MISHUMO 8

₁Saulo na ene a zwi takalela vha tshi vhulaha Stefane.

U bva ḽeneḽo ḓuvha tshivhidzo tsha Jerusalema tsha thoma u tovholwa nga tshiṱuhu tshihulu. Vhakhriste vhoṱhe vha balanganywa na mivhundu yoṱhe ya Judia na Samaria. Vhe vha sala Jerusalema ndi vhaapostola fhedzi. ₂Vhaṅwe vhanna vha ofhaho Mudzimu vha swiṱa Stefane tshililo tshi tshihulu.

₃Saulo ene a linga u pwashekanya tshivhidzo; a enda na miḓi ya Vhakhriste a tshi kokodza vhanna na vhasadzi a vha kudza dzhele.

₄Vhaḽa Vhakhriste vhe vha balanganywa vha enda vha tshi ḓivhadza mafhungo maḓifha thungo dzoṱhe.

₅Filipi ene o tsela muḓini muṅwe wa Samaria a ḓivhadza vhathu nga Khristo. ₆Magogo a tshi pfa Filipi na u vhona maḓembe e a ita, ha thetshelesa vhanzhi zwe Filipi a vha a tshi vha vhudza, hu si na a hanedzaho. ₇Thuṅwa dza Saṱhane dza bva kha vhathu vhanzhi dzi tshi tshema, ha fhodzwa na vhanzhi vho omaho miraḓo, na zwihole; ₈ḽi si vhe ḽone dakalo afho muḓini.

₉Muḓini wonoyo ho vha hu tshi dzula muṅwe munna a no pfi Simoni, we a vha o no fhedza tshifhinga a tshi akhamadza vhathu vha Samaria nga manditi awe, a tshi vho tou ḓiita ene-ene. ₁₀Vhathu vhoṱhe, vhahulwane na vhaṱuku henefho muḓini vho vha vho no tou vhea mbilu dzavho khae. Vhoṱhe vha tshi mu amba vho vha vha tshi vho ri, “Uḽa Mudzimu ane a pfi ‘Maanḓa Mahulu’ o tou ḓa nga ṋama – ndi Simoni onoyu.” ₁₁Ho vha ho no fhela tshifhinga a tshi khou vha akhamadza nga manditi awe, vhoṱhe vha tshi vho fulufhela ene. ₁₂Hone musi Filipi o vha ḓivhadza mafhungo maḓifha a muvhuso wa Mudzimu na Yesu Khristo, vha a ṱanganedza vha lovhedzwa vhoṱhe, vhanna na vhasadzi. ₁₃Zwino na ene Simoni a tenda, a ri u lovhedzwa a si tsha vhuya a ṱutshela kule na Filipi, maḓembe na zwimangadzo zwe zwa vha zwi tshi khou itwa nga Filipi zwa tou mu akhamadza.

₁₄Vhaapostola vha Jerusalema vha tshi pfa uri vhathu vha Samaria na vhone vho ṱanganedza ipfi ḽa Mudzimu, vha rumela Pitrosi na Johanisi khavho. ₁₅Vha tshi swika vha vha rabelela uri vha ṋewe Muya Mukhethwa; ₁₆ngauri Muya Mukhethwa o vha a sa athu tsela na kha muthihi wavho, vhó sokou lovhedzwa fhedzi uri vha vhe vha Muṋe washu Yesu. ₁₇Ndi hone Pitrosi na Johanisi vha tshi vha vhea zwanḓa, vha mbo ḓi ṱanganedza Muya Mukhethwa.

₁₈Simoni a tshi vhona uri vhaapostola vho ri u vha vhea zwanḓa vha ṱanganedza Muya Mukhethwa, a vha ṋea tshelede, ₁₉a ri, “Kha ndi fhiwe-vho haya maanḓa, uri na nṋe muthu ane nda mu vhea zwanḓa a ṱanganedze Muya Mukhethwa.”

