1Gonne ba ne ba bua ba le bosi, ba sa akanye sentle, ba re, “Botshelo jwa rona bo bokhutšhwane e bile bo motoma, mme ga go na molemo ope o o ka thusang motho fa a tla go felela kgotsa mongwe yo o ka gololang motho mo bopipong.
2“Re ne ra bonwa fela go ne go sa rulaganngwa, mme morago ga botshelo jono go tlaa nna fela jaaka ekete ga re ise re ke re be re nne gone. Moya o o mo dinkong tsa rona ke phefo fela mme kakanyo ke tlhasenyana fela e e tsapogang mo go betseng ga dipelo tsa rona; 3fa O e itima mmele o boela mo moloreng, mme moya o nyelela fela jaaka phefo e e sa thuseng sepe.
4“Morago ga lobakanyana, maina a rona a tlaa bo a lebetšwe, ga go na ope yo o tlaa bong a gakologelwa se re tlaa bong re se dirile; botshelo jwa rona bo tlaa feta fela jaaka mookodi wa maru; bo tlaa nyelela fela jaaka mouwane o o phatlaladiwang ke marang a letsatsi, o fenngwa ke mogote wa lone.
5“Ee malatsi a rona ke moriti fela o o fetang, ga go na ope yo o boang mo losong; lo kannwe, mme ga go motho yo o boang.
6“Tlaang he, re tle go ja dilo tse di leng teng monate, re dirise dibopiwa ka botlalo jaaka fa re ne re sa ntse re le baša.
7“A re inweleng bojalwa jwa mofine jwa tlhwatlhwa e e kwa godimo, re itlotseng ditlolo tse di nkgang monate tsa tlhwatlhwa e e kwa godimo, mme go se ka ga bo ga nna le sethunya sepe sa dikgakologo se se re fetang fela.
8“E re pele dithunya tse dikhibitswana tse di nkgang monate di ise di šwabe, re iritele morwala-tlhogo ka tsone.
9“Go se ka ga nna le ope wa rona yo o tlhokomologang go tlhakanela le rona letlepu la boipelo, gongwe le gongwe re tlogele ditshupo tsa go ja monate ga rona, gonne se ke sone bošwa jwa rona, se ke sone seabe sa rona.
10“Fa e le mosiaminyana wa batho ene, a re mo gateleleng, re se ka ra bo ra rekegela motlholagadi, kgotsa ra tlotla moriri o mošweu wa botsofe jwa dingwaga tse dintsi.
11“A thata ya rona e nne yone e e re lekanyetsang tshiamo, gonne se se bokoa se itshupa ka bosone gore ga se na thuso.
12“A re laleleng mosiami gonne o a re kgoreletsa, o re itsa go dira jaaka re rata, o re omanyetsa go roba molao, mme o re tšhwaya phoso gore ga re dire jaaka re godisitšwe.
13“O bolela gore o itse Modimo, mme o ipitsa morwa Morena.
14“O re eme pele, e le mokgobi wa mokgwa o re akanyang ka one, go mmona ga go mmona fela go a re imela.
15“O tshela fela ka mokgwa o o fapaanyeng le wa batho ba bangwe, ditsela tsa gagwe ga di tlwaelesege.
16“O re bona re le dilo fela; o tila ditiro tsa rona jaaka ekete o tila lešwe; o bolela gore bofelelo jwa mosiami ke boitumelo, o ikgantsha ka gore Modimo ke rraagwe.
17“A re ke re boneng gore a se a se bolelang ke boammaaruri, re ke re lepeng re boneng gore bofelelo jwa gagwe ene bo tla nna jang.
18“Fa mosiami e le morwa Modimo Modimo o tlaa mo emela o mo namole mo diatleng tsa baba ba gagwe.
19“A re mo lekeng ka bosetlhogo le pogiso gore re tle re bone gore a o bonolo tota kgotsa nnyaa, re ke re leke boitshokonyana jwa gagwe.
20“A re mo atlholeleng loso lo lo tlhabisang ditlhong, gonne ka mo a bolelang ka teng, o tla sirelediwa.”
Batho ba ba sa siamang ba phoso mo go maswe
21Ba akanya jaana, fela ba timetse, gonne bosula jwa bone bo ba foufaditse.
22Ga ba itse maikaelelo a a fitlhegileng a Modimo, ga ba solofele gore boitshepo bo tlaa duelwa, ga ba bone gore mewa e e se nang molato e tlaa duelwa.
23Le gone Modimo o dirile motho gore a se ka a nyelela, o mo dirile mo setšhwanong sa tlholego ya one; 24ke lefufa la ga Diabolo le le tlisitseng loso mo lefatsheng, jaaka ba e leng bathusanyi ba gagwe ba tlaa lemoga.
