2 VHAKORINTA 13

₁Zwino lu ḓo vha lwa vhuraru ndi tshi ḓa u ni dalela. Maṅwalo a ri, “Mulandu muṅwe na muṅwe wo fanela u tikedzwa nga ṱhanzi mbili kana tharu.” ₂Zwino ndi tshi amba na vhaḽa vhe vha tshinya vha si laṱe, khathihi na vhaṅwe, ndi ri: ndi tshi dovha u ḓa henefho a hu na na muthihi ane a ḓo mponyoka. Hezwi ndo ranga u zwi amba zwiḽa ndo ni dalela lwa vhuvhili, zwino ndi khou dovha nda zwi amba ndi siho henefho. ₃Ndi hone ni tshi ḓo wana vhuṱanzi ha uri ndi Khristo a no amba nga mulomo wanga. Ene a tshi shuma vhukati haṋu ha shayi nungo, tshawe ndi u ni sumbedza uri u na maanḓa. ₄Naho o vhambwa tshifhambanoni a tshi sumbedza u shaya nungo, zwino u a tshila nga maanḓa a Mudzimu. Zwenezwo nge ra vha vhathihi nae na riṋe ri shaya nungo; ri ḓo dovha ra tshila nae nga maanḓa a Mudzimu. Zwenezwo na inwi ni ḓo vhona zwi tshi itea.

₅Inwi vhaṋe ṱolani mbilu dzaṋu ni ḓisedze, ni vhone arali vhukuma ni na lutendo. Kani-ha a ni zwi ṱalukanyi uri Yesu Khristo u kha inwi? Arali ni sa zwi ṱalukanyi zwi amba uri no wanala ni vhatendi vha khole-khole. ₆Ndi na fulufhelo ḽa uri ni a zwi ṱalukanya uri riṋe ro wanala ri vha ngoho. ₇Ri rabela Mudzimu uri ni si vhuye na khakha; u ralo a si u ṱoḓa u sumbedza ngoho yashu, ndi u ṱoḓa fhedzi uri inwi ni ite zwivhuya, naho riṋe ri tshi nga wanala zwashu ri siho ngohoni. ₈Ngoho a i lwiwi nayo; u kona hashu ndi musi ri tshi lwela yone ngoho. ₉Naho riṋe ri tshi nga shaya zwashu nungo ri a takala, ngauri inwi ni na nungo. Na riṋe ri a ni rabelela uri ni vhe vhatendi vho khunyelelaho. ₁₀Ndi zwine nda ni ṅwalela ndi tshee ngeno kule, uri ndi tshi swika ndi si ni ḽele vhuhali; maanḓa a u zwi ita Muṋe washu o nṋea, hone ho ngo nṋetshela u ni thutha, o nṋetshela u ni fhaṱa.

₁₁Zwino-ha vha hashu, ni vhe hone! Vhuelelani nḓilani; ipfani ndi tshi ni laya; anḓanani nga tshaṋu, ni tshile nga mulalo, ndi hone Mudzimu wa lufuno na mulalo a tshi ḓo vha na inwi.

₁₂Reshanani nga u kuvhatedzana sa vhathu vha Mudzimu.

Vhathu vhoṱhe vha Mudzimu vha ri ni vhe hone.

₁₃Ngavhe vhuthu ha Muṋe washu Yesu Khristo, na lufuno lwa Mudzimu, na u konana na Muya Mukhethwa zwi tshi vha na inwi noṱhe.