AMUSI 1

₂Muṋe washu u vhomba e Tsioni,

ipfi ḽawe ḽi bvuma e Jerusalema,

pfulo ya vhalisa ya oma,

ḓaka ḽa muṱumba wa Kharamele ḽa puta.

“Vha Damasko vho tshinya vha dovha:

vho itela vhathu vha Giliadi tshiṱuhu tshihulu,

zwa nga vho vha lima miṱana nga malembe a tsimbi;

zwenezwo a thi nga litshi u vha lifhedza;

₄pfamo ya khosi Hazaele ndi ḓo i funga nga mulilo

wa fhisa vhushavhelo ha khosi Beni Hadada.

₅Ndi ḓo vunḓekanya tswinga dza Damasko,

nda lozwa khosi ya Govha ḽa Vhuvhi na o faraho luḓo lwa vhuhosi

Muḓini wa u ḓiphiṋa.

Vhathu vha Aramu vha ḓo hwalwa vha iswa vhuthubwani ngei Kiri

hune vha bva hone.”

U ralo Muṋe washu.

“Vha Gaza vho tshinya vha dovha:

vho thuba miḓi vha si sie na muthu,

vha vha rengisela Vhaedomo vha vha dziphuli;

zwenezwo a thi nga litshi u vha lifhedza;

₇mitsheṱo ya Gaza ndi ḓo i funga nga mulilo

wa fhisa madzhavhelo avho,

₈nda lozwa khosi ya Ashidodo

na o faraho luḓo lwa vhuhosi Ashkeloni.

Ndi ḓo angaladza tshanḓa tshanga

nda rwa vhathu vha muḓi wa Ekroni nda lozwa Vhafilista

hu si sale na muthihi.”

U ralo Muṋe wa zwoṱhe Muṋe washu.

“Vha Tiro vho tshinya vha dovha;

vho thuba miḓi vha si sie na muthu,

vha vha rengisela Vhaedomo sa dziphuli,

vha si tsha londa mulanga wa vhukonani

we vha vhofha;

zwenezwo a thi nga litshi u vha lifhedza;

₁₀mitsheṱo ya Tiro ndi ḓo i funga nga mulilo

wa fhisa madzhavhelo avho.”

“Vhaedomo vho tshinya vha dovha;

vho pandamedza Vhaisraele vharathu vhavho nga pfumo

vha si vhuye vha vha khathutshela;

vho vha ponda vho sinyuwa vha dovha,

mbiti dzavho dza si vhuya dza dzika;

zwenezwo a thi nga litshi u vha lifhedza;

₁₂muḓi wa Themani ndi ḓo u funga nga mulilo

wa fhisa na madzhavhelo a Bosora.”

“Vhaamoni vho tshinya vha dovha;

vho fhandula vhasadzi vha Giliadi vho vhifhaho muvhilini

vha tshi ṱoḓa u engedzedza shango ḽavho;

zwenezwo a thi nga litshi u vha lifhedza;

₁₄mitsheṱo ya Raba ndi ḓo i funga nga mulilo

wa fhisa vhushavhelo havho;

musi wonoyo hu ḓo pfala mukosi wa nndwa,

nndwa ya thutha miḓi unga tshiḓumbumukwe;

₁₅khosi yavho i ḓo hwalwa ya iswa vhuthubwani,

ene khathihi na magota awe.”

U ralo Muṋe washu.