ESEKIELE 43

₁Uyo munna a nnzhia a nnyisa khoroni yo lavhelesaho vhubvaḓuvha. ₂Nda vhona vhugala ha Mudzimu wa Israele vhu tshi ḓa vhu tshi bva vhubvaḓuvha. Ha pfala mubvumo u no nga mubvumo wa maguvhukuvhu manzhi, ḽifhasi ḽa penya nga vhugala hawe. ₃Bono heḽo ḽo vha ḽi tshi nga ḽe nda ḽi vhona musi ndo ḓela zwa u phusukanywa ha muḓi, na ḽe nda ḽi vhona tsini ha mulambo wa Khebara. Zwenezwo nda wa nga tshifhaṱuwo.

₄Vhugala ha Muṋe washu ha dzhena thembeleni nga khoro ya vhubvaḓuvha. ₅Muya a ntakulela nṱha, a mmbea muṱani wa ngomu; nda vhona vhugala ha Muṋe washu ho tou ḓadza thembele. ₆Nda pfa muṅwe a tshi amba na nṋe e thembeleni, uyo munna a tshee o ima tsini hanga. ₇Ipfi ḽa ri, “Iwe ṅwana wa muthu, hafhano ndi fhethu ha khuluṋoni yanga, ndi hune nda kanda nda awedza milenzhe yanga. Ndi ḓo dzula henefha vhukati ha Vhaisraele lini na lini; nahone vhathu vha Israele, vhone na mahosi avho, a vha tsha ḓo dovha vha shata dzina ḽanga ḽikhethwa tshika nga vhupombwe havho na zwitumbu zwa mahosi avho vha tshi vha swiṱa fhano ₈nga u vhandekanya zwiukhuvha zwavho na zwanga, vha vhandekanya mihangammbwa yanga na yavho, ha tou sala mutsheṱo fhedzi wa u fhandekanya Nṋe na vhone. Vho vha vha tshi ṱolou shata dzina ḽanga ḽikhethwa tshika nga zwiito zwavho zwi nengisaho, ndi zwe nda vha lozwa ndo sinyuwa. ₉U bva zwino vha ḓo laṱa vhupombwe na zwitumbu zwa mahosi avho nda si tsha zwi vhona, Nṋe nda ḓo konou dzula vhukati havho lini na lini.

₁₀“Iwe ṅwana wa muthu, vhudza vhathu vha Israele nga thembele hei vha sedze nzudzanyo yayo, uri vha shone vha tshi elelwa zwe vha tshinya. ₁₁Zwino arali vha tshi shona nga u elelwa maitele avho, vha sumbedze nzudzanyo ya thembele: kufhaṱelwe kwayo, miṋango yayo ya u bva na ya u dzhena, tshivhumbeo tshayo, milayo yayo yoṱhe na ndaela dzayo. Hezwo zwoṱhe itou vha ṅwalela zwone uri vha kone u zwi vhona vha tevhedze nzudzanyo yayo na ndaela dzayo dzoṱhe. ₁₂Hoyu ndi mulayo wa thembele: U mona hoṱhe nṱha ha thavha ndi hukhethwakhethwa. Mulayo wa thembele wo tou ralo.”

