1Polelo ya ga Tobite, morwa Tobiele, morwa Ananiele, morwa Gabaele, wa lotso lwa ga Asiele le wa morafe wa ga Nafetali. 2Mo malatsing a ga Salemanesere, kgosi ya Asiria, o ne a lelekwa mo Thisebe, o o mo borwa jwa Kedeše-Nafetali, mo Galelia Bogodimo, kwa godimo ga Hasore, kgakalanyana go ya bophirimatsatsi, kwa Loboa lwa Šefate.
Tobite Molelekwa
3Nna ke le Tobite, ke tsamaile mo ditseleng tsa boammaaruri le mo ditirong tse di molemo malatsi otlhe a botshelo jwa me. Ke file bomorwa-rre le ba lefatshe la ga etsho dikatso tse dintsi, bone ba ba neng ba leleketšwe kwa Ninefe mo lefatsheng ja Asiria jaaka nna.
4E rile ke sa ntse ke le mmotlana, ke sa ntse ke le kwa gae mo lefatsheng ja Iseraele, morafe otlhe wa ga Nafetali rraaetshomogolo, wa ikgaoganya le Ntlo ya ga Dafita, wa bo wa ikgaoganya le Jerusalema. Le fa go ntse jalo, one motse o, e ne e le one o o tlhophilweng mo merafeng yotlhe ya Iseraele, o tlhophetšwe ditlhabelo tsa bone; mo go one Tempele – boago jwa Modimo – e ne e agilwe e bile e tlotlilwe mo lobakeng lotlhe lo lo tlaa nna lo tla. 5Fela bomorwa-rre botlhe le botlhe ba Ntlo ya ga Nafetali ba ne ba abela namane setlhabelo, namane e Jeroboame kgosi ya Iseraele o neng a e dirile kwa Dane, mo dithabeng tsa Galelia.
6Gantsi ke ne ke le nosi fela fa ke dira loeto lo lo boitshepo lwa go ya kwa Jerusalema, e le fa ke diragatsa molao o Iseraele yotlhe e tshwanetseng go o diragatsa ka bosafeleng. Ke ne ke tle ke itlhaganelele kwa Jerusalema ke tshotse mabutšwa-pele a maungo le matsalwapele a diphologolo, karolo ya bolesome ya dikgomo le ya boboa jwa ntlha jwa dinku. 7Ke ne ke tle ke neele baprista, barwa Aarone, dilo tse, gore e nne tsa aletara. Balefita ba ba neng ba direla kwa Jerusalema ke ne ke tle ke ba neye karolo ya bolesome ya veini le mabele, matlhware, digarenata le maungo a mangwe. Ke ne ka tlhomaganya dingwaga di le thataro ke ntse ke tsaya karolo ya bolesome ya bobedi e le ya madi, ka ya go e ntsha kwa Jerusalema.
8Masiela le batlholagadi le baeng ba ba neng ba nna le Baiseraele ke ne ka ba fa sephatlo sa boraro; morago ga ngwaga nngwe le nngwe ya boraro ke ne ke se ba tsisetsa e le mpho. Fa re ne re ja re ne re latela ditaolo tsa Molao wa ga Moše le dikgothaletso tsa ga Debora, mmaagwe rraarona Ananiele; gonne rre o ne a tlhokafetse mme a ntlogetse ke le lesiela.
9E rile ke nna monna ka nyala mosadi mo losikeng lwa rona yo o neng a bidiwa Anna; ra nna le ngwana yo ke neng ka mmitsa Tobiase. 10E rile telekelo kwa Asiria e tla, ka tsewa mme ka ya Ninefe. Bomorwa-rre le banna botlhe ba setšhaba sa ga etsho ba ne ba ja dijo tsa baheitane, fela nna ka se ka ka ba ka di ja dijo tseo, tsa baheitane. 12Mme ka gonne ke ne ka ikanya Modimo wa me ka pelo ya me yotlhe, 13Mogodimodimo o ne a dira gore Salemanesere a nthate, mme ka nna moreki wa dijo wa kgosi.
14Go fitlhelela a bo a swa ke ne ke tle ke ye Media, kwa ke neng ke mo direla papadi teng; mme ke ne ka neela Gabaele morwa-rraagwe Gabriase, kwa Rhagese mo Media, dikgetsi tsa selefera ya tlhwatlhwa ya ditalenta di le some. 15E rile Salemanesere a sena go swa Saneheribe morwawe a tsaya setilo; ditsela tsa Media di ne di tšwetšwe mme ke ka seka ka tlhola ke ya teng.
16Mo malatsing a ga Salemanesere ke ne ke tlwaetse go naya bakaulengwe ba setšhaba sa ga etsho dikatso; 17Ke ne ke fa ba ba tshwerweng ke tlala senkgwe sa me, ba ba sa aparang ke ba naya diaparo; mme e ne e tle e re ke bona ditoto tsa ba ga etsho di latlhetšwe kwa ntle ga dipotana tsa Ninefe ke di fitlhe.
18Ke ne ka bo ka fitlha ba ba neng ba bolailwe ke Saneheribe (gonne e rile Saneheribe a phapharatlhanya a tšwa mo Juta, fa Kgosi ya legodimo e sena go mo otlhaela ditlontlololo tsa gagwe, ya re mo kgalefong ya gagwe a bolaya Baiseraele ba le bantsintsi.) Ke fa ke utswa ditoto tsa bone gore ke di fitlhe; Saneheribe a di batla, fela a se ka a di bona.
19Moninefe mongwe o ne a ya go bolelela kgosi gore ke nna ke di fitlhileng ka sephiri. E rile fa ke tla go itse gore kgosi e boleletšwe kaga me ke bile ke ipona ke tsongwa ke banna ba ba neng ba ka nna ba mpolaya, ka boifa mme ka sia. 20Dilo tsotlhe tsa me di ne tsa tsewa; tsa gapiwa ke batšhwarakgetsi; ka se ka ka tlogelelwa sepe fa e se mosadi wa me Anna le morwaake Tobiase.
21E rile malatsi a le masome a mane a ise a fete morago ga mo, kgosi ya bolaiwa ke bomorwayone ba babedi, ba e rileng morago ga moo, ba siela kwa dithabeng tsa Ararate. Morwawe Esarhaddone a tsaya setilo. Ahikare, ngwana wa morwa-rre Anaele o ne a tlhophelwa go nna mokwaledi yo mogolo wa matlotlo mo mmusong, mme a bewa molaodi yo mogolo wa ditiragalo. 22Ke fa Ahikare a mpuelela ke bo ke dumelelwa go boela kwa Ninefe, fa e sale Ahikare a nna motshwara-phafana yo mogolo, mmei wa setshwai, motsamaisi le motshwara-kgetsi ka fa tlase ga ga Saneheribe, kgosi ya Asiria, mme Esarhaddone a mmoloka mo tirong. E ne e le losika le nna; e le motlogolo wa me.
