Khoro ya vhaapostola Jerusalema
1Vhaṅwe vhanna vha no bva Judia vha ḓa Antiokia vha thoma u funza Vhakhriste vha ri, “Ni nga si tshidzwe ni songo fumba nga maitele a Mushe.” 2Paulo na Barnabasi vha tou vha ṱaṱisa vhukuma vha tshi hanedzana navho kha mafhungo eneo. Ndi hone tshivhidzo tshi tshi fhedza nga u ri Paulo na Barnabasi na vhaṅwe vha henefho vha gonye Jerusalema vha yo pfa uri vhaapostola na vhalisa vha henefho Jerusalema vha ri mini nga eneo mafhungo.
3Tshivhidzo tshó vha ruma nga u ralo, vhone vha buḓekanya Finikia na Samaria vha tshi enda vha tshi anetshela vhathu zwa musi vhannḓa vha tshi rembuluwa; ḽi si vhe ḽone dakalo kha Vhakhriste. 4Vha tshi swika Jerusalema vha ṱanganedzwa nga tshivhidzo na vhaapostola na vhalisa, vha mbo vha hanelela zwoṱhe zwe Mudzimu a shuma ngavho. 5Hone vhaṅwe Vhakhriste vhe vha vha vha tshi bva kha tshigwada tsha Vhafarisei vha takuwa vha ri, “Vha fanela u fumba vha vhudzwa na uri vha tevhedze Mulayo wa Mushe.”
6Ha vha na dzulo ḽa vhaapostola na vhalisa uri vha suke eneo mafhungo. 7Musi vho no hanedzana tshifhinga tshilapfu, Pitrosi a takuwa a ri, “Vha hashu, ni tou zwi ḓivha zwavhuḓi uri zwi vho ita miṅwaha Mudzimu o nnanga vhukati haṋu uri ndi ḓivhadze mafhungo maḓifha kha vhannḓa hu u itela uri na vhone vha a pfe vha a tende. 8Mudzimu Ene ane a ḓivha mbilu dza vhathu, o no ḓi imelela vhannḓa nga u vha ṋea-vho Muya Mukhethwa sa riṋe. 9Ho ngo vha ṱalula kha riṋe; o vha ṱanzwa dzimbilu nge vha mu ṱanganedza. 10Zwino ni itwa ngani ni tshi linga Mudzimu nga u funa u hwesa avha vhathu muhwalo we wa kunda riṋe na vhomakhulukuku washu? 11Hufha roṱhe riṋe na vhannḓa ri tshi tenda uri ri tou tshidzwa nga tshilidzi tsha Muṋe washu Yesu!”
12Vhathu vhoṱhe vha fhumula vha thetshelesa Paulo na Barnabasi vha tshi vha hanelela a maḓembe na zwimangadzo zwe Mudzimu a shuma ngavho kha vhannḓa. 13Vha tshi fhedza u amba Jakopo a takuwa a ri, “Vha hashu, edzonu nthetshelesa! 14Simioni u kha ḓi bva u ri toololela zwa musi Mudzimu a tshi thoma u londa vhannḓa nga u ḓinangela lushaka khavho. 15Izwi ndi zwenezwiḽa zwe vhaporofita vha amba, sa fhaḽa he ha ṅwalwa upfi,
16“ ‘Muṋe washu u ri:
Ndi kha ḓi ḓo vhuya,
nnḓu ya Dafita yo waho nda dovha nda i fhaṱa.
Dumba ḽayo ndi ḓo ḽi vusa,
ḽa ima nga huswa.
17Ndi hone na vhaṅwe vha tshi ḓo ṱoḓa Muṋe wavho,
vhoṱhe vhannḓa vhe nda vha vhidza vha vha vhanga.
U ralo Muṋe washu,
we a ḓivhadza ḽeneḽi fhungo
18tsha kale na kale.’
19“Ndi zwine nṋe nda ri ri songo ṱolou dina vhannḓa vhane vha rembuluwa vha vha vha Mudzimu. 20Nga ri tou vha ṅwalela luṅwalo lwa u vha dzivhisa u ḽa ṋama dzo kumalaho nga u sumelwa midzimu ya zwifanyiso, na uri vha sendele kule na vhuṱudzi ha uri vhathu vha muṱa muthihi vha dzeane nga tshavho, na uri vha si ḽe tshithu tshe tsha fa nga u tou tshipiwa, kana u ḽa malofha. 21Tenda tsha kale na kale Mulayo wa Mushe u tshi khou ḓi vhaliwa sinagogoni Sabatha iṅwe na iṅwe, u tshi funziwa miḓini yoṱhe.”
