MISHUMO 16

₁Paulo a fhirela Derebe, u bva henefho a ya Listara. Henefho ho vha hu tshi dzula muṅwe mufunziwa a no pfi Timoti. Mme awe vho vha vhe Mukhriste wa Mujuda, khotsi vhe Mugiriki. ₂Timoti o vha e na dzina ḽavhuḓi kha Vhakhriste vha Listara na Ikoniamu. ₃Paulo nga u funa u tshimbila na Timoti, a mu fumbisa nge a ḓivha uri Majuda oṱhe vha dzulaho thungo dzenedzo vho vha vha tshi zwi ḓivha uri khotsi awe ndi Mugiriki. ₄Vha tshi khou ralo u tshimbila na miḓi, vha enda vha tshi laya vhatendi u tevhedza milayo ye ya vhoxwa nga vhaapostola na vhalisa Jerusalema. ₅U ralo ha vha u khwaṱhisa zwivhidzo lutendoni. Vhakhriste vha ḓi anda vha tshi ya ḓuvha ḽiṅwe na ḽiṅwe.

₆Vha buḓekanya mashango a Frigia na Galata, ngauri Muya Mukhethwa o vha a songo vha tendela u funza mafhungo maḓifha Asia. ₇Vha tshi swika masakhani a Misia, vha linga u dzhena shangoni ḽa Bithinia, hone Muya wa Yesu a vha dzivhisa. ₈Ndi hone vha tshi fhirela phanḓa nga u tou buḓekanya ḽa Misia vha tsela Troasi. ₉Vhusiku honoho Paulo a vhona bono ḽa munna wa Makedonia o ima a tshi khou mu humbela a tshi ri, “Kha vha wetshele ngeno Makedonia vha ri farise-vho.” ₁₀Paulo a ri u vhona bono ḽeneḽo ra mbo ḓi ṱoḓa tsha u wetshela ngatsho Makedonia nge ra vhona uri Mudzimu u khou ri vhidza uri ri yo funza vhathu vha henengei mafhungo maḓifha.

₁₁Ra ṱuwa Troasi nga tshikepe ra wetshela Samothirase, nga matshelo ra konou fhirela Niapolisi. ₁₂U bva henefho ra tshimbila ra ya muḓini wa Filipi u re muvhunduni wa u thoma wa Makedonia. Filipi ndi muḓi wa ṱhunḓu dzi bvaho Roma. Henefho ra fhedza maḓuvhanyana. ₁₃Nga Sabatha ra bva muḓini ra ya mulamboni, ri tshi ri ri ḓo wana fhethu hune ha rabelwa hone. Ra swika ra dzula fhasi ra amba na vhasadzi vhe vha vha vho kuvhangana henefho. ₁₄Kha vhe vha vha vha tshi ḓi thetshelesa ri tshi amba, ho vha hu na muṅwe musadzi a ofhaho Mudzimu a no pfi Lidia a bvaho Thiathira. Onoyo o vha e murengisi wa masila matswuku a muridili. Muṋe washu a vula mbilu yawe a ṱanganedza zwe Paulo a amba. ₁₅Ene na vha muṱa wawe vha lovhedzwa. Ndi hone a tshi ri kombetshedza a ri, “Arali vhukuma ni tshi vhona uri nangoho ndo ṱanganedza Muṋe washu, a ni ḓi ra dzula roṱhe?” A ri kwengweledza ra vhuya ra tenda.

₁₆Zwino ḽiṅwe ḓuvha ri tshi khou ya fhethu hune ha rabelwa hone, ra ṱangana na muṅwe musidzana wa phuli we a vha e na thuṅwa ya u bvumba. U bvumba hawe honoho ho vha hu tshi wanisa vhaṋe vhawe tshelede i si na vhukono. ₁₇Onoyo a ri tevhela ri na Paulo, a tshi enda a tshi zhamba a tshi ri, “Havha vhanna ndi vhaḓinḓa vha Mudzimu wa ṱaḓulu-ṱaḓulu. Vha khou ni ḓivhadza nḓila ine na nga tshidzwa ngayo!” ₁₈Uyo musidzana a ḓi ralo maḓuvha manzhi, Paulo zwa vhuya zwa tou mu dina, a rembuluwa a mu lavhelesa a kaidza thuṅwa a ri, “Nga dzina ḽa Yesu Khristo ndi ri ibva khae.” Iḽa thuṅwa ya mbo ḓi bva khae na zwenezwo. ₁₉Vhaṋe vhawe vha tshi vhona uri ndi hone zwa u wana tshelede zwo fhela, vha fara Paulo na Silasi vha vha kokodzela khoroni kha vhahulwane, ₂₀vha swika vha vha hwelela kha nduna dza Vharoma vha ri, “Havha vhanna ndi Majuda, zwino vha khou vusa mifhirifhiri muḓini washu; ₂₁vha khou funza na maitele ane riṋe Vharoma ri si fanele u a ṱanganedza na u a tevhedza.” ₂₂Ha kuvhangana gogo, na ḽone ḽa thoma u lwa navho; vhahaṱuli vha vha kherukanyela zwiambaro vha fhedza nga u ri vha rwiwe nga nnzi. ₂₃Musi vho no rwiwa vha zwi pfa, vha kudzwa dzhele, mulindadzhele a vhudzwa uri a tou vha linda vhukuma. ₂₄Mulindadzhele a ri u wana ndaela yeneyo, a vha dzhenisa dzhele ya bvungwi-bvungwi, a pata milenzhe yavho nga khotho.