₂₀Pitrosi a tshi fhindula a ri, “Lovhani na tshelede yaṋu! Ni vhona unga ni nga renga tshifhiwa tsha Mudzimu nga tshelede! ₂₁Inwi mushumo hoyu a wo ngo vhuya wa ni fanela, ngauri Mudzimu u vhona mbilu yaṋu i si na ngoho. ₂₂Ḽaṱani-ha vhuvhi hovhu haṋu, ni rabele Mudzimu uri a ni hangwele heyo mihumbulo yaṋu mivhi. ₂₃Nṋe ndi khou zwi vhona uri ni na mbilu mmbi, vhuvhi ho tou ni vhofha tshoṱhe.”

₂₄Simoni a fhindula a ri, “Vhathu vha hashu, nthabeleleni ha Muṋe washu uri ndi si welwe na nga tshithihi tsha zwe na amba!”

₂₅Musi vho no ṱanziela Yesu na u amba ipfi ḽa Muṋe washu, vha humela Jerusalema, vha tshi enda vha tshi ḓivhadza mafhungo maḓifha na miḓi ya Vhasamaria.

₂₆Muṅwe muruṅwa wa Muṋe washu a amba na Filipi a ri, “Takuwa u livhe thungo ya tshipembe nga gondo ḽine ḽa bva Jerusalema ḽi tshi ya Gaza.” (Gondo ḽeneḽo zwino ndi fela). _27-28Nangoho Filipi a mbo ḓi takuwa. Zwino muṅwe munna wa gota ḽa Ethopia o vha e nḓilani a tshi ya hayani. Munna onoyo o vha e muthu muhulwane, e mufaragwama wa khosi ya Ethopia ya musadzi we a vha a tshi pfi Kandatse. O vha o tou luvhedzwa, a si tsha vhalwa na vhanna. Zwino o vha a tshi khou bva Jerusalema u rabela Mudzimu, a tshi khou tshimbila nga gariki yawe, a tshi enda a tshi vhala bugu ya muporofita Yesaya. ₂₉Muya Mukhethwa a amba na Filipi a ri, “Sendela u tshimbile tsini ha gariki heyo.” ₃₀Filipi a tshi gidimela khae, a pfa a tshi khou vhala bugu ya muporofita Yesaya. Ndi hone a tshi mu vhudzisa a ri, “Zwine vha khou vhala vha khou zwi pfa naa?”

₃₁Uyo munna a tshi fhindula a ri, “Ndi nga zwi pfa hani hu si na ane a nṱalutshedza?” U ralo a mbo ḓi humbela Filipi uri a namele gariki vha tshimbile vhoṱhe. ₃₂Mafhungo e a vha a tshi khou vhala one Maṅwaloni ndi aḽa a no ri,

₃₄Gota iḽo ḽa vhudzisa Filipi ḽa ri, “Nga vha dzou mmbudza, muporofita a tshi ralo u khou amba nnyi? Ndi u ḓiamba kana ndi u amba muṅwe?” ₃₅Filipi a thoma nga tshipiḓa tshenetsho tsha Maṅwalo tshe tsha vhaliwa, a vhudza iḽo gota mafhungo maḓifha a Yesu Khristo. ₃₆Ha ri vha tshi khou ḓi tsa na gondo ḽeneḽo, vha swika huṅwe fhethu hu re na maḓi. Gota iḽo ḽa ri: “Maḓi ngea! Tshi nkundisaho u lovhedzwa ndi mini?”

[ ₃₇Filipi a tshi mu fhindula a ri, “Vha nga ḓi lovhedzwa arali vha tshi fulufhela Yesu Khristo nga mbilu yavho yoṱhe.”

Uyo a fhindula a ri, “Vhukuma, nṋe ndi a tenda uri Yesu Khristo ndi Murwa wa Mudzimu.”]

₃₈Ndi hone uyo munna a tshi imisa gariki, ene na Filipi vha tsela maḓini, Filipi a mu lovhedza. ₃₉Musi vha tshi bva maḓini, Muya wa Muṋe washu a mbo ḓi hwala Filipi a ṱuwa nae, uyo munna a si tsha mu vhona; a ḓifarela nḓila yawe o takala. ₄₀Filipi ene a kanuka o no vha Ashidodo; u bva afho a dzhena miḓini yoṱhe a tshi enda a tshi funza mafhungo maḓifha a vhuya a swika Khisaria.