋowa ya vhudza musadzi ya ri, “A si zwone, ni nga si fe na kathihi! ₅Ndi uri Mudzimu u a ḓivha uri arali na u ḽa ni ḓo bonyolowa na nga Mudzimu, na vho ḓivha zwivhuya na zwivhi.”

₆Ndi hone musadzi a tshi vhona uri uyo muri u a ḽiwa, na uri muthu a tshi u lavhelesa u a takadza nahone u a ṱoḓea uri muthu a wane vhuṱali; a u fula, a ḽa, a ṋea-vho na munna wawe we a vha e nae henefho, na ene a ḽa. ₇Ndi hone maṱo avho vhuvhili havho a tshi bonyolowa, vha thoma u vhona uri vha fhedzi; vha rungekanya maṱari a muhuyu, vha ḓiitela vhupila.

₈Nga madekwana hu tshi vho rotholela, munna na musadzi wawe vha pfa mutsindo wa Muṋe washu Mudzimu a tshi khou tshimbila tsimuni, vha dzhena mirini ya tsimu vha dzumbama Muṋe washu Mudzimu. ₉Hone Muṋe washu Mudzimu a vhidzelela muthu a ri, “U ngafhi?”

₁₀Ene a fhindula a ri, “Ndo u pfa u tsimuni, nda ofha, ngauri ndo vha ndi fhedzi. Ndi zwe nda dzumbama.”

₁₁Mudzimu a ri, “Ndi nnyi we a u vhudza uri u fhedzi? Izwi a wo ngo ḽa uḽa muri we nda ri u songo u ḽa?”

₁₂Muthu a ri, “Musadzi hoyu we vha mpha uri ndi dzule nae, ndi ene we a fula mutshelo kha muri a nṋea, nṋe nda ḽa.”

₁₃Ndi hone Muṋe washu Mudzimu a tshi vhudzisa musadzi a ri, “Wo ita zwithu-ḓe?”

Musadzi a fhindula a ri, “Ndo fhurwa nga ṋowa, nda ḽa.”

₁₄Mudzimu a vhudza ṋowa a ri, “Nge wa ita zwenezwo, wo teketelwa! Kha zwifuwo zwoṱhe na phukha dzoṱhe dza ḓaka ndi iwe fhedzi une wa ḓo kokovha nga thumbu, wa ḽa buse vhutshilo hau hoṱhe, nge wa ita hezwo! ₁₅Ndi ḓo u luṱanya na musadzi, na vhana vhau na vhawe vha ḓo vhengana; ṅwana wawe u ḓo u pwasha ṱhoho, iwe wa mu luma tshirethe.”

₁₆A tshi vhudza musadzi a ri, “Ndi ḓo andisa vhuṱungu hau u tshi beba vhana; u ḓo beba vhana u tshi tambula; tshau hu ḓo vha u ṱuvha munna wau; ene u ḓo u vhusa.”

₁₇A tshi vhudza munna a ri, “Iwe nge wa thetshelesa musadzi wau, wa ḽa muri we nda ri u songo vhuya wa u ḽa, mavu o teketelwa nga mulandu wau; vhutshilo hau hoṱhe u ḓo ḽa zwi bvaho khao nga u shuma wa tambula. ₁₈A ḓo u medzela mipfa na mitshutshungu; u ḓo ḽa zwimela zwa ḓaka. ₁₉U ḓo ḽa tsha biko, u swika u tshi vhuelela mavuni e wa bviswa khao; u buse, u ḓo vha buse.”

₂₀Adamu a ri musadzi wawe u pfi Efa, ngauri o vha mme a vhathu vhoṱhe. ₂₁Muṋe washu Mudzimu a itela Adamu na musadzi wawe zwiambaro zwa mukumba a vha ambadza.

₂₂Muṋe washu Mudzimu a ri, “Muthu zwino u vho nga riṋe, u vho ḓivha zwivhuya na zwivhi; a songo vhuya a tendelwa u swikisa tshanḓa tshawe na kha muri u ṋeaho vhutshilo, a u fula a ḽa, a vho ḓo tshila lini na lini.” ₂₃Muṋe washu Mudzimu a mu thatha tsimuni ya Edeni uri a lime mavu e a bviswa khao. ₂₄O ri u pandela muthu, afho phanḓa ha tsimu ya Edeni a vhea vhakherube, na banga ḽa khavhu ya mulilo ḽi no penyisa phanḓa na murahu, u linda nḓila i yaho murini u ṋeaho vhutshilo.