SIRAKA 6

₁gonne leina le le mašwe le tlaa go bapalela ditlhong le kgalo, jaaka go diragalela moleofi wa molotsana.

₂O se ka wa reetsa ditlhotlheletso tsa maikutlo a gago, e se re kgotsa a go gagolaka moya jaaka poo e e tlhabang, ₃e se re kgotsa a kometsa matlhare a gago mme a phophotha maungo a gago, mme wa sala O tshwana le setlhare se se fotlhegileng.

₄Maikutlo a a bosula a bolaya yo o nang nao, mme a mo tshegise baba ba gagwe.

₅Lentswe le le monate le ntsifaletsa motho ditsala, mme go bua ka maitseo go laletsa karabo e e tletseng botsala.

₆A ba ba itsanyeng nao ba nne bantsi, fela mo seketeng sa bagakolodi O nne le a le mongwe fela.

₇Fa O rata go nna le tsala, O e leke pele, mme O se ka wa itlhaganelela go e ikanya, ₈gonne tsala e nngwe ke tsala fela fa botsala joo bo e jesa monate mme ka nako ya matshwenyego a gago ga e na go go thusa.

₉Mme e nngwe tsala e tla go tlhanogela, e go tlhabise ditlhong ka go bolelela batho komano ya gago nayo.

₁₀Mme mofuta o mongwe ke wa tsala e e batlang go tlhola e jele nao fela mme e re ka nako ya matshwenyego a gago e bo e sa go thuse; ₁₁fa O santse O tshela sentle e tlaa nna letsogo la gago, e laolaka batlhanka ba gago, ₁₂fela fa O ka bo wa humanega e simolola go go hularela, e be e go iphitlhele.

₁₃O katoge baba ba gago, mme O tlhokomele ditsala tsa gago.

₁₄Tsala e e ikanyegang ke leobo la popota, mongwe le mongwe yo o nang nayo o bonye khumo ya botlhokwa.

₁₅Ga go na sepe se se tlhwatlhwa kgolo jaaka tsala e e ikanyegang, mme bomolemo jwa yone ga bo kake jwa lekanngwa.

₁₆Tsala e e ikanyegang ke mothušwana wa botshelo, mme botlhe ba ba boifang ba tlaa nna nayo.

₁₇Mongwe le mongwe yo o boifang Modimo o nna le ditsala tsa boammaaruri, gonne tsala ya motho e ntse fela jaaka motho yoo a ntse.

₁₈Ngwanaka, e re O sa ntse O le mmotlana O itlhophele thuto, mme go fitlhelela O thunya O tla nna O bona botlhale.

₁₉O nne O bo godise jaaka molemi le mojadi, mme O letele thobo e ntle ya jone, gonne O tlaa fufula go se kaee go bo lema, fela O tloge O je thobo ya jone.

₂₀Kana bo bogale jang mo go ba ba se nang setho! Motho yo o se nang tlhaloganyo ga a nke a nna najo nako e telele:

₂₁Bo tla mo imela jaaka leje le le bokete, mme ga a na go diega go bo ikimolola.

₂₂Gonne botlhale bo ntse fela jaaka leina la jone: ga le umakwe gantsi, ga bo fitlhelwe ke batho ba le bantsi.

₂₃O ntheetse, ngwanaka, mme O tseye tlhagiso ya me tsia, O se ka wa gana kgakololo ya me.

₂₄Ikine maoto ka dikgole tsa jone, mme O tsenye molala wa gago mo ditomong tsa jone.

₂₅Tsenya magetla a gago ka fa tlase ga jokwe ya jone, mme O se ka wa nnela go kgaratlha fa O le mo diteung tsa jone.

₂₆Bo ithatise ka pelo ya gago yotlhe, mme O tsamaye mo ditseleng tsa jone ka thata ya gago yotlhe.

₂₇Bo sale morago, O bo senke; bo tlaa go itshenolela; mme fa O ka bo huparela, O seka wa ba wa bo lesa jwa tsamaya, ₂₈gonne mo bofelong bo tla go lapolosa, bo go itumedise.

₂₉O tlaa bona gore dikgole tsa jone ke phemelo e e thata, ditomo tsa jone ke purapura ya tlotlo.

₃₀Jokwe ya jone e tla nna mokgabo wa gouta. Diteu tsa jone e tla nna meipofo e e bohibidu jo bo mokgona.

₃₁O tlaa bo apara jaaka purapura ya tlotlo. O tlaa bo rwala jaaka serwalo sa tlotlo.

₃₂Ngwanaka, fa O rata O ka rutega. Fa O ka ithuta ka tlhwaafalo fela O tlaa tlhaloganya dilo tse di thata go tlhaloganngwa.

₃₃Fa O rata go reetsa, O tlaa rutega, fa O reetsa sentle, O tlaa nna le botlhale.

₃₄Tsena diphuthego tsa bagolwane, mme fa go na le mongwe yo o botlhale teng, O mo ikame.

₃₅O rate go reetsa polelo nngwe le nngwe e e tšwang kwa Modimong, O se ka wa bo wa tlogela diane tsa botlhale tsa go feta fela.

₃₆Fa O bona monna mongwe yo o tlhalefileng, O nne O sale O mo phakelela, dinao tsa gago di kgobole maribelo a gagwe.

₃₇O nne O akanye ditaolo tsa Morena, O tlhome mogopolo wa gago mo melaong ya gagwe, O tlhalefisa mogopolo wa gago, mme O tlaa newa botlhale jo O bo eletsang.