DANIELE 2

₁Nga ṅwaha wa vhuvhili wa muvhuso wa Nebukhadnetsara, Nebukhadnetsara a lora miloro; mbilu yawe ya pfa u vhavha, a si tsha fara na khofhe. ₂Khosi ya vhidzisa vhadziamanditi na vhabvumbi na mingome na vhaḓivhi vha zwa dziṋaledzi uri vha mu vhudze zwine miloro yawe ya amba. Vha swika vha ima phanḓa ha khosi. ₃Khosi ya vha vhudza ya ri, “Ndo lora muloro, mbilu yanga i a vhavha, ndi funa u ḓivha zwine uyo muloro wa amba.”

₄Vha vhuṱali vha fhindula khosi vha ri, “Ngavhe thovhela a tshi lalama! Nga vha ri vhudze uyo muloro, ri konou vha ṱalutshedza zwine wa amba.” ₅Khosi ya fhindula Vhakhaladia ya ri, “Zwe nda khwaṱhisa ngezwi: Arali na sa mmbudza zwe nda lora, na si nṱalutshedze uri zwi amba mini, ndi ḓo ita uri ni paḓukanywe miraḓo, nnḓu dzaṋu dzi thuthwe hu sale matumba. ₆Huno arali na mmbudza zwe nda lora, na nṱalutshedza uri zwi amba mini, ndi ḓo ni ṋea zwifhiwa na pfufho nda ni hulisa zwihulu. Zwino-ha mmbudzeni zwe nda lora na uri zwi amba mini.”

₇Vhone vha dovha vha ri, “Thovhele nga vha ri vhudze zwe vha lora, ndi hone ri tshi ḓo kona u vha ṱalutshedza.”

₈Huno khosi ya fhindula ya ri, “Ndi khou zwi vhona uri ni khou ntikisa luwa, nga u ḓivha uri zwe nda amba ndo khwaṱhisa: ₉na sa mmbudza zwe nda lora, ṱhamu ndi nthihi. Hone inwi no langana u mmbudza zwithu zwi xedzaho zwo vhifhaho ngeno ni tshi khou ntikisa luwa. Zwino-ha mmbudzeni zwe nda lora, ndi hone ndi tshi ḓo kona u ḓivha arali ni tshi kona u zwi ṱalutshedza kana ni sa koni.”

₁₀Vhakhaladia vha fhindula khosi vha ri, “A hu na na muthu na muthihi shangoni ḽoṱhe ane a nga ṱalutshedza zwine thovhele vha zwi ṱoḓa; a hu na na khosi na nthihi, naho e na vhuhulwane na maanḓa mangafhani, we a vhuya a vhudzisa vhadziamanditi kana vhabvumbi kana Vhakhaladia mbudziso yo raloho. ₁₁Mbudziso ine thovhele vha vhudzisa i a konḓa, a hu na ane a nga kona u fhindula thovhele, arali i si midzumi, i sa dzuli na vhathu vha ṋama.”

₁₂Khosi i tshi pfa zwenezwo a sinyuwa a tou halifha, a ri vhaṱali vhoṱhe vha Babele vha vhulawe.

₁₃Musi hu tshi vhewa mulayo wa uri vhaṱali vha vhulawe, ha ruṅwa vhathu vha yo londa na Daniele na khonani dzawe uri vha vhulawe. ₁₄Huno musi Ariokho mulangammbi wa u linda khosi a tshi bva a tshi yo vhulaha vhaṱali vha Babele, Daniele a ya khae a amba nae nga maipfi a vhuṱali, a ṱhalukanyo. ₁₅Daniele a vhudzisa Ariokho a ri, “Ndi mini khosi yo vhofha zwa tshiṱuhu tshingafhangafha?”

