MISHUMO 18

₁Zwo no ralo Paulo a ṱuwa Athene a fhirela Korinta. ₂Henefho a wana muṅwe munna wa Mujuda a no pfi Akwila o bebwaho Pontosi, we a vha a tshi kha ḓi bva u swika a tshi bva Italia na musadzi wawe Phrisila. Vhenevho vho vha vho pfulutshela muḓini wonoyo nge Khisara Klaudiosi a vha o pandela Majuda vhoṱhe Roma. Paulo a yo vhonana navho; ₃zwino nge na ene a vha a tshi wana zwiḽiwa zwawe nga u runga dzidennde sa vhone, a vho tou dzula navho vha tshi shuma vhoṱhe. ₄Nga Sabatha iṅwe na iṅwe o vha a tshi ḓi amba na Majuda na Magiriki sinagogoni, a tshi linga u vha sumbedza nḓila.

₅Huno Silasi na Timoti vha tshi swika vha tshi bva Makedonia, Paulo a vho tou ḓiṋekedza tshoṱhe kha zwa ipfi ḽa Mudzimu, a ṱalutshedza Majuda zwavhuḓi uri Yesu ndi Ene Mesia. ₆Vhone vha tshi ḓi mu hanedza vha tshi ita na u semana, ene a fhufhura zwiambaro zwawe u sumbedza uri zwi kha vhone, a ri, “Arali na lovha u ḓo vha u mulandu waṋu; nṋe ndo bva mulanduni! U ṱuwa ṋamusi ndi ya kha vhannḓa.” ₇U ralo ha mbo ḓi vha u bva a yo dzula ha muṅwe munna a ofhaho Mudzimu, a no pfi Titiosi Justosi, we nnḓu yawe ya vha yo vhandekana na sinagogo. ₈Murangaphanḓa wa sinagogo a no pfi Khrisposi, na muṱa wawe woṱhe vha ṱanganedza Muṋe washu, na vhaṅwe vhathu vhanzhi vha henefho Korinta vha pfa ipfi ḽa Mudzimu, vha ḽi ṱanganedza, vha lovhedzwa.

₉Ḽiṅwe ḓuvha vhusiku Paulo a vhona Muṋe washu kha bono a tshi khou amba nae a tshi ri, “U songo ofha tshithu; u songo litsha u amba; u songo fhumula; ₁₀a re na iwe ndi Nṋe. A hu na ane a ḓo kona u u huvhadza, ngauri hu na vhanzhi vha re vhanga fhano muḓini uno.” ₁₁Nangoho Paulo a dzula muḓini wonoyo a fhedza ṅwaha na miṅwedzi miṱanu na muthihi a tshi funza vhathu ipfi ḽa Mudzimu.

₁₂Hone ho ḓo ri Galio a tshi itwa gota shangoni ḽa Akhaya, Majuda vha kuvhangana vha fara Paulo vha mu isa khoroni, ₁₃vha mu hwelela vha ri, “Hoyu munna u khou kunga vhathu uri vha rabele Mudzimu nga nḓila ine ya lwa na Mulayo!”

₁₄Paulo a tshi kha ḓi tou ri ndi a amba, Galio a vha fhindula a ri, “Inwi Majuda, ngavhe hoyu muthu o vha o tshinya kana o fhura vhathu, ndo vha ndi tshi nga konḓelela u ni thetshelesa. ₁₅Zwino vhunga hu u fhambana nga maipfi na madzina na mulayo waṋu, zwi fhedzeni nga tshaṋu. A vha nṋe ndi nga si vhe muhaṱuli wa mafhungo o raloho!” ₁₆U ralo a mbo ḓi vha pandela afho khoroni. ₁₇Vhathu vhoṱhe vha fara Sosthenese murangaphanḓa wa sinagogo, vha mu rwela henefho khoroni. Na zwenezwo Galio a si vhuye a zwi londa.

₁₈Paulo a dzula Korinta na vhaṅwe Vhakhriste tshifhinga tshilapfu, a konou ṱuwa nga tshikepe e na Phrisila na Akwila vha ya Siria. Hone a sa athu takuwa Khengria, o vheulisa mavhudzi awe, ngauri o vha o anela Mudzimu muano. _19-21Vha tshi swika Efesa a dzhena sinagogoni a thoma u amba navho vha tshi sumbedzana nḓila. Vha mu humbela uri a dzule navho tshifhinga tshilapfu, hone ene a hana. A tshi vho ṱuwa a vha vhudza a ri, “Arali Mudzimu a tshi funa ndi ḓo dovha nda ḓa nda ni ṱola.” U ralo ha mbo ḓi vha u ṱuwa hawe Efesa, a sia Phrisila na Akwila henefho.

₂₂A tshi swika Khisaria a gonya Jerusalema, a reshana na tshivhidzo a konou fhirela Antiokia. ₂₃O no fhedza maḓuvhanyana henefho, a ṱuwa. A buḓekanya ḽa Galata na ḽa Frigia, a tshi enda a tshi khwaṱhisa Vhakhriste.

₂₄Muṅwe Mujuda a no pfi Apolosi o bebwaho Alekzandria, a ḓa Efesa. Onoyo o vha e muambi muhulu nahone Maṅwalo a tshi a ḓivha vhukuma. ₂₅O vha o funziwa a Nḓila ya Muṋe washu, a tshi funza nga Yesu nga u fungelela a sa bvi nḓilani. Hone o vha a tshi tou ḓivha ndovhedzo ya Johanisi fhedzi. ₂₆A ya sinagogoni a amba a sa ofhi tshithu. Phrisila na Akwila vha tshi mu pfa, vha ya nae hayani vha swika vha mu ṱalutshedza tshoṱhe nḓila ya Mudzimu. ₂₇Apolosi a ri u ya Akhaya, Vhakhriste vha Efesa vha ṅwalela vhafunziwa vha henengei uri vha mu ṱanganedze zwavhuḓi. A ri u swika a farisa zwihulu avho vhe vha vha vhatendi nga vhuthu ha Mudzimu. ₂₈Ndi uri o vha a tshi kona u kunda Majuda phanḓa ha vhathu musi vha tshi hanedzana nae, a tshi sumbedza nga Maṅwalo uri Yesu ndi Ene Mesia.