MISHUMO 7

₁Tshifhe muhulu a vhudzisa Stefane a ri, “Nṋa zwine vha khou amba ndi zwone naa?” ₂Ene a fhindula a ri, “Vha hashu, vhokhotsi anga, nthetsheleseni! Mudzimu wa vhugala o ḓivhonadza kha makhulukuku washu Abrahamu zwiḽa a tshee Misopothamia a sa athu pfulutshela Harani, ₃a amba nae a ri, ‘Ṱutshela vha hau na shango ḽa hau u ye shangoni ḽine nda ḓo u sumbedza.’ ₄Nangoho a ṱuwa shangoni ḽa Vhakhaladia a yo dzula Harani. Musi khotsi a Abrahamu o no fa, Mudzimu a ita uri a pfulutshele shangoni ḽino, ḽeneḽi ḽine na dzula khaḽo na ṋamusi. ₅Hone Mudzimu ho ngo mbo ḓi ṋea Abrahamu muvhundu kha heḽi shango, na vhukando zwaho! Tshi re hone Mudzimu o tou mu fulufhedzisa uri u ḓo mu fha ḽone ḽa vha ḽawe na vhaḓuhulu vhawe musi ene o no fa. Abrahamu o vha a sa athu vha na ṅwana musi Mudzimu a tshi mu fulufhedzisa nga u ralo. ₆Mudzimu a tshi amba nae o ri, ‘Vhaḓuhulu vhau vha ḓo dzula shangoni ḽisili; henengei vha ḓo vha dziphuli vha tambudzwa miṅwaha ya 400.’ ₇Mudzimu a dovha a ri, ‘Hone ndi ḓo rwa avho vhathu vhane vha ḓo vha ita dziphuli, vha ḓo ri ngavhuya vha konou bva shangoni iḽo vha ḓa u nnduvha fhano.’ ₈Zwo no ralo Mudzimu a laya Abrahamu uri vhatuka vha fumbe, tshi vhe tshiga tsha mulanga wawe. Ndi zwe Isaka a ri u fhedza vhege o bebiwa, Abrahamu a mu fumbisa, na Isaka o ḓi fumbisa Jakopo, Jakopo a fumbisa vhomakhulukuku vha 12 vha matsinde a lushaka lwashu.

₉“Vhenevho vhomakhulukuku washu nga vivho vha rengisa Josefa a yo vha phuli Egipita. Naho zwo ralo Mudzimu a vha nae ₁₀a mu lamukisa khomboni dzoṱhe dze a ṱangana nadzo, a tshi ḓi mu ṋea vhuthu na vhuṱali zwi takadzaho Farao khosi ya Egipita, lwe a vhuya a mu ita gota ḽihulwane ḽa shango ḽoṱhe ḽa Egipita, na muṱani wa musanda. ₁₁Ha mbo wa nḓala khulu kha ḽoṱhe ḽa Egipita na ḽa Kanana, ha vha na u shengela huhulu, vhomakhulukuku washu vha si tsha kona na u wana zwiḽiwa. ₁₂Jakopo a tshi pfa uri Egipita hu na mavhele, a ruma vhomakhulukuku washu henengei lwa u thoma. ₁₃Musi vha tshi ya lwa vhuvhili Josefa a ḓiḓivhadza kha vhakomana vhawe; na khosi Farao ha vha hu hone a tshi ḓivha-vho zwa vha ha Josefa. ₁₄Ndi hone Josefa a tshi laedzela uri khotsi awe Jakopo na muṱa wawe woṱhe vha ḓe Egipita. Misi iyo muṱa wa Jakopo wo vha u na vhathu vha no swika 75 fhedzi. ₁₅Ndi hone Jakopo na vhomakhulukuku washu vha tshi tsela Egipita, vha vhuya vha fela henengei. ₁₆Huno zwitumbu zwavho zwa humiselwa Shikheme zwa swiṱwa tshaloni tshe Abrahamu a tshi renga nga tshelede i si na vhukono kha vhana vha Hamoro.

