ESEKIELE 18

₁Ipfi ḽa Muṋe washu ḽa amba na nṋe ḽa ri, ₂“Ndi mini ni tshi ḓi dovholola murero uyu fhano shangoni ḽa Israele ni tshi ri,

₅“A fulufhedzeaho u tevhedza mulayo nga u fulufhedzea; ₆ha ḽi zwiṱhavhelo nṱha ha dzithavha kana a fulufhela midzimu ya tshika ya vhathu vha Israele, ha ṱonḓoli musadzi wa muṅwe kana a dzhenisa musadzi nḓuni a tshi khou vhona ṅwedzi. ₇Ha kandeledzi vhaṅwe, u humisa tsho farelwaho thundu ye muṅwe a pamba, ha tswi, vha re na nḓala u vha ṋea zwiḽiwa zwawe, vha na tsiku a vha fha zwiambaro zwawe. ₈A tshi adzima muṅwe tshelede ha bindulisi, ha ṱanganedzi mavhoḓa a tshelede, u ḓiilisa vhuvhi, u haṱula vhathu a sa ṱaluli, ₉u vhulunga milayo yanga, a fulufhedzea a si pfuke ndayo dzanga – onoyo munna, vhukuma ha na mulandu, u ḓo tshila. Hu amba Nṋe Yahavee.

₁₀“Huno arali e na ṅwana a sa ḓivhalei ane a shulula malofha, a ita vhuṅwe ha vhuvhi honoho, ₁₁ngeno khotsi awe vha sa athu vhuya vha ita vhuvhi honoho, ṅwana a ḽa zwiṱhavhelo zwa midzimu nṱha ha thavha, a ṱonḓola musadzi wa muṅwe, ₁₂a kandeledza vhashai na vhaheḓana, a tswa, a si humise tsho farelwaho thundu ye ya pambiwa, a fulufhela midzimu ya tshika, a ita zwi nengisaho, ₁₃a tshi adzimisa tshelede a bindulisa, a ṱanganedza nzwalelo yayo, vhukumakuma ṅwana onoyo a nga si tshile; a ita vhutshinyi honoho vhu ofhisaho vhukuma u ḓo fa, malofha awe a vha nṱha ha ṱhoho yawe ene muṋe.

₁₄“Huno arali uyo muthu e na ṅwana wa mutukana, ane naho a tshi vhona vhuvhi hoṱhe he khotsi awe a ita, a si mu edzise, ₁₅a si ḽele zwiṱhavhelo zwa midzimu nṱha ha thavha kana a fulufhela midzimu ya tshika ya vhathu vha Israele, a si ṱonḓole musadzi wa muṅwe, ₁₆a si kandeledze vhaṅwe, a si dzhie tsho farelwaho thundu yo pambiwaho, a si tswe, a dzhia zwiḽiwa zwawe a zwi ṋea vha re na nḓala, vha na tsiku a vha shavhedza, ₁₇a ḓiilisa vhuvhi, a tshi adzimisa thundu a si bindulise kana a ṱanganedza nzwalelo ya tshelede, a tevhedza ndayo dzanga, a vhulunga milayo yanga, onoyo ha nga feli vhuvhi ha khotsi awe, vhukumakuma ṅwana onoyo u ḓo tshila. ₁₈Zwino nge khotsi a vha ḽivemu, a ṱangula vhaṅwe, a si vhuye a ita zwivhuya vhathuni, onoyo u ḓo fela vhuvhi hawe. ₁₉Hone inwi ni a hanedza ni ri, ‘Ndi mini ṅwana a sa tambudzelwi vhuvhi ha khotsi awe?’ Nṋe ndi ri: Hufha uyo ṅwana o vha a tshi ita zwi re zwone, a tshi fulufhedzea, a tshi vhulunga milayo yanga yoṱhe a i tevhedza, vhukumakuma onoyo u ḓo tshila. ₂₀Muthu we a tshinya ndi ene ane a fanela u fa; ṅwana ho ngo fanela u tambulela vhutshinyi ha khotsi awe, na khotsi ho ngo fanela u tambulela vhutshinyi ha ṅwana wawe. A no fulufhedzea u ḓo tondelwa u fulufhedzea hawe, muvhi a lifhedzelwa vhuvhi hawe.

₂₁“Huno arali muvhi a laṱa vhuvhi hawe hoṱhe he a ita, a vhulunga milayo yanga, a ita zwi re zwone a fulufhedzea, vhukumakuma u ḓo tshila, a nga si fe. ₂₂Zwoṱhe zwe a nkhakhela ndi ḓo zwi hangwa; u ḓo tshila nge a tshila nga u fulufhedzea. ₂₃Ni vhona unga Nṋe ndi takalela lufu lwa muvhi? Hu amba Nṋe Muṋe wa zwoṱhe Yahavee. A thi ri ndi funa a tshi laṱa vhuvhi hawe a tshila?

₂₄“Huno arali a fulufhedzeaho a shanduka a si tsha fulufhedzea, a ita vhuvhi, a ita zwi nengisaho zwoṱhe zwine muvhi a ita, onoyo o fanela u tshila naa? Zwoṱhe zwe a ita a tshi fulufhedzea ndi ḓo zwi hangwa nge ene muṋe a ntshandukela a tshinya, u ḓo fela zwenezwo. ₂₅Hone inwi ni a hanedza na ri, ‘Zwine Muṋe washu a ita a si zwone.’ Inwi vhathu vha Israele, thetshelesani: Kani-ha zwine nda ita a si zwone? Zwi si zwone a si zwine inwi na ita? ₂₆Arali a fulufhedzeaho a shanduka a ita vhuvhi a fa nga zwenezwo, u ḓo vha a tshi khou fela vhuvhi he ene muṋe a ita. ₂₇Arali muvhi a tshi laṱa vhuvhi he a ita, a ita zwi re zwone, a fulufhedzea, u ḓo tshila. ₂₈Zwino ngauri o dzivhuluwa a laṱa vhutshinyi hawe hoṱhe ha kale; vhukuma a nga si fe, u ḓo tshila. ₂₉Naho zwo ralo vhathu vha Israele vha a hanedza vha ri, ‘Zwine Muṋe washu a ita a si zwone.’ Inwi vhathu vha Israele, zwine nda ita a si zwone? Zwi si zwone a si zwine inwi na ita? ₃₀Inwi vhathu vha Israele, ndi ḓo haṱula muṅwe na muṅwe ndi tshi tevhedza zwine a ita, hu amba Nṋe Muṋe wa zwoṱhe Yahavee. Rembuluwani! Laṱani vhutshinyi haṋu hoṱhe! Ndi hone ni sa ḓo lovha nga vhuvhi haṋu! ₃₁Laṱani vhuvhi hoṱhe he na ntshandukela ngaho, ni ḓisikele mbilu ntswa na muya muswa! Inwi vhathu vha Israele, ni felani? ₃₂Nṋe a thi takaleli lufu lwa muthu na muthihi, hu amba Nṋe Muṋe wa zwoṱhe Yahavee. Rembuluwani ni tshile!”