SIRAKA 48

₁Ga bo go tsoga mmoledi-pele Elia jaaka molelo, lefoko la gagwe le tuka lobone.

₂Ke ene yo o neng a ba tsisetsa leuba, mme mo tlhwaafalong ya gagwe a fokotsa palo ya bone.

₃Ka lefoko la Morena a tšwala magodimo, ya bo ya re gararo a folosa molelo.

₄Kana ruri O ne O galalela jang ka ditiro tsa gago tse di gakgamatsang, Elia! Ke mang tota yo o tšhwanelwang ke go ipoka jaaka wena o tshwanelwa?

₅O ne wa rudisa mošwi, wa mo ntsha mo Bopipong ka lefoko la Mogodimodimo.

₆O ne wa diga dikgosi; batlotlegi wa ba ntsha mo malaong a bone.

₇Mo Sinai O ne wa utlwa komanyo, le katlholo ya kotlhao mo Horebe; ₈wa tlotsa magosi gore a tle a otlhaye; le baboledipele gore ba tle ba tseye maemo a gago.

₉O ne wa tlhatlosiwa ka setsuatsue sa molelo mo kareng ka dipitse tsa molelo.

₁₀Mo dipolelong-pele tsa katlholo go kwadilwe gore o tlhometswe go kokobetsa kgalefo ya Modimo pele ga a gakala go feta selekanyo, go sokololela dipelo tsa borabana kwa baneng ba bone, le go busetsa merafe ya ga Jakobe.

₁₁Go sego ba ba tlaa go bonang, le ba ba ithobaletseng ka lorato; gonne le rona re tlaa tshela.

₁₂Elia o ne a khurumediwa ka setsuatsue mme Elisa a tladiwa moya wa gagwe. Mo botshelong jotlhe jwa gagwe o ne a sa tshabe mmusi ope, mme ga se ka ga nna le ope yo o mo laolang.

₁₃Go ne go se na tiro epe e e neng e mo imela, le fa a sena go šwa tota mmele wa gagwe o ne wa nna wa bolelela-pele.

₁₄Fa a ntse a tshela o ne a dira dikgakgamatso, mme mo losong ditiro tsa gagwe tsa akabatsa.

₁₅Le fa go ntse jalo, batho ga ba a ka ba ikwatlhaya kgotsa ba tlogela dibe tsa bone go fitlhelela ba bo ba ntshiwa mo lefatshing la bone ba phatlaladiwa gongwe le gongwe mo lefatshing.

₁₆Ga sala ba se kaee fela, ba na le mmusi wa Ntlo ya ga Dafita. Bangwe ba bone ba dira se se neng se itumedisa Modimo; fela ba bangwe ba nnela go leofela pele fela.

₁₇Hesekiele o ne a tiisa motse, a bo a eledisetsa metsi mo go one. A phunyeletsa lefika ka dipetlo tsa tshipi mme a aga madibela.

₁₈Mo malatsing a gagwe Senaheribe o ne a tlhasela, a roma Rabeshake. A tsholeletsa Sione letsogo, mme a ipokela godimo a ikgogomosa.

₁₉Ke fa dipelo tsa bone di uba, diatla tsa bone di roromaka, ba utlwa botlhoko jaaka mosadi a le mo pelegong.

₂₀Fela ba bitsa Morena yo o boutlwelo-botlhoko, ba mo otlololela diatla. Ka bofefo yo o Boitshepo a ba utlwa a le kwa legodimong, a bo a ba namola ka seatla sa ga Isaia.

₂₁A thuba bothibelelo jwa Maasiria, mme morongwa wa gagwe a bo a ba bolaaka.

₂₂Gonne Hesekiele o ne a dira se se itumedisang Morena, mme a tlhomama mo ditseleng tsa ga Dafita rraagwe, tse mmoledi-pele Isaia o neng a di mo laetse, ene Isaia yo e neng e le monna yo mogolo yo o ikanyegang mo ponong ya gagwe.

₂₃Mo malatsing a gagwe letsatsi le ne la boela morago, a lelefatsa botshelo jwa kgosi.

₂₄Ka thata ya moya o ne a bona dilo tsa bofelo, a gomotsa bahutsafadi mo Sione; ₂₅O ne a senola dilo tse di neng di tlaa diragala go fitlhelela bofelo jwa metlha, le dilo tse di fitlhegileng pele di diragala.