₂₅Vhukati ha vhusiku Paulo na Silasi vha rabela vha tshi imba nyimbo dza u renda Mudzimu, vhaṅwe vho farwaho vha tshi khou thetshelesa. ₂₆Kathihi fhedzi ha vha na mudzinginyo muhulu, wa dzinginyisa dzhele na muteo wayo. Mahothi oṱhe a mbo ḓi vulea, geḓane dzo vhofhaho vho farwaho vhoṱhe dza mbo ḓi vhofholowa. ₂₇Mulindadzhele a karuwa a vhona mahothi a dzhele o vulea, a vhona unga vho farwaho vho shavha vhoṱhe. A mbo ḓi ṱomola banga ḽawe a tshi ṱoḓa u ḓivhulaha. ₂₈Paulo a zhamba a tshi mu kaidza a ri, “Aiwa nandi, ni songo ḓihuvhadza, ri hone roṱhe!”

₂₉Mulindadzhele a ri hu ḓiswe luvhone, a dzhena ngomu nga u gidima, a wela milenzheni ya Paulo na Silasi a tshi tou tetemela nga nyofho. ₃₀A vha bvisela nnḓa, a vha vhudzisa a ri, “Vhaṋe vhanga, ndi ite mini uri ndi tshidzwe?”

₃₁Vhone vha tshi fhindula vha ri, “Fulufhelani Muṋe washu Yesu, ndi hone ni tshi ḓo tshidzwa, inwi na muṱa waṋu woṱhe.” ₃₂Ndi hone vha tshi thoma u ṱalutshedza ene na muṱa wawe woṱhe ipfi ḽa Muṋe washu. ₃₃Zwenezwo vhusiku honoho a vha dzhia a yo ṱanzwa mbonzhe dzavho; ene na muṱa wawe woṱhe vha mbo ḓi lovhedzwa. ₃₄A ṱuwa na Paulo na Silasi a ya navho muṱani wawe a vha ṋea zwiḽiwa. Ḽi si vhe ḽone dakalo kha ene na muṱa wawe woṱhe nge vha vho fulufhela Mudzimu.

₃₅Ḽi tshi tsha vhahulwane vha ruma vhaḓinḓa vhavho vha maswole na fhungo ḽi no ri, “Vhofhololani avho vhanna vha ḓiṱutshele.”

₃₆Uyo mulindadzhele a vhudza Paulo a ri, “Vhahulwane vho swikisa ipfi ḽi no ri vha vhofhololwe. Zwino vhone nga vha ḓiṱutshele zwavho. Vha tshimbile zwavhuḓi.”

₃₇Hone Paulo a fhindula ayo maswole o rumiwaho a ri, “Riṋe vhadzulapo vha Roma, ra sokou rwiwa phanḓa ha vhathu ri songo vhuya ra ranga u sengiswa, ra kudzwa dzhele. U bva ra vho tou ṋengiswa? Izwo zwi nga si itee! Vhenevhaḽa vhahulwane kha vha tou ḓa vhone vhaṋe vha ri bvise!”

₃₈Vhaḽa maswole vha swikisa yeneyo phindulo kha vhahaṱuli. Vhone vha tshi pfa uri Paulo na Silasi ndi vhadzulapo vha Roma vha tshenuwa. ₃₉Vha ḓa vha vha kwengweledza, vha vha bvisa dzhele vha konou vha humbela uri vha ṱuwe muḓini uyo. ₄₀Paulo na Silasi u ṱuwa dzhele vha ya muṱani wa Lidia, vha ṱuṱuwedza Vhakhriste ngavho vhe vha ṱangana navho henefho, vha konou ṱuwa.