ESEKIELE 42

₁Uyo munna a nnzhia a nnyisa muṱani wa nnḓa thungo ya devhula a nnzhenisa muṱani a ntshimbidza nda ya rumuni yo lavhelesaho muṱa wa nnḓa, i re devhula ha iyo nnḓu. ₂Vhunavha hayo ho vha hu maga a ḓana sia ḽa devhula, u aṱama e maga a 50. ₃Nnḓu iyo yo vha yo vhandekana na tshikhala tsha maga a 20 tshi re tsini ha guḓa ḽa ngomu, na tshipiḓa tsha muṱa wa thembele tsho vhandekanaho na guḓa ḽa nnḓa. Yo vha i na zwitizi zwiraru. ₄Phanḓa ha dzirumu ho vha hu na mukoto wa vhuphara ha maga a fumi nga ngomu na vhunavha ha maga a ḓana, vothi ḽawo ḽo vha ḽo sedza devhula. ₅Rumu dza nṱha dzo vha dzo sekena ngauri idzo nnḓu dzo vha dzo dzhielwa vhuphara nga zwitizi, dza sekena u fhira dza fhasi kana dzi re vhukati ha nnḓu, ₆vhunga dzo vha dzo fhandekanywa nga zwitizi zwiraru, dzi si na phuphu dzi no nga dza muṱa. Ndi zwe dza vha dzo sekena u fhira dza fhasi kana dza vhukati dzi re fhasi hadzo. ₇Luvhondo lwa nnḓa lwo vhambelaho na idzo rumu, lwa lavhelesana nadzo sia ḽiḽa ḽa muṱa wa nnḓa, vhunavha halwo ho vha hu maga a 50. ₈Vhunavha ha dzirumu dzo lavhelesaho muṱa wa nnḓa dzo ṱangana ho vha vhu maga a 50, ngeno sia ḽo lavhelesaho thembele vhu maga a ḓana. ₉Rumu dza fhasi dzo vha dzi na muṋango sia ḽa vhubvaḓuvha u tshi dzhena u tshi bva muṱani wa nnḓa.

₁₀Ngomu ha luvhondo ludenya lwa muṱa wa nnḓa, sia ḽa tshipembe u lavhelesana na muṱa wa nnḓu, ho vha hu na dzirumu. ₁₁Ho vha hu na luḓila lu re phanḓa hadzo, u ḓi nga dzirumu dzo fhaṱwaho sia ḽa devhula; dzo vha dzi na vhunavha na vhuphara vhu eḓanaho, dzi tshi fana miṋango na mahothi adzo, ngomu na nnḓa. ₁₂Dzo vha dzi tshi nga miṋango ya rumu dza devhula, hú na muṋango muthihi magumoni a luḓila luṅwe na luṅwe, u vhambela na mutsheṱo wa vhubvaḓuvha musi muthu a tshi dzhena. ₁₃Uyo munna a mmbudza a ri, “Dzirumu dza devhula na dza tshipembe dzo lavhelesaho muṱa ndi rumu khethwa, hune vhotshifhe vhane vha swika phanḓa ha Yahavee vha ḓo ḽa zwikhethwakhethwa. Ngomu hadzo hu ḓo vhewa zwikhethwakhethwa: nduvho ya thoro na nduvho ya u pfumelelwa vhutshinyi na nduvho ya ndifho, ngauri fhethu hafho ndi hukhethwa. ₁₄Vhotshifhe vha vhuya vha dzhena Hukhethwa a vha bvi kana vha dzhena muṱani wa nnḓa vha sa athu bvula zwiambaro zwine vha shumela vhathu vho zwi ambara, ngauri izwo zwiambaro ndi zwikhethwa; vha fanela u ambara zwiṅwe vha sa athu ya fhethu ho itelwaho vhathu.”

₁₅Musi uyo munna o no fhedza u ela thembele nga ngomu, a nnzhia a nnyisa khoroni ya vhubvaḓuvha, a ela u adza hoṱhe ha muṱa. ₁₆A thoma u ela sia ḽa vhubvaḓuvha nga luṱanga lwawe lwa u ela: zwo ṱangana zwoṱhe zwa ita maga a 500 nga luṱanga lwa u ela. ₁₇A konou ela sia ḽa devhula: zwa ita maga a 500 nga luṱanga lwa u ela. ₁₈A konou ela sia ḽa tshipembe: zwa ita maga a 500 nga luṱanga lwa u ela. ₁₉A monela sia ḽa vhukovhela a ela maga a 500 nga luṱanga lwa u ela. ₂₀A ela mutsheṱo woṱhe wo fhaṱeledzaho masia oṱhe maṋa: vhunavha maga a 500, vhuphara maga a 500, u tshi fhandekanya zwikhethwa na swi si zwikhethwa.