SIRAKA 46

₁Jošua morwa Nune e ne e le senatla mo ntweng. E ne e le ene yo o neng a tlhomaganela Moše mo tirong ya boprofeta. Leina la gagwe le ne le mo tšhwanela sentle: O ne a boloka Batho ba ba tlhopilweng ka go dira pusoloso mo babeng ba ba neng ba le kga tlhanong nae. Ka mokgwa o o ntseng jalo a tsenya setšhaba sa Iseraele mo bošweng jwa sone.

₂Kana go ne go le gontle jang fa a tsholetsa mabogo a gagwe, a tsokotsa tšhaka go tlhabana le metse.

₃Ke mang yo o neng a kile a supa maitsetsepelo a a kalo jaaka ene? Ke ene yo o neng a lwa dintwa tsa Morena.

₄A ga se ene yo o neng a emisa letsatsi ka seatla sa gagwe, mme letsatsi la dirwa malatsi a le mabedi?

₅O ne a bitsa Modimo, Mogodimodimo, fa a ne a pitlagantse mmaba ka ntlha tsotlhe. Morena o ne a bo a mo araba ka sefako se se thata, se se fotlhang.

₆A wela setšhaba seo sa mmaba godimo, mme ya re fa Phologelong ya Bethorone a nyeletsa botlhe ba ba neng ba tlhabana, gore ditšhaba di tle di itse bonatla jwa gagwe mo ntweng le gore ba itse fa motlhabantshi wa bone e ne e le Morena. O ne a utlwa yo o Thatayotlhe.

₇Ka nako ya ga Moše o ne a setse a dira tiro ya boikanyego, ene le Kalebe morwa Jefunne; ba tlhabana le morafe otlhe go thibela batho gore ba se ka ba leofa, mme ba didimatsa bangongoregi ba borukhutlhi.

₈Ke gone ka moo boobabedi ba ba neng ba bolokwa mo gare ga banna ba 600 000 ba ba neng ba tsamaya ka dinao, ba bo ba tsenngwa mo bošweng jwa bone, mo lefatshing le le elelang maši le dinotshe.

₉Morena o ne a naya Kalebe thata e o neng a nna nayo go fitlhelela a bo a tsofala, thata ya gore a bo a ye go gata lefatshe la makgabana le lotso lwa gagwe lo sa ntseng lo le ja bošwa, ₁₀gore bomorwa Iseraele ba tle ba bone fa go sala Morena morago go siame.

₁₁Baatlhodi le bone, ka go tlhatlologana ka maina a bone, botlhe e ne e le banna ba pelo tsa bone di neng tsa se ka tsa tlhoka go ikanyega, ba ba iseng ba ke ba hularele Morena. A maina a bone e re a gakologelwa, a bakwe!

₁₂A marapo a bone a tlhogise matlhogela gape, a tšwe mo mabitleng; a maina a banna ba ba tumileng bao, a tshele gape mo go bomorwaabo.

₁₃Samuele o ne a ratiwa ke Morena wa gagwe; e le moprofeta wa Morena. O ne a tlhoma bogosi mme a tlotsa babusi go laola batho ba gaabo.

₁₄O ne a atlhola phuthego ka Molao wa Morena, mme Morena a disa Jakobe.

₁₅O ne a bonwa e le moprofeta ka ntlha ya boikanyego jwa gagwe, mme dipolelo tsa gagwe di ne di supa fa e ne e le molebi yo o tshwanetseng go dumelwa.

₁₆O ne a bitsa Morena, yo o thatayotlhe, fa baba ba gagwe ba ne ba mo pitlagantse ka ntlha tsotlhe, o ne a ntsha tshupelo ya konyana e e anyang.

₁₇Mme Morena a duma a le kwa legodimong, A utlwatsa lentšwe la gagwe mo tumong e kgolo.

₁₈A bolaaka baeteledipele ba mmaba, le babusi botlhe ba Bafilisitia.

₁₉Ya re pele ga nako ya go tsena ga gagwe mo boikhutsong jo bo sa khutleng a bolela fa pele ga Morena le motlodiwa wa gagwe a re, “Ga ke ise ke ke ke amoge ope ditsa-gagwe, le fa e le ditlhako tsa gagwe tota.” Le gone ga go ise go ke go nne le ope yo o neng a mmona molato.

₂₀Mme e rile a sena go ithobalela a bolelela-pele, a tlhagisa kgosi kaga loso lwa yone. A bua ka lentšwe le le utlwalang le tšwa mo mmung a bolela-pele, go tlosa boleo jwa batho.