Pitrosi a tshi anetshela tshivhidzo tsha Jerusalema zwe zwa itea
1Vhaapostola na vhaṅwe Vhakhriste ngavho kha ḽoṱhe ḽa Judia vha zwi pfa uri vhannḓa na vhone vho ṱanganedza ipfi ḽa Mudzimu. 2Pitrosi a tshi gonya Jerusalema, vho fumbaho vha mu sola 3vha ri, “Khezwi vha tshi dalela vhannḓa vha songo fumbaho, vha ita na u ḽa navho!” 4Ndi hone Pitrosi a tshi vha hanelela zwoṱhe a sa sii tshithu a ri, 5“Ndo vha ndi muḓini wa Jopa ndi tshi khou rabela, nda ḓipfa ndi Muyani, nda vhona bono. Nda vhona hu tshi tsiswa tshithu tshi no nga pesa ḽihulu ḽa seila ḽo farwa nga khuḓa dzaḽo nṋa, tsha vhuya tsha swika kha nṋe. 6Ndi tshi ṱodzimela nda wana ngomu hu tshi ri phukha dza hayani, he dza ḓaka, he dzi tshimbilaho nga thumbu, he zwiṋoni. 7Zwenezwo nda pfa ipfi ḽi tshi ri, ‘Takuwa Pitrosi, u shidzhe u ḽe!’ 8Nṋe nda ri, ‘Aiwa nandi Muṋe wanga, tshee nda rano a thi athu vhuya nda dzhenisa zwo iledzwaho mulomoni wanga kana zwo kumalaho.’ 9Ḽiḽa ipfi ḽa dovha ḽa amba ḽi tshi bva ṱaḓulu ḽa ri, ‘Zwe Mudzimu a ri zwo kumululwa, iwe u songo ri zwo kumala.’ 10Zwa ralo zwa vhuya zwa ita kararu, zwiḽa zwithu zwoṱhe zwa konou humiselwa ṱaḓulu. 11Nga tshifhinga tshenetsho vhaṅwe vhanna vhararu vhe vha vha vho ruṅwa ha nṋe vha tshi bva Khisaria vha dzhena henefho nḓuni ye ra vha ri tshi dzula khayo. 12Muya a mmbudza uri ndi ṱuwe navho ndi sa timatimi. Na avha vhaṱanu na muthihi vha Jopa vha re vhaṅwe nga riṋe vha mphelekedza ra ya ha Khorneliasi. 13Ene a ri anetshela a musi a tshi vhona ngomu nḓuni yawe ho ima muruṅwa we a amba nae a ri, ‘Ruma vhathu Jopa vha yo u vhidzela muthu ane a pfi Simoni, ḽiṅwe a pfi Pitrosi. 14Onoyo u ḓo u vhudza zwine zwa ḓo u tshidza, iwe na muṱa wau woṱhe.’ 15Musi ndi tshi thoma u amba, Muya Mukhethwa a ḓa khavho sa zwe a ḓa kha riṋe mathomoni. 16Ndi hone ndi tshi elelwa ipfi ḽa Muṋe washu ḽa u ri, ‘Johanisi o vha a tshi lovhedza nga maḓi; inwi ni ḓo lovhedzwa nga Muya Mukhethwa.’ 17Hufha Muṋe washu o ṋea vhannḓa tshifhiwa tshenetshiḽa tshe a ṋea riṋe zwiḽa ri tshi fulufhela Muṋe washu Yesu Khristo. Zwino ndi nṋe nnyi we nda vha ndi tshi nga dzivhisa Mudzimu u ita zwine a funa?”
18Vha tshi pfa zwenezwo vha litsha u mu sola, vha renda Mudzimu vha ri, “Izwo Mudzimu vhannḓa na vhone o vha ṋea tshifhinga tsha u rembuluwa vha tshidzwa!”
Tshivhidzo tsha Antiokia
19Mutovholo we wa thoma nga u vhulawa ha Stefane wo balanganya Vhakhriste. Vhaṅwe vho vhuya vha swika Finikia, vhaṅwe Kipirosi, vhaṅwe Antiokia, vha enda vha tshi amba mafhungo maḓifha, hone vha tshi vhudza Majuda fhedzi. 20Huno vhaṅwe vhavho, vhanna vha bvaho Kipirosi na Kirene, vha swika Antiokia vha amba mafhungo maḓifha a Muṋe washu Yesu vha tshi vhudza na vhannḓa. 21Muṋe washu a vha farisa, vhathu vha fulufhela Muṋe washu nga vhunzhi, vha rembuluwa vha vha vhawe.
22Mafhungo aya a ri u pfala tshivhidzoni tsha Jerusalema, tsha ruma Barnabasi Antiokia. 23A tshi swika a vhona uri Mudzimu o itela vhathu vhuthu vhungafhani, a takala a vha ṱuṱuwedza vhoṱhe uri vha dzule vha tshi fulufhedzea tshoṱhe vha sa ṱutsheli Muṋe washu, 24nge a vha e muthu muvhuya o ḓalaho Muya Mukhethwa na lutendo. Vhathu vhanzhi vha rembuluwa vha vha vha Muṋe washu.
25Ndi hone Barnabasi a tshi fhirela Tharasisi u ṱoḓa Saulo. 26A ri u mu wana a mu ḓisa Antiokia. Vha fhedza ṅwaha woṱhe vha tshi dzula na tshivhidzo vha tshi shumisana, vha funza vhathu vhanzhi-vhanzhi. Antiokia henefho ndi he vhafunziwa vha wana dzina ḽa u pfi Vhakhriste.
27Misi iyo ha ḓa vhaporofita Antiokia vha tshi bva Jerusalema. 28Muṅwe wavho a no pfi Agabosi a takuwa o ṋewa maanḓa nga Muya Mukhethwa, a porofita uri nḓala khulu i ḓo ṱuwa i tshi wela shango ḽoṱhe. (Nḓala yeneyo yo ḓo wa musi Klaudiosi e Khisara.) 29Vhafunziwa vha vhofha ḽa uri vhoṱhe vha rumele zwa u vhavhalela Vhakhriste ngavho vha dzulaho Judia, muṅwe na muṅwe a tshi rumela nga hune a kona. 30Nangoho vha ita nga u ralo, vha ruma Barnabasi na Paulo u isa zwifhiwa kha vhalisa vha tshivhidzo.