Ariokho a ṱalutshedza Daniele ayo mafhungo, ₁₆Daniele a konou ya ha khosi a humbela uri a thome u wana tshifhinga tsha u dzumbululela khosi zwine muloro wa amba. ₁₇Ndi hone Daniele a tshi ya hayani a yo vhudza khonani dzawe Hanania na Mishaele na Azaria zwe zwa itea, ₁₈a vha ṱuṱuwedza uri vha humbele Mudzimu wa makoleni a sumbedze khathutshelo yawe kha mafhungo ayo a tshiphiri, uri Daniele na khonani dzawe vha si vhulawe na vhaṅwe vhaṱali vha Babele. ₁₉Itsho tshiphiri tsha dzumbululelwa Daniele kha bono vhusiku; Daniele a renda Mudzimu wa ṱaḓulu ₂₀a ri,

₂₄Ndi hone Daniele a tshi ya ha Ariokho, we a vhewa nga khosi uri a vhulahe vhaṱali vha Babele, a mu vhudza a ri, “Vha songo vhulaha vhaṱali vha Babele. Nga vha ntswikise ha thovhele, ndi ḓo ṱalutshedza thovhele zwine muloro wa amba.”

₂₅Ariokho a mbo ḓi ṱavhanya a swikisa Daniele ha thovhele, a ri, “Kha mathubwa a no bva Juda ndo wana munna ane a nga kona u ṱalutshedza thovhele zwine muloro wa amba.”

₂₆Khosi ya amba na Daniele (we a vha a tshi pfi Beletheshatsara) ya ri, “Ni nga mmbudza zwe nda lora na uri zwi amba mini naa?”

₂₇Daniele a lavhelesana na khosi a fhindula a ri, “A hu na na muṱali na muthihi kana mubvumbi kana mudziamanditi kana mungome we a kona u vhudza thovhele ngoho ya tshiphiri tshe thovhele a vhudzisa, ₂₈hone hu na Mudzimu wa ṱaḓulu ane a dzumbulula zwiphiri, ndi Ene o sumbedzaho khosi Nebukhadnetsara zwine zwa ḓo itea misi i ḓaho. Zwino-ha muloro na mabono zwe vha zwi vhona vho fama vhulaloni ngezwi: ₂₉Musi thovhele vho fuma vhulaloni havho, mihumbulo yavho ya vhona zwine zwa kha ḓi ḓo itea, Mudzumbululi wa zwiphiri o vha sumbedza zwine zwa ḓo itea. ₃₀Tshiphiri itsho tshó dzumbululelwa nṋe, a si uri ndo ṱalifha u fhira vhathu vhoṱhe, zwo itelwa uri thovhele vha ḓivhe ṱhalutshedzo yazwo, vha ṱalukanye zwine vha elekanya mbiluni. ₃₁Thovhele vho vhona bono, zwe vha zwi vhona ngezwi: ndi tshifanyiso tsho vhumbwaho, tshifanyiso tshihulu tshi no penya lwa u kalula, tshó ima phanḓa havho, tsha tou ofhisa muthu a tshi tshi vhona. ₃₂Ṱhoho ya itsho tshifanyiso yo vha i ya musuku wavhuḓi, khana na zwishasha zwi siliva, tshiḽelo na zwirumbi zwi musinaseṱha, ₃₃milenzhe i ya tsimbi, ṋayo dzi tsimbi yo vanganaho na vumba. ₃₄Musi vha tshee vho sedza, ha kunguluwa tombo ḽi songo kwamiwa nga tshanḓa, ḽa rwa tshiḽa tshifanyiso kha ṋayo dza tsimbi yo vanganaho na vumba ya dzi kuekanya. ₃₅Ndi hone tsimbi yo vanganaho na vumba, na musinaseṱha, na siliva, na musuku, zwoṱhe zwi tshi pwashea zwa tou kuekanywa zwa nga mungu u luvhanḓeni lwa u fhulela tshilimo. Muya wa zwi vhudzulela kule, ha sala hu si tsha vhonala tshithu. Tombo ḽiḽa ḽe ḽa rwa tshiḽa tshifanyiso ḽa aluwa ḽa vha thavha khulu, ya ḓadza ḽifhasi ḽoṱhe. ₃₆Hoyo ndi wone muloro, zwino ri ḓo ṱalutshedza thovhele zwine wa amba.

