MISHUMO 10

₁Muḓini wa Khisaria ho vha hu na muṅwe munna a no pfi Khorneliasi. Onoyo o vha e mulangagomane wa mmbi ya Vharoma ye ya vha i tshi pfi Mmbi ya Italia. ₂Ene na muṱa wawe woṱhe vho vha vha tshi ofha Mudzimu vha tshi dzula vha tshi rabela. O vha a tshi vhavhalela vhashai vha Majuda nga zwithu zwinzhi, a tshi dzula a tshi rabela tshifhinga tshoṱhe. ₃Ḽiṅwe ḓuvha henefha nga tshifhinga tsha vhuraru tsha masiari a vhona bono, kha bono ḽeneḽo a vhona muruṅwa wa Mudzimu zwavhuḓivhuḓi a tshi dzhena a amba nae a ri, “Khorneliasi!” ₄Ene a mu lavhelesa o tshenuwa a ri, “Ndi mini muṋe wanga?” Muruṅwa a ri, “Thabelo dzau na mishumo yau ya u vhavhalela vhashai Mudzimu o zwi vhona, a zwi ṱanganedza sa nduvho. ₅Zwino ruma vhanna Jopa uri vha yo vhidza Simoni ane ḽiṅwe a pfi Pitrosi. ₆Onoyo ndi mueni wa Simoni musuki wa marevho ane haya hawe ha vha tsini ha lwanzhe.”

₇Uḽa muruṅwa we a vha a tshi khou amba nae o no ṱuwa, Khorneliasi a vhidza vhashumi vhawe vha nḓuni vhavhili, na muṅwe wa maswole a u mu linda, a ofhaho Mudzimu, ₈a vha toololela zwoṱhe a konou vha ruma Jopa.

₉Nga matshelo vhe nḓilani, vha tshi vho sendela Jopa, ḓuvha ḽi nṱha ha ṱhoho, Pitrosi a vha a tshi khou gonya kha ṱhanga ya nnḓu u yo rabela. ₁₀A farwa nga nḓala a pfa a tshi tou tama zwiḽiwa. Musi zwi tshi kha ḓi bikwa a pfa e Muyani, ₁₁a vhona ḽiṱaḓulu ḽo vulea hu tshi khou tsiswa tshithu tshi no tou nga pesa ḽihulu ḽa seila ḽo farwa nga khuḓa dzaḽo nṋa. ₁₂Nga ngomu ho vha hu na phukha dza tshakha-tshakha khathihi na zwiṋoni na zwi tshimbilaho nga thumbu. ₁₃A pfa ipfi ḽi tshi amba nae ḽa ri, “Pitrosi takuwa, u shidzhe u ḽe!” ₁₄Hone Pitrosi a ri, “Aiwa nandi Muṋe wanga! Hufha ndi sa athu vhuya nda ḽa tshithu tsho iledzwaho kana tsho kumalaho!” ₁₅Ipfi ḽa dovha ḽa ri, “Zwe Mudzimu a ri zwo kumululwa, iwe u songo ri zwo kumala.” ₁₆Zwa ralo zwa vhuya zwa ita kararu; tshiḽa tshithu tsha konou dovha tsha humiselwa ṱaḓulu.

₁₇Pitrosi a tshi kha ḓi vha o kanuka a sa ḓivhi uri bono iḽo ḽi nga vha ḽi tshi amba mini, vhaḽa vhanna vho rumiwaho nga Khorneliasi vho vha vho no zwi pfa uri nnḓu ya Simoni ndi yeneyo, vhó no ima muṋangoni. ₁₈Vha vhidzelela vha tshi vhudzisa arali hu na mueni henefho a no pfi Simoni, ḽiṅwe a pfi Pitrosi.

₁₉Pitrosi a tshi kha ḓi elekanya uri bono iḽo ḽi nga vha ḽi tshi amba mini, Muya a amba a ri, “Ho ḓa vhanna vhavhili vhane vha khou u ṱoḓa. ₂₀Zwino ṱavhanya u tse, u ṱuwe navho u sa timatimi; ndi Nṋe ndo vha rumaho.” ₂₁Ndi hone Pitrosi a tshi tsa a ya kha vhaḽa vhanna a ri, “Muthu ane na khou ṱoḓa ene ndi nṋe. No ḓelani?” ₂₂Vhone vha fhindula vha ri, “Ro ruṅwa nga Khorneliasi wa mulangagomane. Ndi munna muvhuya a ofhaho Mudzimu, ane Majuda vhoṱhe vha mu amba zwavhuḓi. O laiwa nga muruṅwa wa Mudzimu uri a vha vhidze vha ye nḓuni yawe, a pfe zwine vha ḓo mu vhudza.” ₂₃Pitrosi a vha swielela vha eḓela.