Luṅwalo lwe lwa ṅwalelwa Vhakhriste vha bvaho kha vhannḓa
22Ndi hone vhaapostola na vhalisa na tshivhidzo tshoṱhe vha tshi pfana uri hu nangwe vhanna khavho uri vha ṱuwe na Paulo na Barnabasi vha ye Antiokia. Ha nangwa Judasi ane ḽiṅwe a pfi Barasabasi, na Silasi, vhanna vhe vha vha vhe vharangaphanḓa tshivhidzoni. 23Luṅwalo lwe vha vha ruma nalwo lwo vha lu tshi ri,
“Riṋe vhaapostola na vhalisa vhane ra vha vhaṅwe nga inwi ri vusa vhoṱhe vhane vha vha Vhakhriste nga riṋe, vha bvaho kha vhannḓa henengeo Antiokia na kha ḽoṱhe ḽa Siria na Kilikia. 24Ri pfa hu tshi pfi hu na vhaṅwe vhashu vhe vha ḓa vha vusa dzikhakhathi vha ni ḽisa mbilu nga u sokou amba-amba, ngeno vha songo rumiwa nga riṋe. 25Zwino ro dzula ra pfana roṱhe uri ri rume vhaḓinḓa kha inwi. Vhenevho vha ḓo ḓa na khonani dzashu Barnabasi na Paulo, 26vhanna vhe vha vhuya vha tou ḓiṅala vha tshi shumela Muṋe washu Yesu Khristo. 27Hezwi zwine ra ṅwala hafha ri khou dovha ra laedza Judasi na Silasi vhane vha ḓo tou dovha vha ni vhudza nga mulomo. 28Riṋe na Muya Mukhethwa ro pfana uri ri si dovhe ra ni inga muṅwe muhwalo arali zwi si hezwi zwi re zwone zwihulwane: 29u ila ṋama yo sumelwaho midzimu ya zwifanyiso; u ila malofha kana tshithu tshe tsha fa nga u tou tshipiwa; na vhuṱudzi ha uri vhathu vhe vha muṱa muthihi vha dzekane nga tshavho ni vhe kule nazwo. Arali na ila zwenezwo ni ḓo vha no ita zwone-zwone. Ni takale!”
30Vhaḓinḓa vha ruṅwa Antiokia vha swika vha kuvhanganya tshivhidzo tshoṱhe tsha Vhakhriste vha vha ṋea luḽa luṅwalo. 31Musi vhathu vho no lu vhala, vha takala vhukuma nahone lwa tou vha ṱuṱuwedza. 32Judasi na Silasi vhe na vhone vha vha vhe vhaporofita vha amba tshifhinga tshilapfu vha tshi khou ṱuṱuwedza Vhakhriste na u vha khwaṱhisa. 33Ho no fhela tshifhinga vhe henengei Vhakhriste vha vha vhofholola vha ri vha tshimbile zwavhuḓi vha tshi humela kha vhaḽa vho vha rumaho.
35Paulo na Barnabasi vhone vha fhedza tshifhinga vhe Antiokia vha tshi farisana na vhaṅwe vhanzhi vha tshi funza ipfi ḽa Muṋe washu na u ḓivhadza vhannḓa mafhungo maḓifha.
U fhambana ha Paulo na Barnabasi
36Ngavhuya Paulo a amba na Barnabasi a ri, “A si khwiṋe ri tshi dovha ra dalela miḓi yoṱhe he ra funza ipfi ḽa Muṋe washu ri vhone uri Vhakhriste vha khou tou tshila hani?” 37Barnabasi o vha e na muhumbulo wa uri vha ṱuwe na Johanisi ane ḽiṅwe a pfi Markosi. 38Paulo ene a hana vha tshi ṱuwa nae nge a vha o no vha tshenzhedza nga u vha sia vha tshi lwa na mushumo vhe vhoṱhe musi vhe Phamfilia. 39Ha vuwa khani khulu vha vhuya vha tshi tou fhambana, Barnabasi a dzhia Markosi vha namela tshikepe vha livha Kipirosi. 40Paulo ene a nanga Silasi, tshivhidzo tsha vha kumedza kha vhuthu ha Muṋe washu, vha konou ṱuwa. 41Vha buḓekanya Siria na Kilikia vha tshi khwaṱhisa zwivhidzo.