₁₇“Musi tshifhinga tshi tshi swika tsha uri Mudzimu a ite zwe a fulufhedzisa Abrahamu, tshivhalo tsha vhathu vha hashu Egipita tsho vha tshi si na vhukono. ₁₈Vhuhosini ha Egipita ha vhuya ha dzhena muṅwe a sa ḓivhi zwa Josefa. ₁₉Onoyo a thoma u itela vhathu vha hashu vhukwila, a itela vhomakhulukuku washu tshiṱuhu tshihulu a tshi ita na u vha kombetshedza uri vha ṅaledze vhana vhavho vha fe. ₂₀Ndi nga tshifhinga tshenetsho hu tshi bebwa Mushe, ṅwana o nakesaho. Onoyo a leliwa hayani miṅwedzi miraru. ₂₁Ha vha hone a tshi vhewa ḓakani, a dobiwa nga ṅwananyana wa Farao, uyo a mu alusa o mu ita ṅwana wawe. ₂₂Mushe a funziwa vhuṱali hoṱhe ha Vhaegipita, maipfi awe a vha na tshileme, na mishumo yawe ya vha mihulu.

₂₃“Musi Mushe e na miṅwaha ya 40, a humbula u yo ṱola Vhaisraele vha hawe. ₂₄A wana muṅwe a tshi khou shengedzwa nga Muegipita, ene a ya a mu lamulela, a ita na u mu lifhedzela nga u vhulaha uyo Muegipita. ₂₅O vha a tshi humbula uri vhathu vha hawe vha ḓo pfesesa uri Mudzimu u ḓo vha vhofholola ngae, matsina vhone a vha nga zwi pfesesi. ₂₆Nga matshelo a wana Vhaisraele vhavhili vha tshi khou lwa a edzisa u vha lamula. A amba navho a ri, ‘Hee vhanna vha hashu, zwino ni ḓo ri ni khou lwelani ni vhathu vhathihi?’ ₂₇Uyo we a levhela wa hawe a sukumedzela Mushe kule a ri, ‘Nṋa ndi nnyi o ni vheaho u vha murangaphanḓa na muhaṱuli washu? ₂₈Ni khou ṱoḓa u mmbulaha sa uḽa Muegipita we na mu vhulaha mulovha?’ ₂₉Mushe a tshi pfa zwenezwo a mbo ḓi shavha Egipita a yo dzula Midiani. Henengei o ḓo beba vhana vhavhili vha vhatuka.

₃₀“Ho no fhela miṅwe miṅwaha ya 40 muruṅwa a ḓivhonadza kha Mushe nga khavhu i kha tshiṱaka tsha muunga sogani, tsini ha thavha ya Sinai. ₃₁Iḽo bono ḽa akhamadza Mushe, hone a tshi sendela tsini uri a tou vhona zwavhuḓi, a pfa ipfi ḽa Muṋe washu ḽi tshi ri, ₃₂‘Ndi Nṋe Mudzimu wa vhomakhulukuku wau, Mudzimu wa Abrahamu na Isaka na Jakopo.’ Mushe a tou tetemela nga nyofho a tata na u lavhelesa. ₃₃Muṋe washu Ene a amba nae a ri, ‘Bvula thovho dzau ngauri hafho he wa ima hone ndi fhethu hukhethwa. ₃₄Ndo lavhelesa nda vhona u shengela ha vhathu vhanga ngei Egipita. U gomela havho ndo hu pfa; na zwino ndo tsela u vha lamulela. Zwino litsha ndi rume iwe Egipita.’

₃₅“Onoyo Mushe ndi ene we vha mu landula vha ri, ‘Ndi nnyi o ni rumaho u vha murangaphanḓa na muhaṱuli washu?’ ngeno e ene we Mudzimu a vho ḓo mu ruma nga muruṅwa fhaḽa tshiṱakani uri a vhe ene murangaphanḓa na mulamuleli wavho. ₃₆Ndi ene we a pfulusa vhathu Egipita, a ita na maḓembe na zwimangadzo shangoni ḽa Egipita na Lwanzheni Lutswuku, a ḓi ralo miṅwaha ya 40 vhe sogani. ₃₇U tshee onoyo Mushe we a ri a tshi amba na vhathu vha Israele a ri, ‘Mudzimu o ḓo ni rumela muporofita ane a ḓo vha wa lushaka lwa haṋu, sa zwe a ruma nṋe.’ ₃₈Ndi onoyo Mushe we a vha e na tshivhidzo tsha Israele sogani a dovha a ri a tshee ene a vhudza vhomakhulukuku washu zwe muruṅwa a amba nae thavhani ya Sinai. Ndi ene we a ṱanganedza ndayo dzi tshidzaho kha Mudzimu uri a dzi swikise kha riṋe.