₁₃Mielo ya aḽiṱari ngei, hu tshi eliwa nga muelo wonouḽa we wa ela thembele. Hoṱhe u mona na muteo wa aḽiṱari ho vha hu na gathara ine ya ita ḽiga ḽithihi u tsa fhasi na ḽiga ḽithihi u aṱama, na lubomo lumemeni lwa nnḓa lu tshi ita hafu ya ḽiga. ₁₄U bva lubomoni lwa gathara u swika nṱha ha muteo, ho vha hu maga mavhili u lapfela nṱha. Sia ḽi tevhelaho ḽo vha ḽo humela murahu ha lumeme nga ḽiga ḽithihi u mona hoṱhe ḽa gonya nga maga maṋa. Sia ḽi tevhelaho iḽo na ḽone ḽo vha ḽo humela murahu u bva lumemeni nga ḽiga ḽithihi u mona hoṱhe. ₁₅Tombo ḽa nṱha hune ha fhiswa zwiṱhavhelo, na ḽone ḽo vha ḽi maga maṋa u ya nṱha. Nga nṱha ḽo guma nga ṋanga dza aḽiṱari. ₁₆Iḽo tombo ḽa nṱha ḽo vha ḽi tshi eḓana masia oṱhe maṋa, sia ḽiṅwe na ḽiṅwe ḽi maga a 12. ₁₇Tombo ḽa vhukati na ḽone ḽo vha ḽi tshi eḓana masia oṱhe maṋa, sia ḽiṅwe na ḽiṅwe ḽi maga a 14, na lubomo lwa lumemeni lwa nnḓa lu tshi ita hafu ya ḽiga u ya nṱha. (Gathara yo vha i ḽiga ḽithihi u aṱama.) Zwiṱepisi zwi no gonya aḽiṱarini zwo vha zwi sia ḽa vhubvaḓuvha.

₁₈Muṋe wa zwoṱhe Muṋe washu a mmbudza a ri, “Iwe ṅwana wa muthu, Nṋe ndi ri: Musi aḽiṱari yo fhela u fhaṱwa, milayo ya zwiṱhavhelo zwi fhiswaho na u handulula nga malofha nṱha ha aḽiṱari ndi heino: ₁₉Vhotshifhe vha Vhalivi, vha lutsinga lwa Tsadoko vhane vha sendela tsini hanga uri vha ntshumele – hu amba Nṋe Muṋe wa zwoṱhe Yahavee – no fanela u vha ṋea mbohwana i vhe tshiṱhavhelo tsha tshipfumelo. ₂₀Ni dzhie malofha ayo ni a vhee kha ṋanga nṋa na khuḓani nṋa dza tombo ḽa vhukati ḽa aḽiṱari na lumemeni lwo monaho hoṱhe. U ralo hu ḓo vha u kumulula aḽiṱari ya sa tsha hwala vhutshinyi. ₂₁Ni kone-ha u dzhia mboho ya tshiṱhavhelo tsha tshipfumelo ni i fhise nnḓa ha thembele kule na hukhethwa. ₂₂Nga ḓuvha ḽi tevhelaho ni ṋekedze mbokoṱo i si na badzi, na i ita tshiṱhavhelo tsha tshipfumelo, aḽiṱari ya dovha ya kumululwa unga zwiḽa i tshi kumululwa nga mboho. ₂₃Musi no no fhedza u kumulula ni ṋekedze mbohwana i si na badzi na thutha i si na luvhadzi yó nangwa kha sambi ḽa nngu. ₂₄Zwenezwo ni zwi ṋekedze Nṋe Yahavee, vhotshifhe vha zwi shele muṋo vha zwi ṋekedze Nṋe tshi vhe tshiṱhavhelo tshi fhiswaho. ₂₅Ni ṋekedze mbokoṱo na mboho na thutha i si na luvhadzi i no bva kha sambi ḽa nngu, tshi vhe tshiṱhavhelo tsha tshipfumelo, musi muṅwe na muṅwe zwi vhuye zwi ite maḓuvha maṱanu na mavhili ₂₆hu vhuye hu fhele vhege. Ngauralo aḽiṱari i ḓo vha yo kumululwa ya sa tsha hwala vhutshinyi, yo hangulwa. ₂₇Maḓuvha eneo o no fhela, u thoma nga ḓuvha ḽa vhuṱanu na vhuraru u ya phanḓa, vhotshifhe vha ṋekedze zwiṱhavhelo zwaṋu zwi fhiswaho na nduvho dza vhukonani nṱha ha aḽiṱari, ndi hone ndi tshi ḓo ni takalela – hu amba Nṋe Muṋe wa zwoṱhe Yahavee.”