VHAGALATA 2

₁Ngavhuya, ho no fhela miṅwaha ya 14, ndi hone ndi tshi dovha nda gonya Jerusalema ndi na Barnabasi, ra ṱuwa na Titosi. ₂Ndo ya hone nge Mudzimu a nnzumbululela uri ndi ye. Nde u swika nda songa mutumba na vhe vha vha vha tshi itwa vharangaphanḓa, nda vha ṱalutshedza pfunzo ya musi ndi tshi ḓivhadza vhannḓa mafhungo maḓifha, hu u itela uri mushumo we nda shuma, une nda kha ḓi vha khawo zwino, u sa ḓo vha wa lwa mahandana. ₃Hone naho khonani yanga Titosi e Mugiriki ho ngo kombetshedzwa u fumba ₄nangwe vhaṅwe vho vha vha tshi funa zwi tshi ralo. Vhenevho vho ḓisusumedza vha ḓiita vhathihi na riṋe khole-khole vha tshi ri vha ri vhonolole riṋe ro vhofhololwaho nga Khristo, uri vha ri humisele kha vhupuli. ₅Hone hezwo a ro ngo vhuya ra zwi tendela na kathihi, hu u itela u ni vhulungela ngoho ya mafhungo maḓifha aya.

₆Arali vhe vhaḽa vhe vha vha vha tshi itwa vharangaphanḓa vha tshivhidzo – zwe vha vhuya vha vha zwone kale a zwi nndini; Mudzimu ha sedzi lukanda lwa muthu – vhenevho vharangaphanḓa a hu na maṅwe maswa e vha vhuya vha mmbudza. ₇Zwe vha zwi vhona ndi uri Mudzimu o nkumedza mushumo wa u ḓivhadza mafhungo maḓifha kha vhannḓa sa zwe Pitrosi a kumedzwa mushumo wa u a ḓivhadza kha Majuda. ₈Onoyo Mudzimu we a shuma nga Pitrosi e muapostola wa Majuda, ndi Ene we a shuma nga nṋe ndi muapostola wa vhannḓa. ₉Zwino-ha Jakopo na Kefasi na Johanisi vhe vha vha vha tshi pfi thikho dza tshivhidzo vha tshi vhona zwe Mudzimu a ntendela u shuma nga vhuthu hawe, vha khaḓana na nṋe na Barnabasi hu u sumbedza vhuthihi havho na riṋe. Ra pfana uri riṋe ri yo shuma kha vhannḓa, vhone vha shume kha Majuda. ₁₀Tshe vha ri humbela ndi uri ri songo hangwa vhashai vhavho – tshone-ha tshe na nṋe nda vha ndi tshi khou lwela tshone.

₁₁Musi Pitrosi a tshi swika Antiokia nda tou mu hanedza vhathu vha tshi zwi pfa, ngauri zwo vha zwi khagala uri u khou khakha. ₁₂Hufha u thomani o vha a tshi ḓi ḽa na Vhakhriste vha si Majuda, huno ho no swika vhaṅwe vha bvaho ha Jakopo a vho sendela murahu a si tsha funa u ḽa navho, nga u ofha vhaḽa vhane vha ombedzela zwa u fumba. ₁₃Ndi hone na vhaṅwe Vhakhriste vha Majuda vha tshi vho ita muhoyo, lwe na Barnabasi a vho dzhena kha zwa muhoyo. ₁₄Nṋe ndi tshi vhona uri a vha khou tevhedza ngoho ya mafhungo maḓifha nda amba na Pitrosi vhoṱhe vha tshi zwi pfa nda ri, “Vhone vha Mujuda hone a vha tshili sa Mujuda, vha tshila sa wannḓa, zwino ndi mini vha tshi kombetshedza vhannḓa uri vha tevhedze maitele a Majuda?”

₁₅Riṋe ro bebwa ri Majuda, a ri vhannḓa vhaitazwivhi. ₁₆Naho zwo ralo ri a zwi ḓivha uri muthu ha pfi muvhuya nga u ita zwine Mulayo wa Mushe wa amba, ri tshidzwa nga u ḓikumedza Yesu Khristo fhedzi. Ngauralo na riṋe ro ḓikumedza Yesu Khristo, uri ri pfi vhavhuya nga honoho u ḓikumedza hashu Khristo, hu si nga u ita zwine Mulayo wa amba. A hu na muthu wa ṋama ane a nga pfi muvhuya nga u ita zwine Mulayo wa amba.

₁₇Zwino-ha arali na riṋe vhane ra ṱoḓa u pfi vhavhuya nga Khristo ri tshi wanala ri vhatshinyi sa vhannḓa, kani-ha zwi amba uri Khristo o no vha muṱuṱuwedzi wa vhutshinyi? A zwo ngo ralo na kathihi! ₁₈A si u pfuka Mulayo arali ndi tshi ri u thutha tshithu nda dovha nda tshi fhaṱa naa? ₁₉Huno-ha nṋe siani ḽa Mulayo ndo fa, ndo vhulawa nga wone Mulayo, zwino ndi vho kona u tshilela Mudzimu.

Zwiḽa Khristo a tshi vhambiwa tshifhambanoni, ho vha u vhambwa hanga-vho; ₂₀zwino a hu tsha tshila nṋe, a tshilaho kha nṋe ndi Khristo. Hovhu vhutshilo vhune nda kha ḓi vha khaho zwino ndi tshila nga u ḓikumedza Murwa wa Mudzimu, we a mpfuna a kumedza vhutshilo hawe a fa nga mulandu wanga. ₂₁A thi funi u landula vhuthu ha Mudzimu. Arali muthu a tshi nga pfi muvhuya nga u tevhedza Mulayo wa Mushe, izwo-ha Khristo o fa lwa mahandana.