₃₉“Vhomakhulukuku washu vhone vho lamba zwine a vha vhudza vha mu sendedza kule, mbilu dzavho dzó no rembulutshela Egipita. ₄₀Ndi zwe vha vhudza Aroni vha ri, ‘Ri itele midzimu ine ya ḓo ri ranga phanḓa, ngauri uyo Mushe we a sokou ri bvisa Egipita a ri ḓivhi tsho mu welaho.’ ₄₁Zwenezwo vha ḓivhumbela mboho ya tshitungulo, vha i ṋekedza nduvho, vha ita na munyanya vha tshi pembelela zwe vha ita nga zwanḓa zwavho. ₄₂Ndi hone Mudzimu a tshi vha furalela a vha litsha, vha rabela ṋaledzi dza ṱaḓulu, vhunga zwo ṅwaliwa kha bugu ya vhaporofita ha pfi,

₄₄“Henengei sogani vhomakhulukuku washu vho vha vhe na Dennde ya Vhuṱanzi, yo tou itwa nga he Mudzimu a laedza Mushe, hu tshi tevhedzwa tshivhumbeo tshe a mu sumbedza. ₄₅Ngavhuya vhomakhulukuku washu vha sielwa iyo Dennde nga vhokhotsi avho, vha i hwala vho rangwa phanḓa nga Joshua, Mudzimu a konou pandela dzitshakha, vhone vha thuba shango ḽadzo. Vha ḓi sielana yeneyo Dennde nga u ralo u swika tshifhinga tsha Dafita. ₄₆Onoyo Dafita a takadza Mudzimu, a vhuya a tou ri, ‘Kha ndi tendelwe u fhaṱela Mudzimu wa Jakopo nnḓu.’ ₄₇Hone we a vho ḓo sala a tshi fhaṱela Mudzimu iyo nnḓu ndi Solomoni.

₄₈“Naho zwo ralo, Waṱaḓuluṱaḓulu ha dzuli nḓuni yo fhaṱwaho nga vhathu. Ndi zwine muporofita a ri,

₅₁“Nṋa ni tou vha na tshikhuna-ḓe! Khezwi mbilu dzaṋu na nḓevhe dzaṋu dzi tshi tou nga dza vhannḓa vha songo fumbaho! No tou dzhia zwone zwa vhomakhulukuku waṋu vhukuma. Na inwi tshifhinga tshoṱhe ni ḓi itela Muya Mukhethwa tshipimbi! ₅₂Ndi ufhio muporofita we vhomakhulukuku waṋu vha si mu tovhole? Hufha vho ḓi vhulaha na vhaḓinḓa vha Mudzimu vhe zwiḽa kale-kale vha ḓa u ḓivhadza u ḓa ha Muḓinḓa wawe muvhuya! Zwino inwi no tou fheṱa Ene muṋe vhukuma na mu vhulaha! ₅₃Hufha vhe inwi vhe na ṱanganedza Mulayo wa Mudzimu u tshi ḓiswa nga vharuṅwa, na fhedza na si u vhulunge?”

₅₄Musi vhanna vha khoro vha tshi pfa Stefane a tshi ralo, vha tou halifha tshoṱhe vha shenganya maṋo nga mbiti. ₅₅Stefane ene a lilala ṱaḓulu o ḓala Muya Mukhethwa a vhona vhugala ha Mudzimu, na Yesu o ima thungo ya tshanḓa tshauḽa tshawe, a ri, ₅₆“Ndi khou vhona ḽiṱaḓulu ḽo vulea, na Mubebwa-nga-muthu khouḽaa o ima thungo ya tshanḓa tshauḽa tsha Mudzimu!”

₅₇Vhone vha mbo zhamba vho tou thivha na nḓevhe nga minwe, kathihi fhedzi vhoṱhe vha vha vho no mu wela nṱha, ₅₈vha mbo ḓi mu bvisela nnḓa ha muḓi, vha mu kanḓa nga matombo. Ṱhanzi dza sia nguvho dzadzo na muṅwe muṱhannga a no pfi Saulo. ₅₉Vhathu vha ḓi mu kanḓa, ene a tshi khou ḓi vhidzelela Muṋe washu a tshi ri, “Yesu Muṋe wanga, ṱanganedza muya wanga!” ₆₀A wa nga magona, a ṱavha mukosi a ri, “Muṋe wanga, vha hangwele vhutshinyi uvhu!” A ri u ralo a welela.