Tshililo tsha u lilela Israele
1A Inwi Vhaisraele,
thetshelesani maipfi haya,
ndi luimbo lwa u lilela lufu lwaṋu, lu ri:
2Musidzana Israele o vhulawa,
ha tsha do vuwa!
Ngouḽa o kudzwa mavuni a shango ḽa hawe,
a hu na ane a mu vusa.
3B Muṋe wa zwoṱhe Muṋe washu u ri,
“Muḓi we wa vha u tshi bva pfumo u na vhahali vha tshigidi,
u ḓo sala u na ḓana fhedzi,
we wa vha u tshi bva na ḓana u ḓo sala na fumi fhedzi.
Zwi ḓo ralo kha ḽa Israele.”
4Muṋe washu a tshi amba na Vhaisraele, u ri,
C “Ṱoḓani Nṋe ni sa ḓo fa.
5D Ni songo ṱoḓa u fariswa Bethele,
E ni songo ya Giligala,
F ni songo fara lwendo na ya Bierisheba;
G vha Giligala vha ḓo iswa vhuthubwani,
D Bethele hu ḓo phusukanywa ha sala hu si na tshithu.”
6C Ṱoḓani Muṋe washu, ndi hone ni tshi ḓo tshila;
D na sa ralo u ḓo fhedza vha muṱa wa Josefa
unga mulilo u tshi fhisa.
U ḓo fhedza Bethele wa swa, ha si vhe na a no u dzima.
7E2 Ni ḓo zwi vhona inwi, vhane na shandula zwi re zwone
na zwi ita zwi kalakataho,
na dzhia u fulufhedzea na hu laṱa kule.
8F2 Hu amba Ene we a vhumba Tshilimela na Ṱhuḓa,
u shandula swiswi ḽa vha mapfuvhi,
u vhidza maḓi a lwanzhe a a shululela shangoni.
G U pfi Yahavee.
9F2 U phusukanya hu re na thikho,
muḓi u re na mutsheṱo a u ita matumba.
10E2 Ni vhenga ane a ṱanziela zwa ngoho tsengoni,
na nyadza ane a amba ngoho.
11Ni kandekanya mushai
na mu kombetshedza uri a ni ṋee mavhele.
D Ndi zwine naho no fhaṱa nnḓu dza matombo o vhaḓiwaho
na si ḓo dzula khadzo;
naho no lima masimu a u naka a minḓirivhe
a ni nga nwi waini yao.
12Ndi a ḓivha uri no tshinya kangana
na uri vhutshinyi haṋu ndi vhungafhani.
Ni kandeledza vhavhuya na ṱanganedza tshanḓanguvhoni,
na kundisa vhashai u wana zwo vha fanelaho tsengoni.
13Ndi zwine o thanyaho a sokou ḓifhumulela misi yo raloho,
ngauri ndi misi mivhi.
14C Ṱoḓani zwivhuya,
zwi si zwo vhifhaho,
ni sa ḓo fa,
ndi hone Muṋe washu Mudzimu Mulangazwoṱhe
a tshi ḓo vha na inwi
unga ni tshi ri u na inwi.
15Vhengani vhuvhi;
funani zwivhuya;
ni vhone uri tsengoni hu vhe na khaṱhulo mbuya;
B khamusi Muṋe washu Mudzimu Mulangazwoṱhe
a nga khathutshela tsalela dza Josefa.
16A Zwino-ha,
Muṋe washu Muṋe wa zwoṱhe
Mudzimu Mulangazwoṱhe u ri,
“Hu ḓo pfala u honḓa mikotoni yoṱhe;
hu ḓo pfala tshililo tsha u lilela vhafu
hoṱhe hune vhathu vha kuvhangana hone.
Na vhalimi vha ḓo vhidzwa uri vha ḓe vha lile,
vhomakone vha u lila vha ḓo vhidzwa
uri vha ḓe vha honḓe.
17Hu ḓo pfala u honḓa masimuni oṱhe a minḓirivhe,
ngauri Nṋe ndi ḓo fhira vhukati haṋu.”
Muṋe washu u ralo.
U takala ha Vhaisraele ndi u ḓifhura
18Ni ḓo zwi vhona inwi no lavhelelaho ḓuvha
ḽa Muṋe washu!
Ndi mini ni tshi lavhelela ḓuvha ḽa Muṋe washu?
Ḽi nga si vhe ḽa tshedza,
ḽi ḓo vha ḽa swiswi.
19Zwi ḓo nga muthu a tshi ponyoka mulomoni wa ndau,
a mbo ṱangana na biara,
a shavha a dzhena nḓuni a ḓitika nga luvhondo,
a mbo ḓi luṅwa nga ṋowa.
20Nga u ralo ḓuvha ḽa Muṋe washu a ḽi nga vhi ḽa tshedza
ḽi ḓo vha ḽa swiswi;
a ni nga vhoni ḓuvha ḽi tshi tsha,
hu ḓo swifhala he nzwii!
Vhurereleli vhu sa farisi tshithu
21Muṋe washu u ri,
“Vhuṱambo haṋu ha u rerelela ndi a vhu vhenga,
ndo vhu nengwa,
a thi koni u konḓelela khuvhangano dzaṋu;
22nangwe na nnḓisela zwiṱhavhelo zwi fhiswaho
na nduvho dza mbeu,
ndi nga si zwi ṱanganedze;
naho na nṋekedza tshiṱhavhelo tsha kholomo dzo noniswaho
dzine na ḓo ḽa thembeleni,
a thi nga tshi londi.
23Ni songo tsha mphunga nga nyimbo dzaṋu!
A thi tsha ḓo thetshelesa nyimbo dza haripa dzaṋu.
24Hone itani zwi re zwone zwi tou ela sa maḓi,
u fulufhedzea haṋu hu nge mulambo u sa xi!
25“Inwi vhathu vha Israele,
no vhuya na nṋekedza zwiṱhavhelo na nduvho ngei phangani
miṅwaha yoṱhe iḽa ya mahumi maṋa naa?
26Zwino no no ḓiitela Sakuthu khosi yaṋu
na Kaiwani mudzimu waṋu wa ṋaledzi;
ndi zwone,
ni ḓo hwala zwifanyisa zwayo
27musi ndi tshi ḓo ni isa vhuthubwani
kule hangei phanḓa ha Damasko.”
Hu amba Muṋe washu ane a pfi Mudzimu Mulangazwoṱhe.