₃₇“Thovhele ndi vhone khosi ya mahosi, Mudzimu wa ṱaḓulu o vha ṋea muvhuso na nungo na maanḓa na vhugala, ₃₈a ita uri vha lange vhathu na phukha dza shango na zwiṋoni zwi fhufhaho, hoṱhe hune zwa dzula hone, a zwi kumedza vhone, a vha ita khosi yazwo zwoṱhe. Vhone ndi vhone heyo ṱhoho ya musuku. ₃₉Vhone vha ḓo ri u fhedza u vhusa ha vuwa muṅwe muvhuso, wone a u nga vhi na bvumo ḽi no nga ḽa wavho, ha dovha ha vha na wa vhuraru, wa musinaseṱha; wonoyo u ḓo vhusa shango ḽoṱhe. ₄₀Hu ḓo vha na muvhuso wa vhuṋa wo khwaṱhaho unga tsimbi, ngauri yone i pwashekanya ya kuya zwoṱhe. Zwino unga tsimbi i tshi pwashekanya zwoṱhe, na wone u ḓo pwasha wa kuekanya mivhuso yoṱhe ya u ranga. ₄₁Ṋayo na zwikunwe dze vha dzi vhona dza vumba ḽo vanganaho na tsimbi, ndi muvhuso une wa ḓo fhandekana wa vha zwipiḓa zwipiḓa; hone u ḓo ḓi vha na u khwaṱha ha tsimbi sa zwenezwo, sa zwe vha vhona vumba ḽo vangana na tsimbi. ₄₂Ṋayo na zwikunwe í tsimbi yo vanganaho na vumba, zwi amba uri muvhuso wa hone u ḓo khwaṱha nga ḽiṅwe sia, nga ḽiṅwe wa tseka. ₄₃Vhunga vho vhona tsimbi yo vangana na vumba, zwenezwo izwo zwivhili zwi ḓo vangana nga u dzetshelana ha vhathu, hone a zwi nga nambatelani, unga na tsimbi i sa nambatelani na vumba.

₄₄“Misi ya mahosi eneo Mudzimu wa ṱaḓulu u ḓo vusa muvhuso une wa sa ḓo phusukana, muvhuso hoyo a u nga dzhiwi nga luṅwe lushaka: u ḓo phusukanya mivhuso yoṱhe ya u ranga wa i mila, wone wa ima lini na lini, ₄₅sa zwe vha vhona tombo ḽi songo kwamiwaho nga tshanḓa ḽi tshi kunguluwa ḽi tshi bva thavhani ḽa pwashekanya tsimbi na musinaseṱha na vumba na siliva na musuku. Mudzimu muhulu o sumbedza thovhele zwine zwa ḓo itea misi i ḓaho. Muloro uyo ndi wa ngoho, ṱhalutshedzo ndi yone-yone.”

₄₆Khosi Nebukhadnetsara a ri u pfa zwenezwo a wa nga tshifhaṱuwo phanḓa ha Daniele a mu luvha, a ri Daniele a ṋekedzwe nduvho a dubiselwe zwioro. ₄₇Khosi ya vhudza Daniele ya ri, “Vhukuma Mudzimu waṋu ndi Mudzimu wa midzimu, ndi Muṋe wa mahosi, ndi Mudzumbululi wa zwiphiri, vhunga no kona u dzumbulula itsho tshiphiri.” ₄₈Khosi ya vhea Daniele vhuimoni vhuhulwane, ya mu ṋea zwifhiwa zwinzhi zwa u naka. A dovha a mu ita muvhusi wa shango ḽoṱhe ḽa Babele, a mu ita muhulwane wa vhaṱali vha Babele. ₄₉Daniele a humbela khosi uri i vhee mafhungo a shango ḽa Babele zwanḓani zwa Shadraka na Mishaka na Abedenego, ene muṋe a dzula muṱani wa musanda.