Tlhapi
1A bo a iphimola dikeledi. 2Mosimane a tsamaya le moengele, mme ntša ya ba sala morago. Boobabedi ba sepela mme maitsiboeng a ntlha ba thibelela fa thoko ga Tigrise. 3Mosimane o ne a ile kwa nokeng go tlhapa dinao, fa tlhapi e tona e biloga mo metsing mme e rata go metsa lonao lwa gagwe. Mosimane a goa; 4mme moengele a re, “Tshwara tlhapi eo, O se ka wa bo wa e tlogela ya tsamaya.” Mosimane a kgona tlhapi eo, mme a e gogela mo lotshitshing lwa noka.
5Moengele a re, “E bue; O ntshe santlhoko, pelo le sebete; di boloke, mala one O a latlhe, gonne santlhoko, pelo le sebete di na le ditsompelo tse di alafang.”
6Mosimane a phunya tlhapi mme a ntsha santlhoko le pelo le sebete. A gadika bontlhabongwe jwa tlhapi gore a tle a je; jo bongwe bontlhabongwe a bo bolokela go bo gwamisa. Ke fa ba tsamaya mmogo go fitlhelela ba bo ba le gaufi le Media.
7Mosimane ke fa a botsa moengele potso a re, “Azariase morwarre, tota pelo ya tlhapi le sebete sa yone le santlhoko wa yone di ka alafa eng?”
8A fetola a re, “O besa pelo ya tlhapi le sebete sa yone, mme mosi wa teng o dirisiwa fa monna mongwe kgotsa mosadi mongwe a tshwenngwa ke modemone kgotsa moya mongwe o o bosula; letšhwenyo lengwe le lengwe le le ntseng jalo le nyelelela ruri, le sa tlogele le fa e le motlhalanyana tota.
9“Fa e le santlhoko ene, o dirisiwa jaaka setlolo sa matlho, fa motho a na le dibala tse ditšhweu mo matlhong a gagwe; fa O sena go mo dirisa, se O tšhwanetseng go se dira ke go budula dibala tse fela go di fodisa.”
10Ba ne ba tsena mo Media mme ba ne ba batla ba fitlha mo Ekebatana 11fa Rafaele a raya mosimane a re, “Tobiase morwarre,” A araba a re, “Hee.” Moengele a tšwelelapele a re, “Bosigong jono re ya go lala kwa ga Raguele, yo e leng wa losika lwa gago. O na le ngwana wa mosetsana o bidiwa Sara, 12mme kwa ntle ga ga Sara ga a na ngwana ope, wa mosimane kgotsa wa mosetsana. Jaanong O gaufi nae thata fela ka madi, ga go na ope yo o ka reng ke wa gagwe go feta wena mme O na le gone go ja rraagwe bošwa. Ke mosetsana yo o itheeditseng, yo o pelokgale, yo montle thata, rraagwe e bile o mo rata tota. 13O go tšhwanetse gore O mo nyale. Reetsa, morwarre, mo go one maitsiboeng ano ke ile go bua ka ga mosetsana yo le rraagwe ke bo ke rulaganye gore O mmeelele, mme e tlaa re fa re boa kwa Rhagese re bo re ka ja moletlo wa nyalo. Ke a go bolelela, Raguele ga a na gone gore o ka go gana, kgotsa a mmeelela mongwe o sele. Jaaka go laotšwe mo Lokwalong lwa ga Moše, o tlaa bo a iphetlhela go šwa fela, fa a setse a itse gore losika lo go fa tshwanelo e e fetang ya batho ba bangwe go nyala morwadie. Jalo he, reetsa, morwarre. Mo go one maitsiboeng ano, re tlaa bua ka ga mosetsana yo re bo re mmeelele. Fa re boa kwa Rhagese re tlaa feta re mo tsaya re ya nae gae.”
14Tobiase a araba Rafaele a re, “Azariase morwarre, ke boleletšwe gore o setse a kile a nyadisiwa ga supa mme nako nngwe le nngwe monna wa gagwe o ne a šwa mo ntlwaneng ya monyadiwa. O ne a šwa jone bosigo jo a neng a tsena mo ntlwaneng ya gagwe ka jone; mme ke utlwile batho ba re e ne e le modemone yo o neng a ba bolaya, 15ke sone se se dirang gore ke batle ke tshaba. Le gale ene ga a mo utlwise botlhoko, ka gore o a mo rata, fela fa monna a tlhoma a re o a mo atamela, o a mmolaya. Ke nna ngwana fela wa ga rre, mme ga ke eletse go šwa; ga ke batle go utlwisa rre le mme botlhoko jo bo tlaa bong bo ba bolaye; ga ba na ngwana ope kwa ntle ga me yo o tlaa ba fitlhang.”
16Moengele a re, “A O lebala kgakololo ya ga rrago ne? Kana o go tlhotlheleleditse go itlhophela mosadi mo go ba ga gabo rrago. A ko O reetse he, morwarre. O se ka wa bo wa tšhwenyega mo moyeng ka ntlha ya modemone yo; mo tseye. Mo go one maitsiboeng ano, ke a go solofetsa, O tlaa mo neelwa e le mosadi wa gago. 17Jaanong e re fela O le mo ntlwaneng ya monyadiwa, O tseye pelo ya tlhapi le sebete sa yone, o bese go le gonnyennyane ga tsone mo ensenseng e e tukang. Mosi o tlaa kuelela, modemone o tlaa o nkga a bo a sia, 18mme ga go na kotsi ya gore o ka bo a tlhola a bonwa gaufi le mosetsana. Jalo he, pele ga lo robala mmogo, loobabedi lo eme, lo rapele. Lo kopeng Morena wa legodimo gore a lo neye tšhwaro le tshireletso. Lo se ka lwa bo lwa tshaba; o ne a lebagantswe le wena e sale mo tshimologong mme ke wena yo o tlaa mmolokang. O tlaa go utlwa, mme ke go tlhomamisetsa gore o tlaa go naya bana ba e tlaa neng e kete ke bomorwarrago. O se ka wa belaela sepe fela.”
Mme e rile fa Tobiase a utlwa Rafaele a bua jaana, fa a tla go tlhaloganya gore Sara ke kgaitsadie, wa lotso lwa ga rraagwe, a mo rata tota gore a bo a ka se ka a tlhola a bitsa pelo ya gagwe, pelo ya gagwe.