Nga matshelo a ṱuwa navho, na vhaṅwe Vhakhriste ngae vha Jopa. ₂₄Nga mbamatshelo a swika Khisaria, a wana Khorneliasi o dzula o mu lindela o vhidza na mashaka na khonani dzawe vhukuma. ₂₅Pitrosi a tshi ṱoḓa u dzhena, Khorneliasi a mu ṱanganedza, a gwadama phanḓa hawe a losha. ₂₆Hone Pitrosi a mu takusa a ri, “Kha vha takuwe; na nṋe ndi muthu sa vhone.” ₂₇Pitrosi a dzhena nḓuni a tshi khou ḓi amba na Khorneliasi, a wana ho kuvhangana vhathu vhanzhi. ₂₈A amba navho a ri, “Inwi vhaṋe ni a zwi ḓivha zwavhuḓi uri zwi a ila kha Mujuda u konana na wa luṅwe lushaka kana u mu dalela. Hone nṋe Mudzimu o ntsumbedza uri ndi songo vhuya nda ri muṅwe muthu u na tshika kana zwi a ila u konana nae. ₂₉Ndi zwe ni tshi mmbidza nda mbo ḓi dzhena nḓilani nda si vhuye nda lamba. Zwino ndi vhidzelwani-ha?”

₃₀Khorneliasi a ri, “Mbamulovhauḽa nga tshifhinga tshenetshino tsha vhuraru tsha masiari, ndo vha ndi tshi khou rabela nḓuni yanga, kathihi fhedzi nda vhona phanḓa hanga ho ima munna wa zwiambaro zwi penyaho, ₃₁a ri, ‘Khorneliasi, Mudzimu o pfa thabelo yau, na u vhavhalela hau vhashai o hu vhona. ₃₂Zwino ruma vhathu Jopa vha ye vha u vhidzele muṅwe munna a no pfi Simoni, ḽiṅwe u pfi Pitrosi. Vha ḓo mu wana e mueni wa Simoni musuki wa mikumba a dzulaho tsini ha lwanzhe.’ ₃₃Nṋe nda mbo ḓi ruma vhathu u vhidza vhone, nazwino vho ita zwone vha ḓa. Zwino ri fhano phanḓa ha Mudzimu, ro lindela u pfa zwoṱhe zwe Muṋe washu a vha laedza.”

₃₄Pitrosi a thoma u amba a ri, “Nṋe ndi hone ndo zwi vhona uri Mudzimu ha ṱaluli; ₃₅onoyo ane a mu ofha a ita zwine Ene a funa, u a mu ṱanganedza a sa sedzi uri ndi wa lushaka lufhio. ₃₆Mudzimu o ruma ipfi ḽawe kha Vhaisraele a vha ḓivhadza mulalo nga Yesu Khristo a re Ene Muṋe wa vhoṱhe. ₃₇Inwi ni a ḓivha zwe zwa itea kha ḽoṱhe ḽa Judia na he zwa thoma ngaho Galelia musi Johanisi a tshi ḓivhadza vhathu uri vha lovhedzwe. ₃₈Ndi amba zwa Yesu wa Nazaretha we Mudzimu a mu ta a mu ṋea Muya Mukhethwa na maanḓa, a tshimbila hoṱhe a tshi tonda vhathu khathihi na u fhodza vhoṱhe vhe vha vha vho tsikeledzwa nga diabolo, ngauri Mudzimu o vha e nae. ₃₉Riṋe ri dziṱhanzi dza zwoṱhe zwe a ita shangoni ḽa Majuda na Jerusalema. Vhathu vhone vho mu vhulaha nga u tou mu vhamba kha tshifhambano. ₄₀Hone Mudzimu a mu vusa vhafuni nga ḓuvha ḽa vhuraru, a ita uri vhathu vha kone u mu vhona – ₄₁u ralo ndi sa ambi vhathu vhoṱhe – o vhonwa nga riṋe fhedzi ri re ṱhanzi dze Mudzimu a vha o dzula o dzi nanga, ra ita na u ḽa nae ra nwa nae musi o no vuwa vhafuni. ₄₂O ri laya uri ri ḓivhadze lushaka lwa Majuda mafhungo maḓifha, na u ṱanzilela uri ndi Ene o vhewaho nga Mudzimu uri a vhe Muhaṱuli wa vha tshilaho na vho faho. ₄₃Vhaporofita vhoṱhe vha ṱanzilela onoyo vha tshi ri vhoṱhe vhane vha mu fulufhela, Mudzimu u ḓo vha hangwela a tshi itela zwe Yesu a shuma.”

₄₄Pitrosi a tshi kha ḓi amba, Muya Mukhethwa a tsela kha vhoṱhe vhe vha vha vha tshi khou thetshelesa mafhungo eneo. ₄₅Vhaḽa Vhakhriste vha Majuda vhe vha ḓa na Pitrosi vha tshi bva Jopa vha kanuka vha tshi vhona vhannḓa vho shululelwa-vho Muya Mukhethwa, tshifhiwa tsha Mudzimu, ₄₆ngauri vho pfa vha tshi amba na nga ndimi vha tshi khoḓa Mudzimu. Pitrosi a ri, ₄₇“Zwino ndi nnyi ane a nga kha ḓi hana vha tshi lovhedzwa nga maḓi? Hufha na vhone vho no ṱanganedza Muya Mukhethwa sa riṋe.” ₄₈Ndi hone a tshi ri vha lovhedzwe vha vhe vha Yesu Khristo. Vhone vha mu humbela uri a fhedze maḓuvhanyana e navho.