1Bo anamisitse thata ya jone le lefatshe jotlhe, bo rulaganya dilo tsotlhe sentle.
Dilo tsotlhe tse di eletsegang di tswa mo Botlhaleng
2Ke jone ke neng ka bo rata mme ka bo senka go tšwa bonnyennyeng jwa me, ka ikaela go bo nyala, ka ratana le bontle jwa jone.
3Bo ntlafatsa go tsalwa ga jone mo go tlotlometseng ka go tshela le Modimo, ka Morena wa dilo tsotlhe a ne a bo rata.
4Ke jone e leng moruti mo masaitsiweng a kitso ya Modimo, bo tlhopha ditiro tse o tšhwanetseng go di dira.
5Fa e le gore mo botshelong jono khumo ke leruo le le eletsegang, ke eng se se humileng go feta Botlhale jo tiro ya jone e leng gongwe le gongwe?
6Kgotsa fa e le gore tlhaloganyo e a dira, ke kae mo go nang le sengwe se segolo bogolo go feta botlhale jo e leng serulaganyi sa dilo tsotlhe?
7Le gone fa e le gore O rata tshiamo, O raya eng? Ka tsone ditshiamo ke tsone loungo lwa matsapa a jone; ka ke jone bo rutang boikgapo le tlhoko, tshiamo le bopelokgale; ga go na sepe se se thusang batho mo botshelong go feta dilo tse.
8Fa e le gore O eletsa thata go nna le bomaitseanape mo dilong di le dintsi ke jone jo bo itseng dilo tse di fetileng, bo bonela-pele tse di sa ntseng di tla; bo itse go ranola mebuo, go rarabolola dithabalakane; bo itsetse-pele ditshupo le dikgakgamatso, bo itse go tlhalosa dipaka le dinako.
Babusi ga ba ka ke ba dira kwa ntle ga Botlhale
9Ke gone ka moo ke neng ka ikaelela go bo tsaya ka tshela najo, ka ke ne ke itse gore bo tlaa nna segakolodi sa me mo letlepung, segomotsi sa me mo ditlhobaelong le mo khutsafalong.
10Ka ipolelela ka re, ka jone ke bokiwa fa batho ba kgobokanye, ke tlotliwa mo gare ga bagolwane, ke ntse ke le mmotlana.
11Go tlaa akanngwa gore ke botlhajana fa ke sekisa. Fa pele ga ba bagolo ke tlaa kgatlha batho, 12fa ke didimetse ba tlaa nteta. Fa ke bua ba tlaa tlhokomela; ba ipaya diatla mo melomong fa ke bua nako e telele.
13Ke ka jone ke tlaa nnang le go sa šweng, ke tlogelele ba ba tlaa ntshalang morago kgakologelo e e nnelang ruri.
14Ke tlaa busa merafe mme ditšhaba di tlaa nna ka fa tlase ga me.
15Diganka tse di boitshegang tsa babusi di tlaa boifa fa di utlwa leina la me le umakwa. Ke tlaa nna bonolo mo bathong ba me, mme ke nne mogale mo ntweng, 16fa ke ya gae ke tlaa feta ke itapolosa najo, gonne fa motho a na najo ga go na sepe se galakang; fa motho a tshela najo ga go na botlhoko bope, ke boitumelo fela le boipelo.
Solomone o ipaakanyetsa go kopa Botlhale
17E rile ke ntse ke tšhotlha dilo tse mo tlhogong ke di akanya mo tlhaloganyong, gore go itlwaelanya le Botlhale go na le go sa šweng, 18le gore go itsalanya le jone go na le monate o o feteletseng le mo matsapeng a jone go na le khumo e e sa feleng, le go tuma mo go tlhakaneleng mafoko najo; ka kgarakgatshega gongwe le gongwe ke batla gore ke ka nna najo jang.
19Mo bongwaneng jwa me, ka tlhago, ke ne ke filwe mme ke abetšwe moya o o molemo; 20kgotsa nka re, ka ke ne ke le molemo, ke ne ka tsena mmele o o sa lešwefadiwang.
21Fela ke ne ka lemoga gore ke ka bo ke ne ke se na Botlhale fa Modimo o ne o sa bo mpha, mme e ne e le sesupo sa tlhaloganyo go itse gore jone ke mpho ya ga mang, ke gone ka moo ke ne ka ikuela kwa Moreneng mme ka mo kopa thata, mme ka pelo ya me yotlhe ka re:
