2 VHAKORINTA 12

₁Litshani ndi zuwe naho zwi sa farisi tshithu. Zwino ndi ḓo amba nga mabono na nzumbululo zwi bvaho ha Muṋe washu. ₂Ndi ḓivha muṅwe Mukhriste we a takulelwa ṱaḓulu a swikiswa kha ḽiṱaḓulu ḽa vhuraru; kana o ṱuwa o tou ralo, kana ho ṱuwa muya fhedzi, nṋe ndi nga si zwi ḓivhe, zwi ḓivhiwa nga Mudzimu, hone zwino ho no fhela miṅwaha ya 14 zwo itea. _3-4Ndi dovha nda ri, muthu hoyo o takulelwa Pharadisoni – kana o ṱuwa o tou ralo, kana ho ṱuwa muya fhedzi, nṋe ndi nga si zwi ḓivhe, zwi ḓivhiwa nga Mudzimu – hone onoyo muthu e henengei o pfa zwi sa ambiwi, zwine muthu a sa tendelwe u zwi bula. ₅Onoyo ndi ene ane nda ḓo mu zuwa, hone u ḓikhoḓa ndi nga si zwi ite; tshine nda nga tshi zuwa ndi u shaya nungo hanga.

_6-7Nangwe nda ḓikhoḓa ndi ḓo vha ndi si tsilu ngauri ndi ḓo vha ndi tshi khou amba ngoho. Huno a thi nga zwi iti ngauri naho ndo dzumbululelwa zwingafhongafho a thi funi muthu a tshi mphima a fhirisa zwine ene muṋe a vhona ndi tshi zwi ita na u zwi amba.

Hone uri ndi si ḓihangwe nda ḓihudza, ndo longwa mupfa muvhilini wanga, lune zwa nga ndi muruṅwa wa Saṱhane ane a nndida. ₈Ndi luraru ndi tshi luvhelela Muṋe washu uri a ṱomole tshithu itsho tshi bve kha nṋe. ₉Phindulo yawe ya ri, “Tshine wa tshi lila ndi tshilidzi tshanga fhedzi. Maanḓa anga a vhonala tshoṱhe kha onoyo ane a shaya nungo.” Ndi zwine nda takadzwa nga honoho u shaya nungo hanga, ngauri ndi hone ndo tsireledzwa nga maanḓa a Khristo. ₁₀Zwenezwo-ha ndi pfa ndo fushea ndi tshi shaya nungo, ndi tshi nyadziswa, ndi tshi ṱangana na vhuleme, ndi tshi tovholwa, ndi tshi fara tsha u konḓa nge nda vha wa Khristo. Hezwi ndi tshi shaya nungo ndi hone-ha ndo khwaṱha.

₁₁A ni vhoni-ha, zwino ndi vho nga sa tsilu; hone ndi inwi no nnyitisaho. Hone hu uri ndo vha ndo fanela u fhululedzwa nga inwi; ngauri naho ndi si tshithu zwanga, avho vhaapostola vhaṋu vha maṱhakheni a hu na na huthihi hune vha mphira. ₁₂Ndo ni sumbedza uri ndi muapostola nga zwiga na mishumo i kanukisaho na maḓembe, ndi sa fheli mbilu. ₁₃Ndi tshini tshe nda itela zwiṅwe zwivhidzo inwi ndi si ni itele, arali hu si zwenezwo zwauri nṋe a tho ngo ni lemedza. Huno a ni mpfareli u khakha honoho naa?!

₁₄Zwino lwo no vha lwa vhuraru ndi tshi ḓilugisela u ni dalela, na zwino a thi nga ni lemedzi. Nṋe a thi ṱoḓi tshelede yaṋu, ndi ṱoḓa inwi. A si vhana vha no ṱunḓela vhabebi, ndi vhabebi vha no ṱunḓela vhana. ₁₅Ndi nga fhelelwa zwanga nga zwoṱhe zwine nda vha nazwo, nda vhuya nda tou fa zwanga, tenda zwa ni farisa. Ngoho ni nga ntsandela u ni funa zwingafhangafha, na tou ntsandela zwenezwo fhedzi naa?

₁₆Ndi zwone, a tho ngo ni lemedza. Hone ni nga ḓi ri ndo ni fasha nga vhumbulu, ₁₇nda ni fhura nga muṅwe wa vhaḽa vhaḓinḓa vhe nda vha ruma. ₁₈Ndo kwengweledza Titosi uri a ḓe a ni dalele, a fhelekedzwa nga muṅwe wa hashu. Kani-ha onoyo Titosi o ni fhura? Kani nṋe na ene a ri shumi nga muya muthihi? A ri tshimbili nga nḓila nthihi kani?

₁₉Khamusi no no ḓi dzula no vhona unga ri khou edzisa u ḓilamulela kha zwine na ri humbulela. Hai nandi, ri amba ri vhathihi na Khristo ri tshi pfiwa nga Mudzimu. Vhafunwa, na zwoṱhe zwine ra zwi ita ri itela u ni fhaṱa. ₂₀Ndi dinwa ngauri khamusi ndi ḓe ndi tshi swika nda wana ni si zwine nda funa ni tshi vha zwone, na inwi na wana nṋe ndi si zwine na funa ndi tshi vha zwone. Tshine nda ḽa mbilu ngatsho ndi uri khamusi ndi ḓo wana hu na dziphambano na mavivho na u sinyutshelana na tseḓa na u nyefulana na zwitshele na u ḓihudza na vilinga. ₂₁Ndi ofha uri khamusi ndi tshi dovha u ḓa Mudzimu wanga u ḓo nṱukufhadza ni tshi zwi vhona, nahone ndi ḓo lilela vhanzhi vhe vha tshinya vha si tsha laṱa vhuaḓa havho na vhupombwe na kutshilele kwa vhuḓabaḓaba.