VHAGALATA 5

₁Khristo o ri vhofholola ra vhofholowa tshoṱhe. Imani-ha no khwaṱha, ni si tende u dovha na hweswa muhwalo wa vhupuli.

₂Thetshelesani ndi ni vhudze: nṋe Paulo ndi ri arali na tenda u fumba, Khristo ha tsha ni farisa tshithu. ₃Ndi dovha nda tou ombedzela nda ri: ane a vhuya a tenda u fumba, a zwi ḓivhe uri o ḓivhofha u khunyeledza Mulayo woṱhe wa Mushe. ₄Inwi vhane na ṱoḓa u pfi vhavhuya nga u khunyeledza Mulayo no no ḓi ḓitumula kha Khristo, no ḓishaisa tshilidzi tsha Mudzimu. ₅Riṋe tshashu ndi u lavhelela u pfi vhavhuya nga lutendo, zwa bveledzwa nga maanḓa a Muya. ₆Arali u muthihi na Khristo Yesu u fumba na u sa fumba a zwi tshee na mushumo; tshililelwa ndi tshithihi: ndi lutendo lune mitshelo yalwo ya vhonala kha lufuno.

₇No vha no fara nḓila yone-yone. Zwino o ni pambusaho nḓilani ya ngoho ndi nnyi? ₈O ni xedzaho a si Mudzimu; Ene o tou ni vhidza. ₉Ḓivhani uri mbilisa i si gathi i kukumusa bwindi ḽoṱhe. ₁₀Vhunga ri vhalanda vha Muṋe washu ndi na fulufhelo ḽa uri na inwi ni ḓo vhona zwi zwone, na ima na nṋe. Nahone ane a vhuya a ni vilinganya, ṱhamu yawe u ḓo i wana. ₁₁Zwino-ha vha hashu, arali ndi tshi kha ḓi ḓivhadza uri vhathu vha fumbe ndi kha ḓi tovholelwani? Arali zwo vha zwi zwone, izwo-ha tshifhambano tsha Khristo a tshi tsha khukhulisa muthu. ₁₂Vhenevho vhakulumedzi khefha vha sa mbo ḓi tou ḓiluvhedza vhone vhaṋe!

₁₃Vha hashu, a vha inwi no vhidzelwa u vha vho vhofholowaho. Tenda iyo mbofholowo yaṋu i sa ḓo vha swiswimbadise na vho ḓo tevhela zwa nyemulo dzaṋu, tshaṋu nga hu vhe u shumelana nge na funana. ₁₄Hufha Mulayo woṱhe wo angaredzwa nga ndaela hei nthihi i no ri, “Funa vhaṅwe unga iwe muṋe.” ₁₅Hone arali ni tshi huvhadzana na pondana sa dziphukha ni vhone ni sa ḓo fhedzana.

₁₆Ndi tshi ralo ndi ri: inwi tshimbidzwani nga Muya, ndi hone ni sa ḓo ita zwi funwaho nga tsiko yaṋu ya kale. ₁₇Zwine tsiko ya muthu ya zwi funa a zwi anḓani na zwi funwaho nga Muya; hu ḓi nga zwi funwaho nga Ene Muya zwi sa anḓani na zwi funwaho nga tsiko ya muthu. Hezwi zwivhili a zwi anḓani, zwine zwa amba uri ni nga si sokou ita zwine na funa. ₁₈Zwino-ha arali ni tshi vhuswa nga Ene Muya a ni tsha vhuswa nga Mulayo wa Mushe.

₁₉Zwine tsiko ya muthu ya ita zwi khagala: ndi vhupombwe, ndi vhuaḓa, ndi vhuḓabaḓaba, ₂₀ndi u rerelela midzimu, ndi manditi, ndi vhuswina, ndi dziphambano, ndi vivho, ndi mbiti, ndi tseḓa, ndi u fhandekana ha bva zwigwada, ₂₁ndi u vhivhana, ndi u nwa na u ḽela vhuḓabaḓaba na zwi ngaho zwenezwo. Ndo no ḓi ni vhudza, zwino ndi khou dovha ndi ri ni vhone: vhane vha ita zwo raloho a vha nga vhi na tshavho muvhusoni wa Mudzimu.

₂₂Hone mutshelo wa Muya ndi lufuno na dakalo na mulalo na u sa fhela mbilu na vhulenda na vhuthu na u fulufhedzea ₂₃na u vuḓa na u ḓifara. A hu na mulayo une wa lwa na zwenezwo. ₂₄Huno vha re vha Khristo Yesu vho vhulaha tshiko yavho ya kale, na zwine ya tama na dzinyemulo dzayo, nga u i vhamba tshifhambanoni. ₂₅Muya ndi Ene o ri ṋeaho vhutshilo; kha a vhe Ene-ha ane a ri langa. ₂₆Ri songo ṱonga kana ra sinyusana kana ra vhengana.