ESEKIELE 37

₁Ndo pfa tshanḓa tsha Muṋe washu tshi tshi khou ntsikeledza, a nkhwala a ṱuwa na nṋe nga Muya wa Muṋe washu, a mmbea fhasi vhukati ha govha; ḽo vha ḽo ḓala marambo. ₂A ntshimbidza ndi tshi ya nṱha na fhasi vhukati hao. Marambo ayo o vha o ḓala na govha; o vha o oma o tou kwatsha. ₃A mmbudzisa a ri, “Iwe ṅwana wa muthu, aya marambo a nga tshila naa?” Nṋe nda ri, “Hu ḓivha Iwe Muṋe wa zwoṱhe Muṋe washu.” ₄Ene a ri, “Porofita u tshi amba na marambo haya, u a vhudze u ri, ‘Inwi marambo o omaho, ipfani ipfi ḽa Yahavee. ₅Muṋe wa zwoṱhe Yahavee a tshi vhudza marambo aya u ri: Zwino ndi ḓo longa mufemo ngomu haṋu na tshila. ₆Ndi ḓo longa misipha kha inwi, nda medza ṋama kha inwi, nda ni ambadza lukanda, nda ni ṋea mufemo na tshila, ndi hone ni tshi ḓo zwi ḓivha uri ndi Nṋe Yahavee.’ ”

₇Nṋe nda mbo porofita nga he nda vhudzwa. Musi ndi tshi khou porofita ha pfala phosho, mubvumo wa zwithu zwi tshi kuḓana, aḽa marambo a mbo ḓi ṱumekana. ₈Nda sedza, nda vhona o tibedzwa nga misipha, ha mela ṋama khao, a ambara lukanda, hone o vha a si na mufemo ngomu hao.

₉Mudzimu a amba na nṋe a ri, “Amba na muya wa vhutshilo, iwe ṅwana wa muthu, porofita! Vhudza muya u ri, ‘Muṋe wa zwoṱhe Yahavee u ri: Iwe muya, iḓa u tshi bva kha mimuya ya khuḓa nṋa, vhudzulela kha vhafu havha vha tshile!’ ” ₁₀Nṋe nda porofita nga he nda vhudzwa, muya wa dzhena khao; vha dovha vha tshila, vha takuwa vha ima nga milenzhe yavho, ya vha mmbi khulu-khulu.

₁₁Ndi hone Mudzimu a tshi ri, “Iwe ṅwana wa muthu, haya marambo ndi vhathu vhoṱhe vha Israele. Vha ḓi ṱolou ri, ‘Marambo ashu o oma o tou kwatsha, a ri tshee na tshe ra fulufhela, zwi ḓi fana na musi ro fa.’ ₁₂Zwenezwo porofita u vha vhudze u ri, ‘Muṋe wa zwoṱhe Yahavee u ri: Zwino ndi ḓo vula zwalo zwaṋu, inwi vhathu vhanga, nda ni tshimbidza na humela mavuni a Israele. ₁₃Ndi hone ni tshi ḓo zwi ḓivha uri ndi Nṋe Yahavee, musi ndi tshi vula zwalo zwaṋu, nda ni vusa na bva zwaloni zwaṋu, inwi vhathu vhanga. ₁₄Ndi ḓo longa Muya wanga ngomu haṋu na tshila, nda ni dzudza shangoni ḽa haṋu, ndi hone ni tshi ḓo zwi ḓivha uri ndi Nṋe Yahavee. Hezwi ndo zwi amba, ndi ḓo zwi ita – hu amba Nṋe Yahavee.’ ”

₁₅Ipfi ḽa Muṋe washu ḽo amba na nṋe ḽa ri, ₁₆“Iwe ṅwana wa muthu, dzhia lubaḓa u ṅwale khalwo u ri, ‘Juda na havhaḽa Vhaisraele vhane vha ima nae.’ Dovha u dzhie luṅwe lubaḓa u ṅwale khalwo u ri, ‘Josefa, ene Efraimi na vhathu vhoṱhe vha Israele vhane vha ima nae.’ ₁₇Ṱumekanya vhutanda uho vhu nge tshipiḓa tshithihi tsha thanda, lu nge lubaḓa luthihi lwe wa lu fara nga tshanḓa. ₁₈Musi vha lushaka lwa hau vha tshi ri, ‘Ri vhudze zwine wa amba zwone,’ ₁₉iwe u vha vhudze u ri, ‘Muṋe wa zwoṱhe Yahavee u ri: Ndi khou dzhia lubaḓa lwa Josefa, lune zwino lwa vha tshanḓani tsha Efraimi, na vha matsinde haaḽa a Israele vhane vha ima nae, ndi ḓo vhea lubaḓa lwa Juda navho. Mbaḓa idzo mbili ndi ḓo dzi ita lubaḓa luthihi, nda dzi fara dza vha lubaḓa luthihi tshanḓani tshanga.’ ₂₀Idzo mbaḓa mbili dze wa dzi ṅwala dzi fare nga tshanḓa uri vha kone u dzi vhona, ₂₁u vha vhudze u ri, ‘Muṋe wa zwoṱhe Yahavee u ri: Ndi ḓo dzhia Vhaisraele nda vha bvisa kha dzitshakha dze vha ya khadzo. Ndi ḓo vha kuvhanganya vha tshi bva hoṱhe-hoṱhe, nda vha vhuisa hayani mavuni avho. ₂₂Ndi ḓo vha ita lushaka luthihi shangoni, thavhani dza Israele, vhoṱhe vha vha na khosi nthihi, a vha tsha ḓo vha tshakha mbili, a vha tsha ḓo fhambana vha vha na mivhuso mivhili, ₂₃a vha tsha ḓo ḓishata tshika nga midzimu yavho ya tshika na zwiito zwavho zwi nengisaho na zwivhi zwavho zwoṱhe. Ndi ḓo vha lamukisa kha vhutshinyi havho hoṱhe he vha ntshandukela ngaho. Ndi ḓo vha ṱanzwa tshika; vha ḓo vha vhathu vhanga, Nṋe nda vha Mudzimu wavho. ₂₄Mulanda wanga Dafita u ḓo vha vhusa, u ḓo vha mulisa wavho vhoṱhe; vha ḓo tevhedza ndayo dzanga, vha vhulunga milayo yanga vha i pfa. ₂₅Vha ḓo dzula shangoni ḽe nda ḽi ṋea mukoma wanga Jakopo, shango ḽe ḽa vha ḽi tshi dzula vhokhotsi aṋu. Vha ḓo dzula khaḽo lini na lini, vhone na vhana vhavho na vhana vha vhana vhavho. Dafita mukoma wanga u ḓo vha muvhusi wavho lini na lini. ₂₆Ndi ḓo vhofha mulanga wa mulalo navho, u ḓo vha mulanga wa lini na lini. Ndi ḓo dovha nda vha dzudzanya, nda vha andisa; ndi ḓo vhea nnḓu yanga khethwa vhukati havho ya ima lini na lini. ₂₇Vhudzulo hanga vhu ḓo vha henefho khavho; ndi ḓo vha Mudzimu wavho, vhone vha vha vhathu vhanga. ₂₈Ndi hone tshakha dzi tshi ḓo zwi ḓivha uri ndi Nṋe Yahavee we nda ḓikhethela Israele, musi nnḓu yanga khethwa i navho lini na lini.’ ”