ESEKIELE 6

₁Ipfi ḽa Muṋe washu ḽo amba na nṋe ḽi tshi ri, ₂“Iwe ṅwana wa muthu, sedza thavha dza Israele u porofite zwine zwa ḓo dzi wela. ₃U ambe u ri, ‘Inwi thavha dza Israele, ipfani ipfi ḽa Muṋe wa zwoṱhe Yahavee. Muṋe wa zwoṱhe Yahavee a tshi amba na dzithavha na mivhundu na milambo na magovha u ri: Thetshelesani, ndi ḓo ni rambela pfumo, nda phusukanya vhurerelo haṋu miṱumbani. ₄Aḽiṱari dzaṋu dzi ḓo thuthekanywa, aḽiṱari dza u dubisela zwioro dza pwashekanywa, nda posa zwitumbu zwa vhathu vha rerelelaho kha inwi henefho phanḓa ha midzimi yaṋu ya mathukhwi, ₅marambo avho a ḓo balanganywa u mona na aḽiṱari dzaṋu. ₆Shangoni ḽaṋu ḽoṱhe miḓi i ḓo phusukanywa, aḽiṱari dzaṋu dza thuthwa, zwivhanga zwa sala zwi si na muthu, e matumba, midzimu yaṋu ya zwifanyiso ya pwashiwa i si tsha vha hone, dziaḽiṱari dzaṋu dza u fhisela zwioro dza pwashekanywa, zwithu zwoṱhe zwe na ḓiitela zwa lozwiwa tshoṱhe. ₇Vhukati haṋu hu ḓo wa vho vhulawaho nga pfumo. Ndi hone ni tshi ḓo ḓivha uri ndi Nṋe Yahavee.

₈“ ‘Hone vhaṅwe vhaṋu ndi ḓo vha tshidza; vha ḓo ponyoka pfumo, nda vha balanganya na dzitshakha. ₉Tsalela dzaṋu dzi ḓo nnyelelwa dzi vhukati ha dzitshakha he vha hwalwa vha iswa hone. Ndi ḓo vha ndo vunḓekanya mbilu dzavho dzi no ṱolou ntshandukela, nda swingisa maṱo avho a no ṱolou ntshandukela ane a emula midzimu ya dzitshikha unga phombwe i tshi emula munna a si wayo. Vha ḓo ḓinengwa vha tshi humbula vhutshinyi hoṱhe na zwi nengisaho zwe vha ita. ₁₀Ndi hone vha tshi ḓo ḓivha uri ndi Nṋe Yahavee; ndo amba, thi swaswi, ndi ri khombo hedzo dzoṱhe dzi ḓo vha wela.’ ”

₁₁Muṋe wa zwoṱhe Muṋe washu u ri, “Vhandani zwanḓa, giḓani fhasi nga milenzhe, ni ri, ‘Ri lilela vhuvhi hoṱhe vhu nengisaho ha vhathu vha Israele vhane vha ḓo ṱuwa vha tshi ḽiwa nga pfumo na nḓala na dwadze.’ ₁₂Vha re kule vha ḓo fa nga dwadze, vha re tsini vha ḓo vhulawa nga pfumo, vho salaho vho govhelwa vha ḓo fa nga nḓala; mbiti dzanga dzi ḓo fhelela khavho nga u ralo. ₁₃Ndi hone ni tshi ḓo zwi ḓivha uri ndi Nṋe Yahavee musi vho faho nga pfumo vho lala henefho vhukati ha midzimu yavho ya dzitshika u mona na aḽiṱari dzavho, muvhunduni muṅwe na muṅwe, muṱumbani wa thavha iṅwe na iṅwe, fhasi ha muri muṅwe na muṅwe wo adzaho, fhasi ha muri muṅwe na muṅwe wa tshimvingimvingi, hoṱhe hune vha dubisa zwioro vha tshi itela midzimu yavho yoṱhe ya dzitshika. ₁₄Ndi ḓo angaladza tshanḓa tshanga nda vha rwa, nda phusukanya shango ḽa sala ḽi si na muthu u bva phangani u swika Ribila, hoṱhe hu no dzula vhathu; ndi hone vha tshi ḓo zwi ḓivha uri ndi Nṋe Yahavee.”