MUFUNZI 1

₁Haya ndi mafhungo a Mufunzi, ṅwana wa Dafita, we a vha e khosi a tshi dzula Jerusalema.

₂Ndi mahandana, ndi mahandana vhukumakuma, u ralo Mufunzi. Vhutshilo ndi mahandana, ndi mahandana fhedzi. ₃Muthu zwi mu farisani a tshi ḓinetisa nga u shuma, a tshi shuma fhano fhasi ha ḓuvha? ₄Murafho u a ḓa, wa fhira, ha ḓa muṅwe, hone ḽifhasi ḽi ḓi dzula ḽi hone. ₅Ḓuvha ḽi a bva ḽa kovhela, ḽa gidima ḽi tshi femeleka ḽa humela hune ḽa bva hone. ₆Muya u vhudzula u tshi ya tshipembe, wa vhudzula u tshi ya devhula, wa mona wa mona wa humela murahu. ₇Milambo yoṱhe i elela lwanzheni, hone lwanzhe a lu ḓali. Maḓi a humela zwisimani zwao, a ḓi dovha a ela. ₈Zwithu zwoṱhe a si u netisa hazwo! Zwi ro tou ṱali zwi sa ambei! Maṱo ha furi nga u vhona, na nḓevhe a dzi furi u pfa. ₉Zwe zwa vhuya zwa vha hone, zwi ḓo ḓi dovha zwa vha hone; zwe zwa vhuya zwa itea zwi ḓo ḓi dovha zwa itea; a hu na na tshithu tshiswa fhano fhasi ha ḓuvha. ₁₀Muthu a nga ḓi ri, “Vhonani, tshithu tshiswa ngetshi!” Matsina tsho vha tshi hone na kale ri sa athu vha hone. ₁₁Vha kale vho no hangwiwa; na vha no ḓo ḓa vha ḓo ḓi hangwiwa nga vhana vhavho.

₁₂Nṋe Mufunzi ndo vha khosi ya Israele ndi tshi dzula Jerusalema. ₁₃Ndo ḓikumedza uri ndi ḓo ṱoḓisesa nda guda zwoṱhe zwi no itwa fhano fhasi ha ḓuvha, nda vhona uri Mudzimu o livhanya vhana vha vhathu na u sokou ḓinetisa. ₁₄Ndo vhona zwoṱhe zwi no itwa fhano fhasi ha ḓuvha zwi mahandana fhedzi, zwi tou nga u pandamedza muya. ₁₅Zwo kombamaho a zwi onyolosei; u nga si vhale zwithu zwi siho.

₁₆Ndo amba nga mbilu nda ri, “Ndi na vhuṱali vhuhulu vhu no fhira ha vhoṱhe vhe vha vhuya vha vhusa Jerusalema nṋe ndi sa athu vha khosi. Ho ḓi tsha gole nda vhona, nda vha na vhuṱali na nḓivho khulu.” ₁₇Ndo ḓiṋekedza u guda uri ndi vhe na nḓivho na vhuṱali, ndi ṱalukanye u shaya nzhele na vhutsilu, nda wana uri na zwenezwo ndi u sokou pandamedza muya. ₁₈Vhuṱali vhu tshi anda na u ḽa mbilu hu a anda; nḓivho i tshi anda hu anda na maṱungu.