1 VHATHESALONIKA 2

₁Vha hashu, ni a zwi ḓivha inwi vhaṋe uri zwe ra ḓela zwone ngeo zwo sala zwi tshi aṋwa mitshelo. ₂Ni ḓivha na uri ri tshi ḓa ngeo ro vha ri kha ḓi bva u levhelwa na u tambudzwa Filipi; hone-ha naho zwo ralo Mudzimu o ri ṋea maanḓa ra ḓivhadza mafhungo maḓifha awe ri sa ofhi na vhuhali ha vha ri pikisaho. ₃Riṋe ri tshi ni kwengweledza ho vha hu si u ṱoḓa u ni xedza; ro vha ri si na vhumbulu kana vhukwila. ₄Mudzimu o vhona ro fanela u hweswa mushumo wa u ḓivhadza mafhungo maḓifha awe, nazwino ndi eneo ane ra amba, ri sa ambeli u takadza vhathu, ri tshi lwela u takadza Mudzimu, Ene Muṱoli wa mbilu dzashu.

₅Na inwi vhaṋe ni a zwi ḓivha uri a ro ngo vhuya ra ni hoya na ḓuvha na ḽithihi; a ri athu vhuya ra pila tseḓa nga maipfi, ngoho Mudzimu ndi ṱhanzi. ₆Nahone a ro ngo vhuya ra ṱoḓa u sokou khoḓwa nga vhathu, nangwe hu inwi, kana vhaṅwe-vho. ₇Zwino ḓivhani uri sa vhaapostola vha Khristo ro vha ri na pfanelo ya u huliswa; naho zwo ralo a ro ngo zwi ṱoḓa, ro tou ni itela vhuthu sa mme a tshi lela vhana vhawe vhe a vha beba. ₈Ro vha ro ni ṱuvha, ra ni ḓisela mafhungo maḓifha, ra ita na u ḓikumedza inwi, ngauri ro vha ri sa ni funi zwone. ₉Vha hashu, ni kha ḓi humbula uḽa mushumo na u ḓinetisa hashu, zwiḽa ri tshi ḓipalela nga u shuma vhusiku na masiari uri ri si lemedze muthu musi ri tshi ni ḓivhadza mafhungo maḓifha a Mudzimu. ₁₀Inwi vhaṋe khathihi na Mudzimu ni ṱhanzi dza uri ro vha ri tshi tshilisana hani na inwi vhatendi, ri si na vhumbulu, ri sa ni khakheli ri sa solisei. ₁₁Ni a zwi ḓivha uri muṅwe na muṅwe waṋu ro mu tonda unga khotsi a tshi tonda ṅwana wawe vhukuma, ₁₂ri tshi ni khuthadza ra ni kwengweledza ra tou ombedzela uri ni tshile lwo fanelaho vhathu vha Mudzimu, Ene we a ni vhidza uri ni dzhene muvhusoni na vhugalani hawe.

₁₃Ndi zwine riṋe ri si fhidze u livhuha Mudzimu ngazwo, nga u vhona uri ni tshi ṱanganedza ipfi ḽa Mudzimu ḽe na ḽi pfa nga riṋe a no ngo ḽi ṱanganedza ḽa nga ndi fhungo ḽa vhathu zwavho, no ḽi ṱanganedza ḽi ipfi ḽa Mudzimu. Nazwino vhukuma ndi ḽone, zwi tou vhonala na nga zwine ḽa bveledza kha inwi vhe na vha vhatendi. ₁₄Ndi tshi ralo vha hashu ndi uri no kanda-vho vhuṱalani ha zwivhidzo zwa Mudzimu zwa vha re vha Khristo Yesu zwi re Judia: inwi no tambudzwa-vho nga lushaka lwa haṋu unga vhaḽa vho ḓi tambudzwa nga Majuda vha havho. ₁₅Vhenevho Majuda ndi vhone-ha vhe vha vhulaha Muṋe washu Yesu na vhaporofita; na riṋe vho ri tovhola; a vha iti zwi takadzaho Mudzimu; na kha vhathu a hu na na muthihi ane vha sa lwe nae; ₁₆vha edzisa na u ri kundisa u vhudza vhannḓa mafhungo ane vha nga tshidzwa ngao, ha vha hone u ḓadzisa muelo wa vhutshinyi havho wa tou ima muṱumba. Ndi hone-ha vho guma; zwino Mudzimu ndi hone a tshi ḓo vha rwa.

₁₇A vha riṋe vha hashu, hezwiḽa ri tshi kha ḓi tou bva u phinyela maṱoni aṋu – hone hó tou ṱuwa muvhili fhedzi, mbilu dzone dza sala – ra ni ṱuvha lwe ra edzisa nga nungo dzoṱhe uri ri ni vhone. ₁₈Ndi zwe ra vho funa u dovha u ni dalela; a vha nṋe Paulo ndo edzisa nda dovha; ra ro kundiswa nga ene Saṱhane. ₁₉Tshe ra tshi ṱulutshela, tshine tsha ri takadza, wone muṅene washu une ra ḓo u ṱongisa musi ro ima phanḓa ha Muṋe washu Yesu a tshi vhuya ndi ufhio-ha arali e si inwi? ₂₀Iṱali e inwi khuliso yashu na dakalo ḽashu.