ESEKIELE 12

₁Ipfi ḽa Muṋe washu ḽa amba na nṋe ḽa ri, ₂“Iwe ṅwana wa muthu, u khou dzula na vhathu vha mashandukwa; vha na maṱo hone a vha vhoni, vha na nḓevhe hone a vha pfi, ndi vhathu vha mashandukwa. ₃Ndi zwone, iwe ṅwana wa muthu, vhofha muhwalo wa vhuthubwa, u pfuluwe masiari hune vhathu vha kona u u vhona, u pfuluwe henefho hune wa vha hone u pfulutshele huṅwe vha tshi khou zwi vhona. Khamusi ndi hone vha tshi nga dzivhuluwa naho vhe vhathu vha mashandukwa. ₄Vhekanya thundu yau unga muhwalo wa ḽithubwa, hu masiari uri vha zwi vhone, u ṱuwe nga madekwana unga ḽithubwa, ú na ngoho ya uri vha khou sedza. ₅Phula buli luvhondoni lwa nnḓu yau vho sedza, u bve ngaḽo. ₆Hezwo vha tshi khou sedza, u hwale buto ḽau u bvele nnḓa ḽo no kovhela; u khurumele uri u si kone u vhona shango, ngauri ndo u ita tshiga tsha vhathu vha Israele.”

₇Nṋe nda ita zwe nda vhudzwa. Nda kuvhanganya thundu yanga ya nga buto ḽa ḽithubwa, masiari; nga madekwana nda phula buli luvhondoni nga tshanḓa tshanga. Nda bvela nnḓa ḽo no kovhela, nda hwala buto ḽanga vha tshi khou zwi vhona.

₈Ḽi tshi tsha ipfi ḽa Muṋe washu ḽa amba na nṋe ḽa ri, ₉“Iwe ṅwana wa muthu, vhathu vha Israele, vhathu vha mashandukwa, a thi ri vho u vhudzisa zwe wa vha u tshi khou ita? ₁₀Vha vhudze u ri, ‘Muṋe wa zwoṱhe Yahavee u ri: Mafhungo haya a lwa na khosi ya Jerusalema na vhoṱhe vha Israele vha dzulaho hone.’ ₁₁Vha vhudze u ri, ‘Vhonani nga nṋe, vha Jerusalema vha ḓo itwa zwe nṋe nda itwa; vha ḓo thathiwa vha ya vhuthubwani. ₁₂Muvhusi wavho u ḓo hwala buto ḽawe ḽo kovhela, vha bva nga mutsheṱoni; hu ḓo phulwa buli ḽine vha ḓo bva ngaḽo; u ḓo khurumela uri a si vhone shango.’ ₁₃Ndi ḓo ṱharamudza mambule anga nda a posa nṱha hawe, nda mu fasha nga mambule anga; ndi ḓo mu hwala nda mu ḓisa Babele shangoni ḽa Vhakhaladia, hone maṱo awe a nga si ḽi vhone; u ḓo fela henefhano Babele. ₁₄Magota oṱhe a khoro yawe, vhalindi na mmbi yawe yoṱhe, ndi ḓo vha balanganya na shango nda vha pandamedza nga pfumo. ₁₅Ndi hone vha tshi ḓo zwi ḓivha uri ndi Nṋe Yahavee musi ndi tshi vha balanganya na dzitshakha ndi tshi vha hasekanya na mashango asili. ₁₆Naho zwo ralo ndo vha ndi tshi funa u litsha vhaṅwe vha si balanganywe nga pfumo na nḓala na dwadze uri zwiito zwavho zwoṱhe zwi nengisaho vha zwi anetshele vhathu vhane vha ḓo dzula navho, uri na vhenevho vha zwi ḓivhe uri ndi Nṋe Yahavee.”

₁₇Ipfi ḽa Muṋe washu ḽa amba na nṋe ḽa ri, ₁₈“Iwe ṅwana wa muthu, u tshi ḽa zwiḽiwa zwau u ḽe u tshi tetemela nga nyofho, u tshi nwa maḓi u nwe wo hanganea u tshi ḽa mbilu, ₁₉u konou vhudza vhathu vha shango ḽeneḽo u ri, ‘Muṋe wa zwoṱhe Yahavee u vhudza vhadzulapo vha Jerusalema na shango ḽa Israele u ri: Vha ḓo ḽa zwiḽiwa zwavho vho hanganea, vha nwa maḓi vho tshenuwa; shango ḽi ḓo sala ḽi soga nga mulandu wa vhadzulapo vhaḽo vha tshi ḽi ḓadza vhulevhi. ₂₀Miḓi i re na vhathu i ḓo phusukanywa, shango ḽa sala ḽi phanga; ndi hone ni tshi ḓo zwi ḓivha uri ndi Nṋe Yahavee.’ ”

₂₁Ipfi ḽa Muṋe washu ḽa amba na nṋe ḽa ri, ₂₂“Iwe ṅwana wa muthu, nṋa uyo murero une wa ḓivheswa shangoni ḽa Israele u amba mini? Ni ri, ‘Maḓuvha a ḓi ṱanḓulukana a tshi ya, mabono a sa bveleli.’ ₂₃Ndi zwone, vha vhudze u ri, ‘Muṋe wa zwoṱhe Yahavee u ri: Murero hoyu ndi ḓo u fhelisa; a u tsha ḓo dovha wa pfala kha ḽa Israele.’ Iwe vha vhudze u ri, ‘Ḓuvha ḽi tsini, mabono a ḓo ṱuwa a tshi khunyelela. ₂₄U bva zwino a hu tsha ḓo vha na bono ḽi siho, na vhuporofita ha u sokou takadza vhathu a vhu tsha ḓo vha hone kha vhathu vha Israele; ₂₅hu ḓo amba Nṋe Yahavee. Zwine nda amba ndo amba, zwi ḓo khunyelela hu si kale; zwine nda zwi bula zwi ḓo khunyelela ni tshi kha ḓi tshila, inwi vhathu vha mashandukwa’ – hu amba Nṋe Muṋe wa zwoṱhe Yahavee.”

₂₆Ipfi ḽa Muṋe washu ḽa amba na nṋe ḽa ri, ₂₇“Iwe ṅwana wa muthu, vhathu vha Israele vha ri, ‘Bono ḽine hoyu munna a ḽi vhona ḽi amba zwi kha ḓi ḓaho zwine zwa kha ḓi vha kule; u khou porofita zwa tshifhinga tshine tsha kha ḓi vha kule.’ ₂₈Ndi zwone, vha vhudze u ri, ‘Muṋe wa zwoṱhe Yahavee u ri: A thi tsha ḓo lenga u khunyeledza maipfi anga oṱhe. Zwine nda amba ndo amba, zwi ḓo khunyelela – hu amba Nṋe Muṋe wa zwoṱhe Yahavee.’ ”