VHAEFESA 6

₁Inwi vhana, vhunga ni vha Muṋe washu, thetshelesani vhabebi vhaṋu. Ndi zwone zwo fanelaho. ₂Mulayo u tshi ri, “Hulisa khotsi au na mme au,” ndi yone ndaela ya u ranga i re na zwine ya ri fulufhedzisa, ₃i tshi ri, “ndi hone zwoṱhe zwi tshi ḓo u nakela, wa ita na u lalama fhano shangoni.”

₄Na inwi vhokhotsi, ni songo ḽisa vhana vhaṋu mbilu; vha aluseni ni tshi vha laya nga ndayo ya Muṋe washu.

₅Inwi dziphuli, ipfani vhaṋe vhaṋu vha fhano shangoni, ni vha hulise ni vha ofhe. Izwo ni zwi ite nga mbilu nthihi ni nge ni khou shumela Khristo. ₆Ni songo zwi ita musi no lindwa fhedzi zwa vho nga ndi u ṱoḓa u khoḓwa nga vhathu; ni ite zwine Mudzimu a zwi funa, nga mbilu nthihi sa phuli dza Khristo. ₇Shumani nga mbilu tshena, ni nge vha shumelaho Muṋe washu hu si vhathu fhedzi. ₈Ḓivhani uri muṅwe na muṅwe we a ita zwivhuya – kana ndi phuli, kana a si phuli – Muṋe washu u ḓo mu pfufha.

₉Na inwi vhaṋe vha dziphuli ni ralo phuli dzaṋu. Ni songo vha shushedza; ḓivhani uri inwi na phuli dzaṋu Muṋe waṋu ndi muthihi ngei makoleni; Ene ha na tshiṱalula.

₁₀Ndi fhedza nga ḽa uri: ḓitikeni nga Muṋe washu na nga maanḓa awe mahulu. ₁₁Kungelani mafumo oṱhe a bvaho ha Mudzimu uri ni ḓo kona u kunda vhukwila ha diabolo. ₁₂Hafhu maswina ane ra lwa nao a si vhathu vha ṋama, ndi vhahulwane vha thuṅwa na vhalangi vhadzo, ndi vhavhusi vha misi ino ya swiswi, ndi mimuya mivhi i re tshikhalani. ₁₃Ndi zwine nda ri: zwino kungelani-ha mafumo oṱhe a Mudzimu. Ndi hone ni tshi ḓo kona u imedzana na muvhi nga musi muvhi, ha ḓo ri nó fhedza u lwa na ḓi vha no ima.

₁₄Imani-ha no khwaṱha, ngoho i yone bannda ye na ḓivhofha ngayo khunduni, khanani no ambara philelo ya tsimbi ine ya vha u ita zwo tiwaho nga Mudzimu, ₁₅zwienda zwaṋu hu u ḓiimisela u yo ḓivhadza mafhungo maḓifha a mulalo; ₁₆lutendo lu tshone tshiṱangu tshine na enda no tshi fara; ndi lwone lune na ḓo kona u dzima ngalwo misevhe yoṱhe i dugaho ine muvhi a ni posa ngayo. ₁₇Dzhiani u tshidzwa haṋu nga Mudzimu i vhe yone nguwane yaṋu; ni fare pfumo ḽa Muya Mukhethwa ḽine ḽa vha ipfi ḽa Mudzimu.

₁₈Zwoṱhe hezwo zwi humbeleni nga thabelo. Dzulani ni tshi rabela ni tshi endedzwa nga Muya Mukhethwa. Zwenezwo dzulani no fhaṱuwa ni sa neti, ni tshi rabelela vhakhethwa vhoṱhe vha Mudzimu, ₁₉na nṋe ni nthabelele, uri ndi tshi amba Mudzimu a mphe maipfi o teaho, ndi ambe ndi sa ofhi ndi tshi amba tshiphiri tsha mafhungo maḓifha ₂₀ane nda vha muḓinḓa wa u a ḓivhadza naho ndo hoṋelwa fhano dzhele. Nthabeleleni uri ndi ambe ndi sa ofhi, vhunga zwo fanela uri ndi ralo.

₂₁Thikhikhosi wa hashu mufunwa ane a vha mushumeli a fulufhedzeaho wa Muṋe washu u ḓo ni ṱanziela zwoṱhe nga nṋe, ndi hone ni tshi ḓo ḓivha uri ndi vuwa hani. ₂₂Ndi tshi mu ruma ngeo ndi u itela uri ni ḓivhe zwa kutshilele kwanga ngeno khathihi na uri a ni khwaṱhise.

₂₃Ngavhe Mudzimu Khotsi na Muṋe washu Yesu Khristo vha tshi ṋea inwi Vhakhriste nga riṋe mulalo na lufuno na lutendo. ₂₄Vhathu vhoṱhe vhane vha funa Muṋe washu Yesu Khristo nga lufuno lu sa fi, ngavhe Mudzimu a tshi vha itela vhuthu.